ފުރުސަތުތައް ގެއްލުނަސް، ޓެން ހާގްގެ އިތުބާރު ރަޝްފޯޑަށް

މެންޗެސްޓަރ ޔުނައިޓެޑަށް ކުޅެމުން އަންނަ އިންގްލެންޑުގެ މާކަސް ރަޝްފޯޑަށް ފުރިހަމަ އިތުބާރު އޮތް ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.

އޭނާ މިހެން ބުނީ މެންޗެސްޓަރ ސިޓީއާ ދެކޮޅަށް ކުޅުނު ކޮމިއުނިޓީ ޝީލްޑް މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗުގެ ފުރަތަމަ 11 ގައި ހިމެނިގެން ރަޝްފޯޑު ކުޅުނުއިރު، އޭނާ އަށް ވަނީ ފުރުސަތުތަކެއް ލިބިފަ އެވެ. މެޗުގެ ފަހު 10 މިނެޓުގެ ތެރޭގައި ޓެން ހާގް ވަނީ ރަޝްފޯޑު ބަދަލު ކޮށްފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ޓެން ހާގް ބުނީ، ރަޝްފޯޑު އަދި ޔުނައިޓެޑު ރަނގަޅު ގޮތުގައި ކުރިއަށްދާ ނަމަ، ލަނޑުތައް ޖަހާނެ ކަމަށެވެ. އަދި މެޗުތަކުގައި ލިބޭ ފުރުސަތުތައް ގެއްލުމުގެ ސަބަބުން ކުރިމަތިވާ ޕްރެޝަރުތަކާ ކުރިމަތިލާން ވެސް ރަޝްފޯޑަށް އިނގޭނެ ކަމަށް ޓެން ހާގް ބުންޏެވެ. އަދި ރަޝްފޯޑު އެއް ފަހަރު ވެސް ލަނޑު ޖަހައިފި ނަމަ، ދެން އޭނާ ލަނޑު ޖެހުމުގައި ދެމި ހުންނާނެ ކަމަށް ވެސް ޓެން ހާގް ވަނީ ބުނެފަ އެވެ. އަދި އެކަމުގެ ފުރިހަމަ ޔަގީންކަން އޮތް ކަމަށް ވެސް ޓެން ހާގް ބުންޏެވެ.

ޔުނައިޓެޑުން ސީނިއާ ކެރިއަރު ފެށި ރަޝްފޯޑު ވަނީ މިހާތަނަށް އެ ކުލަބުގައި ހޭދަކޮށްފައިވާ 10 ސީޒަންގެ ތެރޭގައި 403 މެޗު ކުޅެދީ، 131 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ހަ ތައްޓެއް ކާމިޔާބު ކޮށްފަ އެވެ. އެއީ އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑް އަދި ޔުއެފާ ޔޫރޮޕާ ލީގެވެ.