ބެންފީކާ އަށް ކުޅެމުން އަންނަ އާޖެންޓީނާގެ އެޓޭކިން މިޑްފީލްޑަރު އެންހެލް ޑި މާރިއާ، އެ ކުލަބާ އެކު ހަދާފައިވާ އެއްބަސްވުން އައު ކޮށްފި އެވެ.

އުމުރުން 36 އަހަރުގެ ޑި މާރިއާ އެންމެ ފުރަތަމަ ބެންފީކާ އަށް ކުޅުނީ 2007 ވަނަ އަހަރުން 2010 ވަނަ އަހަރަށެވެ. އޭގެ ފަހުން، ދެ ވަނަ ފަހަރަށް އޭނާ ބެންފީކާ އަށް ބަދަލުވީ 2023 ވަނަ އަހަރު އެވެ. އިޓަލީގެ ޔުވެންޓަސްގައި ހުރުމަށްފަހު، ޑި މާރިއާ ބެންފީކާ އަށް ބަދަލުވީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ.

އެހެން ނަމަވެސް މިހާރު ޑި މާރިއާ ވަނީ އިތުރު އެއް އަހަރަށް އެ ކުލަބުގެ އެއްބަސްވުން އައު ކޮށްފަ އެވެ. އެހެންކަމުން މިހާރު ބެންފީކާ އާއެކު ޑި މާރިއާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ބެންފީކާ އިން ވަނީ އެކަން ހާމަ ވެސް ކޮށްފަ އެވެ.

ޑި މާރިއާ ވަނީ ދެ ވަނަ ފަހަރަށް ބެންފީކާ އަށް ބަދަލުވެ އެ ކުލަބަށް ކުޅެދިން 48 މެޗުގައި 17 ލަނޑު ޖަހައިފަ އެވެ. އޭނާ ވަނީ ދެ ފަހަރުގެ މަތިން ބެންފީކާ އަށް ކުޅެދިން 173 މެޗުގައި 32 ލަނޑު ޖަހައިފަ އެވެ. ބެންފީކާ އާއެކު ޑި މާރިއާ ވަނީ ހަތަރު ތައްޓެއް ކާމިޔާބު ކޮށްފަ އެވެ. އޭގެ ތެރެއިން އެއް ތައްޓަކީ، ދެ ވަނަ ފަހަަރަށް އެ ކުލަބަށް ބަދަލުވެ، އެ ކުލަބާއެކު އޭނާ ހޯދާފައިވާ ތައްޓެކެވެ.

މިދިޔަ ޖުލައި މަހު އެމެރިކާގައި ކުރިއަށް ދިޔަ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) އަށް ފަހު، ޑި މާރިއާ ޤައުމީ ޓީމަށް ކުޅުން ހުއްޓާލަން ނިންމައިފަ އެވެ. ޤައުމީ ޓީމަށް ކުޅުން ހުއްޓާލަން ނިންމި ނަމަވެސް، ޑި މާރިއާ ވަނީ ކުލަބު ކެރިއަރު ނިންމާ ނުލަން ނިންމައިފަ އެވެ.