ހުސްވި ހަފްތާގައި އީރާންގެ ވެރިރަށް ތެހެރާންގައި ހުންނަވަނިކޮށް ހަމާސްގެ ޕޮލިޓިކަލް ބިއުރޯގެ ވެރިޔާ އިސްމާއީލް ހަނިއްޔާ އަވަހާރަ ކޮށްލުމާ ގުޅިގެން ގާޒާ ގައި ހުންނަ އެ ޖަމާއަތުގެ އެންމެ އިސްވެރިޔާގެ ގޮތުގައި ޕޮލިޓިކަލް ބިއުރޯގެ ލީޑަރުގެ ގެ މަގާމަށް ޔަހްޔާ ސިންވާރް އިސްކޮށްފައިވާ ކަމަށް އަންގާރަ ދުވަހު ހަމާސް އިން ބުނެފިއެވެ.

ޖުލައި މަހުގެ 31 ވީ ބުދަ ދުވަހުގެ ފަތިހުގެ ވަގުތެއްގައި ހަނިއްޔާ އަވަހާރަކޮށްލީ، އީރާނުގެ ރައީސް މަސްއޫދު ޕެޒެޝްކިއާން ހުވައި ކުރެއްވުމުގެ ރަސްމިއްޔާތައް ވަޑައިގެން އުޅުވަނިކޮށްނެވެ.

ޔަހްޔާ ސިންވާރް އަކީ ހަމާސްގެ އަސްކަރީ ގޮފީގައިވެސް ޚިދުމަތް ކުރައްވާފައިވާ އަދި އިޒްރޭލުގެ ޖަލުގައި 20 އަހަރަށް ވުރެ ގިނަ ދުވަސް ހޭދަ ކުރައްވާފައިވާ ފަރާތެކެވެ.

އިޒްރޭލުން ޔަހްޔާ ސިންވާރް ދޫކޮށްލީ 2011 ވަނަ އަހަރު ކުށްވެރިން ބަދަލު ކުރުމުގެ ތެރޭގައެވެ.

2017 ވަނަ އަހަރުން ފެށިގެން ގާޒާގައި ހުންނަ ހަމާސްގެ އެންމެ އިސް ލީޑަރުގެ ގޮތުގައި ހުންނެވި ޔަހްޔާ ސިންވާރް އަކީ އިޒްރޭލުގެ "މޯސްޓް ވޯންޓެޑް ލިސްޓް" ގެ އެންމެ ކުރީގައި ހިމެނޭ ފަރާތެވެ. އިޒްރޭލުން ދެކޭ ގޮތުގައި އޮކްޓޯބަރ 7 ގައި ހަމާސް އިން އިޒްރޭލަށް ދިން ހަމަލާގެ މާސްޓަރމައިންޑް އަކީ ސިންވާރް އެވެ.

ބައެއް މީޑިއާ ރިޕޯޓްތައް ބުނާ ގޮތުގައި އޮކްޓޯބަރ 7 ގެ ހަމަލާގެ ފަހުން އޭނާ އާންމު އެއްވެސް ތާކުން ފެނިފައެއް ނުވެއެވެ. އެމެރިކާގެ ޚާރިޖީ ވަޒީރު އެންތަނީ ބްލިންކަން ވިދާޅުވެފައިވަނީ ސިންވާރް އުޅުއްވަނީ ބިމު އަޑީގައި ހަދާފައިވާ ދިހަބުރީގެ އިމާރާތެއްގައެވެ.

2015 ވަނަ އަހަރު އެމެރިކާ އިން "އިންޓަރނޭޝަނަލް ޓެރަރިސްޓް" ލިސްޓް ގައި ސިންވާރް ހިމަނާފައިވެއެވެ.

އުމުރުން 61 އަހަރުގެ ސިންވާރު އުފަންވެވަޑައިގަތީ ގާޒާގެ ޚާން ޔޫނިސްގެ ރެފިއުޖީ ކޭމްޕެއްގައެވެ.

އޭނާ އަކީ ކުރިން އަލް-މަޖްދް ސެކިއުރިޓީ ގްރޫޕްގެ ވެރިޔާއެވެ. އެ ގްރޫޕްގެ މައިގަނޑު މަސައްކަތަކީ އިޒްރޭލަށް ވާގިވެރިވާ ފަލަސްތީން މީހުން ދެނެގަނެ އެމީހުން ނައްތާލުމެވެ.

ހަނގުރާމައިގެ ޖަރީމާތައް ހިންގުމުގެ ތުހުމަތުގައި އިންޓަރނޭޝަނަލް ކްރިމިނަލް ކޯޓް (އައިސީސީ) އިން ހައްޔަރު ކުރުމުގެ އަމުރު ހޯދުމަށް ހުށަހަޅަން ބޭނުންވާ ފަލަސްތީނުގެ އިސް އޮފިޝަލުންގެ ތެރޭގައި ސިންވާރް ހިމަނާފައިވާކަން ފާހަގަ ކުރެވެއެވެ.

އިޒްރޭލުން ގާޒާ ގައި ހިންގަމުންދާ ހަނގުރާމަ އަށް 8 މަސް ފުރި ފަލަސްތީނުން ޝަހީދު ކޮށްލި މީހުންގެ އަދަދު 40،000 އާ ގާތް ކޮށްފައި ވާއިރު އަދި ލައްކަ އަކާ ގާތް ކުރާ އަދަދަކަށް މީހުން ޒަޚަމްވެ، 2.3 މިލިއަން މީހުން ވަޒަނުން ބޭރުކޮށް ލުމުގެ އިތުރުން ހަމާސް ނައްތާލާނެ ކަމަށް ބުނެ އެ ޖަމާއަތުގެ އިސް އޮފިޝަލުންނަށް މަރުގެ ހަމަލާތައް ދެމުން ދިޔަ ނަމަވެސް ހަމާސް ގެ ހިތްވަރަށް ބަދަލެއް ނައިސް ގެންދަނީ އިޒްރޭލުގެ ސިފައިންނާ ކުރިމަތިލާ ހަރަކާތްތެރި ވަމުންނެވެ. އެ ހިތްވަރުގެ ފަހަތުގައި ހުންނެވި އެންމެ މުހިންމު އެއް ފަހުލަވާނަކީ ޔަހްޔާ ސިމްވާރް ކަމަށް މަސްރަހް ދިރާސާ ކުރާ ފަރާތްތަކުން ދެކެއެވެ.