އިތާ އިންޓަރ ރިސޯރޓް ވޮލީބޯޅަ މުބާރާތުގައި ޖޯލި ބީން ދެވަނަ މެޗުންވެސް މޮޅުވެ, ހެރިޓެންސް އާރަށް ފުރަތަމަ މޮޅު ހޯދައިފި އެވެ.

ޖޯލި ބީން ދެވަނަ މެޗު ކާމިޔާބުކޮށް, ސެމީގެ ޔަގީންކަން ހޯދީ ސީދާ ތިން ސެޓުން މީދުއްޕަރު ބަލިކޮށްގެންނެވެ. ގްރޫޕް އޭގައި ޖޯލި ބީން މީދުއްޕަރު އަތުން ސެޓްތައް ގެންދިޔައީ 25-7, 25-14 އަދި 25-22 ނެވެ. މެޗުގެ މޮޅު ކުޅުންތެރިއަކީ ޖޯލި ބީންގެ ސާޖިދު ރަޝީދު އެވެ. ޖޯލި ބީން ފުރަތަމަ މެޗު ކާމިޔާބުކުރީ ކުޑަފުއްޓާއި ވާދަކޮށް 3-2 ސެޓުން ނެވެ.

ހެރިޓެންސް އާރަށް ފުރަތަމަ މޮޅު ހޯދީ ފާރުުފުށި ރިސޯރޓް އެންޑް ސްޕާ ސީދާ ތިން ސެޓުން ބަލިކޮށްގެންނެވެ. ހެރިޓެންސް އާރަށް މެޗުގެ ސެޓްތައް ގެންދިޔައީ 25-22, 25-22 އަދި 25-20 ނެވެ. މެޗުގެ މޮޅު ކުޅުންތެރިއަކީ ޗަމީރާ ޕްރަޝާދު އެވެ. ފުރަތަމަ މެޗުގައި ޖޯލި މޯލްޑިވްސް އަތުން ބަލިވި ނަމަވެސް ދެވަނަ މެޗު ކާމިޔާބުކުރުމުން ހެރިޓެންސް އާރަށަށް ވަނީ ސެމީގެ ދޮރު ހުޅުވިފައެވެ.

މުބާރާތުގައި ހޮނިހިރު ދުވަހުގެރޭ ދެ މެޗު ކުޅޭނެ އެވެ. ފުރަތަމަ މެޗުގައި ވާދަކުރާނީ ގްރޫޕް އޭގެ ކުޑަފުއްޓާއި މީދުއްޕަރެވެ. ދެވަނަ މެޗުގައި ވާދަކުރާނީ ގްރޫޕް ބީގެ ރީތިފަރާއި ހެރިޓެންސް އާރަށެވެ. މިއީ މީދޫ އެކުވެރި ކްލަބުން އެއަތޮޅުގެ ރިސޯރޓްތަކުގެ މެދުގައި މީދޫގައި ކުރިއަށް ގެންދާ މުބާރާތެކެވެ.