ޕްރޮސިކިއުޓަރ ޖެނެރަލް އަލްއުސްތާޛު ޙުސައިން ޝަމީމްގެ އިތުބާރު ނެތްކަމަށް ބުނެ ހުށަހެޅިފައިވާ މައްސަލައިގައި، ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް ޖަވާބުދާރީ ވެ ވަޑައިގަންނަވަން ބޭއްވި ކޮމިޓީ ސިއްރުކޮށްފިއެވެ.
ކޮމިޓީ ސިއްރު ކޮށްފައިވަނީ ކޮމިޓީގެ މި ޖަލްސާ ސިއްރު ނުކޮށް، ޢާންމުންނަށް ހުޅުވާލައިގެން ބާއްވަވައި ދެއްވުމަށް ޕްރޮސިކިއުޓަރ ޖެނެރަލް އެދިވަޑައިގަންނަވާފައި ވަނިކޮށެވެ.
ކޮމިޓީ ބައްދަލުވުން ސިއްރު ކޮށްފައިވަނީ މީގެ ކުރިން ބޭއްވި ކޮމިޓީ ބައްދަލުވުމެއް ސިއްރު ކުރައްވަން ވަކި ހިސާބަކުން ޕީޖީ އަމިއްލަފުޅަށް އެދިވަޑައިގެންފައިވާތީ އެކަމަށް އިހުތިރާމް ކުރުމުގެ ގޮތުންކަމަށް ބުނެއެވެ. ނަމަވެސް އެ ދުވަހުގެ ބައްދަލުވުން ސިއްރު ކޮށްދޭން ޕީޖީ އެދިވަޑައިގަތީ ޕީޖީ އޮފީހުގެ މަސައްކަތްތަކާ ގުޅިގެން ހައްސާސް މައުލޫމާތުތަކެއް ކޮމިޓީއަށް ހިއްސާ ކުރުމަށެވެ. އެއީ ކޮމިޓީގައި ލައިވްކޮށް ޕްރެޒެންޓޭޝަނެއްވެސް ދެއްވުމަށްފަހުއެވެ.
އެ ދުވަހު ކޮމިޓީ ސިއްރުކުރަން އެދިލެއްވީވެސް ޕީޖީ އޮފީހުގެ ކޭސް މެނޭޖްމަންޓް ސިސްޓަމް ކޮމިޓީގައި މެމްބަރުންނަށް ދައްކާލުމުގެ ގޮތުންނެވެ. އެނޫން މައުލޫމާތުތައް އާންމުކުރަން އޭރުވެސް ޕީޖީ އެދިވަޑައިގެންނެވިއެވެ.
އޭގެ އިތުރުން، ޕީޖީ ވަކި ކުރުމަށް އެދި ހުށަހަޅާފައިވާ މައްސަލައިގައި ކޮށްފައިވަނީ ބޮޑެތި ތުހުމަތުތަކެއްކަމަށްވާއިރު، އެ ތުހުމަތުތައް ކޮށްފައިވަނީވެސް ޕަބްލިކްގައި ކަމަށްވާއިރު، އެ ތުހުމަތުތަކަށް ޖަވާބުދާރީވާން ބާއްވާ ކޮމިޓީވެސް އާންމު ކުރުމަކީ ތަބައީ އިންސާފުގެ މަގުން ބަލާއިރު އެންމެ ރަނގަޅު ގޮތްކަމަށްވާތީ ޕީޖީ ވަނީ ކޮމިޓީ ސިއްރު ނުކޮށްދޭން އެދިފައެވެ.
ޝަމީމް ވަކި ކުރެއްވުމަށް މަޖިލީހަށް ހުށަހެޅުއްވީ ހުޅުދޫ ދާއިރާގެ މެމްބަރު މުހައްމަދު ޝާހިދުއެވެ. ކޮމިޓީ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާޤުން އޭރު ފާސްކޮށްފައިވަނީ މި މައްސަލައިގައި ޖަވާބުދާރީވުމަށް ޝަމީމަށް ނޯޓިސް ފޮނުވުމަށެވެ. އެގޮތުން ފަސް ދުވަހުގެ ނޯޓިސްއެއް ޝަމީމަށް ފޮނުވަން ކޮމިޓީން ފާސްކޮށް ޖަވާބުދާރީވާން ތާވަލުކުރީ ބުރާސްފަތި ދުވަހަށެވެ.
