ބާސެލޯނާ އަށް ކުޅެމުން އަންނަ ޖަރުމަނުގެ އިލްކާއީ ގުންޑޮގާން ގެނައުމަށް، އޭނާގެ ކުރީގެ ކުލަބު މެންޗެސްޓަރ ސިޓީ އަށް ބަދަލުވުމަށް އެއްބަސްވުމަކަށް އަތުވެއްޖެ އެވެ.

ސިޓީ އާއެކު ސޮއި ކޮށްފައިވާ އެއްބަސްވުން ހަމަވުމުން، އުމުރުން 33 އަހަރުގެ ކުޅުންތެރިޔާާ ބާސެލޯނާ އަށް ބަދަލުވީ މިދިޔަ އަހަރު އެވެ. ބާސެލޯނާ އާއެކު ގުންޑޮގާން ސޮއި ކޮށްފައި ވަނީ ދެ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގައި ބާކީ އެއް އަހަރު އޮއްވައި، ބާސެލޯނާ އިން ބޭނުން ވަނީ ގުންޑޮގާން ދޫކޮށްލަން ކަމަށާއި، އޭނާ ވެސް ހުރީ އެހެން ކުލަބަކަށް ބަދަލުވާން ކަމަށް ރިޕޯޓުތައް ބުނެ އެވެ.

ގުންޑޮގާން ބާސެލޯނާ ދޫކޮށްލާއިރު، އެއްބަސްވުމުގައި ބާކީ އޮތް މުއްދަތަށް އޭނާ މުސާރަ ވެސް ނުނަގާނެ އެވެ. ބާސެލޯނާ އިން ގުންޑޮގާން ދޫކޮށްލަން ބޭނުންވާއިރު، ސިޓީން ވަނީ އޭނާ ހޯދުމުގެ ޝައުޤުވެރިކަން ފާޅުކޮށްފަ އެވެ. ގުންޑޮގާން އަލުން ސިޓީ އަށް ގެންނަން އެ ޓީމުގެ ކޯޗު ޕެޕް ގާޑިއޯލާ ވެސް ބޭނުންވާއިރު، މިހާރު ސިޓީން ބާސެލޯނާ އާއެކު އެއްބަސްވުމަކަށް އައިސްފައިވާ ކަމަށް ރިޕޯޓުތައް ބުނެ އެވެ.

މީގެ ކުރިން ސިޓީ ގައި ގުންޑޮގާން ހަތް ސީޒަން ހޭދަކޮށްފައިވާއިރު، އޭނާ ވަނީ އެ ކުލަބަށް ކުޅެދިން 304 މެޗުގައި 60 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ 14 ތައްޓެއް ކާމިޔާބު ކޮށްފަ އެވެ. ސިޓީގެ ކެޕްޓަންކަން ވެސް ކޮށްފައިވާ ގުންޑޮގާން ވަނީ ބާސެލޯނާ އަށް ބަދަލުވެ އެ ކުލަބަށް ކުޅެދިން 51 މެޗުގައި ފަސް ލަނޑު ޖަހައިފަ އެވެ.