ފާޑުކިއުން އަމާޒުވެފައިވާ އާޖެންޓީނާގެ މިޑްފީލްޑަރު އެންޒޯ ފެނާންޑޭޒަށް ޗެލްސީގެ ވައިސް ކެޕްޓަންކަން ދޭން ނިންމައިފި އެވެ.
އާ ކޯޗު އެންޒޯ މަރެސްކާ މި ގޮތަށް ނިންމަން ބޭނުންވީ މިވަގުތު ޓީމުގައި ތިބި ކުޅުންތެރިންނަށް ބަލާއިރު އެންޒޯ އަކީ އެންމެ ތަޖުރިބާކާރު އެއް ކުޅުންތެރިޔާއަށްވުމުންނެވެ. އެންޒޯ އަކީ 2022 ވަނަ އަހަރުގެ ވޯލްޑްކަޕާއި މި އަހަރުގެ ކޮޕާ އެމެރިކާ އާޖެންޓީނާ އަށް ކާމިޔާބުކޮށްދިނުމުގައި މުހިންމު ދައުރެއް އަދާކުރި ކުޅުންތެރިއެކެވެ.
އޭނާ އަށް ފާޑުކިއުން އަމާޒުވީ ކޮޕާ އެމެރިކާ ކާމިޔާބު ކުރުމަށްފަހު ފްރާންސްގެ ކުޅުންތެރިންނަށް ބަދުބަސް ބުނުމާއި ނަސްލީ ގޮތުން އެމީހުންނާ ދިމާކުރުމުގެ ގޮތުން ލަވަކިޔާފައިވާތީ އެވެ. މި މައްސަލާގައި ފީފާއިން ވެސް ފަނީ އެންޒޯގެ އަމަލުތައް ބަލަމުންނެވެ.
ނަމަވެސް ޗެލްސީގެ ކޯޗު މަރެސްކާ ބުނީ އާ ސީޒަނަށް ތައްޔާރުވާން ޗެލްސީ މިހާރު ކުރަމުންދާ ދަތުރުގައި ޓީމާ ގުޅުމަށްފަހު އެންޒޯ އެކަމާ ޗެލްސީގައި ތިބި ފްރާންސްގެ ކުޅުންތެރިންގެ ކިބައިން މައާފަށް އެދިފައިވާ ކަމަށެވެ. ނަމަވެސް އޭނާ އަށް ކެޕްޓަންކަން ދިނުމަކީ އިނގިރޭސި މީޑިއާގެ ފާޑުކިއުން އަމާޒުވާނެ ކަމެއް ކަމަށް ތަޖުރިބާކާރުން ބުނެ އެވެ.
ނަމަވެސް މިއިން ކަމަކާ ވިސްނުމެއްނެތި މަރެސްކާ ވަނީ އެމެރިކާގައި މިހާރު ކުޅެމުންދާ ފްރީ ސީޒަން މެޗުތަކުގައި ރެއާލް މެޑްރިޑާ ދެކޮޅަށް ކުޅުނު މެޗުގެ ފަހު ހާފުގައި އެންޒޯ އަތުގައި ކެޕްޓަން ބޭންޑް އަޅުވައިފަ އެވެ.
