ބާރުވެރިކަން ލިބޭ ކޮންމެ ފަހަރަކު ލާމަރުކަޒީ ނިޒާމް ބަދަލުކޮށްގެން ނުވާނެ، މި ސަރުކާރަށް ވެސް ލާމަރުކަޒީ ނިޒާމް ހަޖަމް ނުވޭ - ޢަފޫރު

ބާރުވެރިކަން ލިބޭ ކޮންމެ ފަހަރަކު ލާމަރުކަޒީ ނިޒާމް ބަދަލުކުރުން ބަލައިނުގަނެވޭ ކަމަށާއި، މި ސަރުކާރަށް ވެސް ލާމަރުކަޒީ ނިޒާމް ހަޖަމް ނުވާކަމަށް މަޖިލީހުގެ ހަނިމާދޫ ދާއިރާގެ މެމްބަރު އަބްދުލްޢަފޫރު މޫސާ ވިދާޅުވެއްޖެއެވެ.

ބުދަ ދުވަހު ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން ޢަފޫރު ވަނީ ސަރުކާރު ހިންގާ ގޮތަށް ވަރަށް ބޮޑަށް ފާޑު ވިދާޅުވެފައެވެ. ދައުލަތުގެ ޚަރަދުތައް 50 މިލިއަން ރުފިޔާ އަށް އަރާފައިވާ އިރު އޭގެ ތެރެއިން 42 ބިލިއަން ރުފިޔާ އަކީ ރިކަރަންޓް ޚަރަދުކަމަށް އޭނާ ވިދާޅުވިއެވެ. ދައުލަތުގެ މިނިސްޓްރީތައް ހިންގަންކުރާ ޚަރަދުތަކުން ނަތީޖާ ހާސިލްކުރެވެނީ މަދު ތަނަކުން ކަމަށް ވެސް ޢަފޫރު ވިދާޅުވިއެވެ. ދައުލަތުގައި އެތައް މުވައްޒަފުންނެއް ތިބި އިރު ގިނަ މުއައްސަސާތަކުގައި މެނޭޖްމެންޓް އޮޑިޓެއްް ވެސް ހެދިފައި ނެތް ކަމަށާއި، ރަނގަޅަށް ވުޒާރާތައް ހިންގުމަށް ބޭނުންވަނީ ކިހާއަދަދެއްގެ މުވައްޒަފުންކަން ސާފުކޮށް އެނގެން ނެތް ކަމަށް އޭނާ ވަނީ ވިދާޅުވެފައެވެ. ވުޒާރާތަކުގެ ބަޖެޓް އިތުރުކުރަން ފޮނުވާ އިރު ރައްޔިތުންގެ ފައިސާ ހޭދަކުރާ ގޮތް ބެލެވިފައި ނެތް ކަމަށް އޭނާ ވިދާޅުވިއެވެ. މާލިއްޔަތު ކޮމިޓީގައި ގިނަ ދުވަސްތަކެއް ހޭދަކުރެއްވި ބޭފުޅެއްގެ ހައިސިއްޔަތުން އެކަން ވަރަށް ރަނގަޅަށް ފެނިވަޑައިގެންފައިވާ ކަމަށް އޭނާ ވަނީ ވިދާޅުވެފައެވެ.

ބައިއިލެކްޝަންތައް މަދުކުރުމަށް ތާއީދުކުރައްވާކަން ހާމަކުރައްވާ ޢަފޫރު ވިދާޅުވީ 183 ދުވަހުގެ ތެރޭގައި ބައި އިލެކްޝަންތައް ބޭއްވުމަކީ ރަނގަޅު ނިންމުމެއް ކަމަށެވެ. ދައުލަތުގެ ޚަރަދު ކުޑަ ކުރަން ކުރަން ޖެހޭ ކަންކަން ހުރި ކަމަށް އޭނާ ވިދާޅުވިއެވެ. ލާމަރުކަޒީ ނިޒާމަށް ބަދަލު ގެންނަ ގެނައުމަށް އިޝާރާތްކުރައްވާ އޭނާ ވިދާޅުވީ ވެރިންގެ މުށުގައި އޮންނަ ބާރު ދޫކޮށްލުމަކީ އަބަދުވެސް އުދަނގޫ ކަމެއް ކަމަށެވެ. ލާމަރުކަޒީ ނިޒާމު ގެނެސްގެން މަސައްކަތް ކުރަމުންދާތާ ދުވަސްތަކެއް ވި ނަމަވެސް އެ ނިޒާމް ހަޖަމްކުރެވޭ ސަރުކާރެއް ނާންނަކަމަށް އޭނާ ވަނީ ވިދާޅުވެފައެވެ. ރާއްޖެ އަށް އަންނަނީ އެ ނިޒާމް ރަނގަޅަށް ޤަބޫލު ނުކުރާ ސަރުކާރުތައް ކަމަށް އޭނާ ވިދާޅުވިއެވެ. މީގެ އިތުރުން ކައުންސިލްތައް މަދުކުރުމާއި ކައުންސިލްތަކުގެ މުވައްޒަފުން މަދުކުރުމަކީ ހައްލެއް ނޫން ކަމަށް އޭނާ ވަނީ ވިދާޅުވެފައެވެ.

ނިޒާމަށް ބަދަލު ގެންނަނީ ސަރުކާރުގެ ކޮންޓްރޯލް އިތުރުކުރުމަށް ކަމަށް އޭނާ ވަނީ ތުހުމަތުކުރައްވާފައެވެ.