ބްރެޒިލް ސެމީއަށް، މާޓާގެ އުއްމީދަށް ދިރުން!

އޮލިމްޕިކްސް ފުޓްބޯޅަ މުބާރާތުގެ އަންހެން ޑިވިޝަންގެ ސެމީފައިނަލުން ބްރެޒިލް ޖާގަ ހޯދުމުން, މާޓާގެ އުއްމީދަށް ދިރުން ލިބިއްޖެ އެވެ.

އޮލިމްޕިކްސްއަށް ފަހު ގައުމީ ޓީމަށް ކުޅުން ހުއްޓާލަން ނިންމައިގެން ހުރި ބްރެޒިލްގެ ކެޕްޓަން މާޓާ އަށް ކްއާޓާ ފައިނަލް މެޗުގައި ނުކުޅެވުނެވެ. އެއީ އޭގެ ކުރިން މެޗުގައި ދެއްކި ރަތްކާޑްގެ ސަބަބުންނެވެ. އެހެންކަމުން ފްރާންސް އަތުން ބްރެޒިލްއަށް މޮޅުނުވެވުނު ނަމަ މާޓާގެ ކެރިއަރު ނިންމާލަން ޖެހޭނީ ރަތް ކާޑަކުންނެވެ. އެކަމަކު ބްރެޒިލް ޓީމުން ވަނީ 1-0 ން ފްރާންސް ބަލިކޮށް, މާޓާގެ ކެރިއަރު އުފާވެރިކޮށް ނިންމާލުމުގެ ފުރުޞަތު ހޯދައިދީފައެވެ. ބްރެޒިލް ގައުމީ ޓީމާއެކު ދެފަހަރު އޮލިމްޕިކްސްގެ ރިހި މެޑަލް ހޯދި ނަމަވެސް މާޓާއަށް ރަން މެޑަލް އެޅުވުމުގެ ފުރުޞަތެއް ނުލިބެއެވެ. ސެމީފައިނަލްގައި ބްރެޒިލް ވާދަކުރަން ޖެހޭނީ ސްޕެއިންއާއެވެ. ބްރެޒިލް ކްއާޓާ ފައިނަލަށް ދަތުރުކުރީވެސް ހަނި ފުރުޞަތަކުންނެވެ. މާޓާއަށް ރަތްކާޑް ދެއްކީ ގްރޫޕް ސްޓޭޖްގައި ސްޕެއިން އަތުން ބްރެޒިލް ބަލިވި މެޗުގައެވެ. މާޓާ އަކީ ދުނިޔޭގެ މޮޅު ކުޅުންތެރިޔާގެ މަގާމް 6 ފަހަރު ހޯދާފައިވާ ލެޖެންޑެކެވެ.

ދެވަނަ ސެމީފައިނަލްގައި ވާދަކުރާނީ އެމެރިކާއާއި ޖަރުމަނެވެ. ޖަރުމަނު ސެމީފައިނަލަށް ދަތުރުކުރީ އެންމެ ފަހުގެ ޗެމްޕިއަން ކެނަޑާއާއެވެ. ކެނަޑާ ގްރޫޕް ސްޓޭޖްގެ ހުރިހާ މެޗެއް ކާމިޔާބުކުރި ނަމަވެސް ޑްރޯން އަރުވައިގެން ސްވިޒަރލެންޑްގެ ޕްރެކްޓިސް ބެލި މައްސަލައިގައި 6 ޕޮއިންޓް އުނިކުރުމުން ކްއާޓާ ފައިނަލަށް ދަތުރުކުރީ 3 ޕޮއިންޓާއެކުއެވެ.