ބަންގްލަދޭޝްގެ ކުރީގެ ބޮޑު ވަޒީރު ޝެއިޚް ހަސީނާގެ ސަރުކާރާ ދެކޮޅަށް އެ ގައުމުގެ ޔުނިވަރސިޓީ ދަރިވަރުން އިސްނަގައިގެން ކުރިއަށް ގެންދިޔަ މުޒާހަރާ ތަކުގައި ބައިވެރިވުމުގެ ގޮތުން ޔުނައިޓެޑް އަރަބް އެމިރޭޓްސް (ޔޫއޭއީ) ގައި ދިރިއުޅޭ ބަންގްލަދޭޝް މީހުން އިހްތިޖާޖު ކުރުމުގެ ސަބަބުން ޖަލަލަށް ލީ މީހުން މިނިވަން ކޮށްފިއެވެ.

އެމިރޭޓްސް ނިއުސް އެޖެންސީ (ވާމް) އިން އަންގާރަ ދުވަހު ރިޕޯޓުކުރި ގޮތުގައި، ޔޫއޭއީ ގެ ރައީސް ޝެއިޚް މުޙައްމަދު ބިން ޒަޔިދު ވަނީ އެ އިހުތިޖާޖް ކުރުމުގެ ސަބަބުން ޖަލަށްލެވުނު ބަންގްލަދޭޝްގެ ރައްޔިތުންނަށް މަޢާފު ދެއްވާފައެވެ.

މީގެ ތެރޭގައި އުމުރަށް ޖަލަށްލުމަށް ހުކުމް ކުރި 3 މީހަކާއި، 10 އަހަރަށް ޖަލަށް ލުމަށް ހުކުމް ކުރި 53 މީހަކާއި، 11 އަހަރަށް ޖަލަށްލުމަށް ޙުކުމްކުރި މީހަކު ހިމެނޭ ކަމަށް ރިޕޯޓް ކޮށްފައިވެއެވެ.

އެމީހުންގެ ޖަލު ޙުކުމް ބާތިލް ކޮށްފައި ވުމާއެކު ޔޫއޭއީ ސަރުކާރުން ވަނީ އެމީހުން އަނބުރާ ބަންގްލަދޭޝަށް ފޮނުވާލުމުގެ އިންތިޒާމު ހަމަޖައްސާފައެވެ.

ޖުލައި މަހު ބަންގްލަދޭޝްގައި ސަރުކާރުގެ ވަޒީފާތައް ދިނުމުގައި އަމަލު ކުރާ ކޯޓާ ސިސްޓަމް އާ ދެކޮޅަށް ޔުނިވަރސިޓީ ދަރިވަރުން އިސް ނަގައިގެން ފެށި މުޒާހަރާތައް ހޫނުވެ އެންމެ ފަހުން، ބޮޑުވަޒީރުގެ ގަނޑުވަރަށް އެތައް ހާސް މީހުން ވަދެގަތުމަށް އެޅެން ފެށުމާއެކު ހަސީނާ ވަނީ އިސްތިއުފާ ދެއްވާ އޮގަސްޓް މަހުގެ 5 ވަނަ ދުވަހު ފިއްލަވައިގެން އިންޑިއާ އަށް ވަޑައިގެންފައެވެ.