މިސަރުކާރުގެ އެންމެ ބޮޑު ހޭދައެއް ކުރަންޖެހިފައިވަނީ އަބްދުއްރަހީމާއި، އެބޭފުޅާގެ އާއިލާއަށް: ޝިފާގު

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގައި އެންމެ ބޮޑު ހޭދައެއް ކުރަންޖެހިފައިވަނީ ރައްޔިތުން މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ އާއި އެބޭފުޅާގެ އާއިލާއަށް ކަމަށް ރައްޔިތުން މަޖިލީހުގެ ކުރީގެ މެންބަރު ޝިފާގު މުފީދު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ޝިފާގު ވިދާޅުވީ ދިވެހި ރައްޔިތުން މަސައްކަތް ކުރީ އާއިލީ ވެރިކަން ނިމުމަކަށް ގެނެސް، ތިން ބާރު ވަކިވެފައިވާ މިނިވަން ދައުލަތެއް ގާއިމް ކުރުމަށް ކަމަށާއި، ވާދަވެރި ސިޔާސީ ނިޒާމެއް ގާއިމް ކުރުމަށް ކަމަށެވެ.

ނަމަވެސް ރައީސް މުއިއްޒުގެ ސަރުކާރުގައި އޮތީ އަބްދުއްރަހީމްގެ އާއިލީ ބޭފުޅުން ކަމަށާއި، ދައުލަތުން ބޮޑު ހަރަދެއް ކުރަންޖެހެނީ އެއާއިލާއަށް ކަމަށެވެ. އެހެންކަމުން މިއީ މަތިބަރު ނާގާބިލް ސަރުކާރެއް ކަމަށް އޭނާ ވިދާޅުވިއެވެ.

މީގެ އިތުރުން ޝިފާގު ވިދާޅުވީ ޕީޕީއެމްގައި އެބޭފުޅާ މަސައްކަތް ކުރިއިރު ވެސް އުޅޭގޮތުންނާއި، ބޭނުންކުރާ ބަހުރުވައިން ޕާޓީގެ ގިނަ މެންބަރުން އަބްދުއްރަހީމަށް ނުރުހޭ ކަމަށެވެ. އަބްދުއްރަހީމްގެ ފަސްމަންޒަރު މުޑުދާރުވެފައި ނުތާހިރުކަމަށާއި، އެއީ އެއްވެސް އިރެއްގައި އިތުބާރު ކުރެވޭފަދަ ބޭފުޅެއް ނޫން ކަމަށް ޝިފާގު ވިދާޅުވިއެވެ. އަދި ވިދާޅުވީ ކަމެއް އޮޅުވާލުމަށް ނުވަތަ ވައްކަމެއް ކުރުމުގެ ފުރުސަތު ލިބިއްޖެކަމަށްވާނަމަ އެކަމެއް އަބްދުއްރަހީމް ކުރާނެ ކަމަށެވެ.

ކުރީގެ ރައީސް އަބްދުﷲ ޔާމީނަށް އަބްދުއްރަހީމް ފާޑު ވިދާޅުވެފައިވާތީ އެކަމަށް ރައްދު ދެއްވައި ޝިފާގު ވިދާޅުވީ އަބްދުއްރަހީމް ޑޮކްޓަރަށް ދައްކައި ފަރުވާ ހޯދަންޖެހޭ ކަމަށެވެ.

ޝިފާގު ވިދާޅުވީ ޕީޕީއެމް އުފައްދައި ކުރިއެރުވީ އަބްދުއްރަހީމް ނޫން ކަމަށާއި، ނަމަވެސް ޕާޓީގެ ކްރެޑިޓް ނެގުމަށް މަސައްކަތް ކުރާ ކަމަށެވެ. މިއަދު ރައްޔިތުންނަށް އަބްދުއްރަހީމްއަކީ ކިހައި ފެންވަރެއްގެ ބޭފުޅެއްކަން އެނގޭ ކަމަށާއި، ރައްޔިތުންގެ އިތުބާރު ގެއްލިފައިވާ ކަމަށް އޭނާ ވިދާޅުވިއެވެ.