އެޗްއާރުސީއެމްގެ މެމްބަރުކަމަށް އިލެކްޝަންސް ކޮމިޝަން (އީސީގެ) ކުރީގެ ނައިބު ރައީސް އިސްމާއިލް ހަބީބު އައްޔަނު ކުރެއްވުމަށް ރައްޔިތުންގެ މަޖިލީހުން ރުހުން ދީފިއެވެ.
ބުދަ ދުވަހު މަޖިލިސް ޖަލްސާގައި ވަނީ އެ މަޤާމަށް ހަބީބު އައްޔަނު ކުރަން ފެންނަކަމަށް ނިންމައި ހިއުމަން ރައިޓްސް އެންޑް ޖެންޑަރ ކޮމިޓީން އެކުލަވާލާފައިވާ ރިޕޯޓަށް ވޯޓަށް އަހާފައެވެ.
މި ވޯޓުގައި ބައިވެރިވެވަޑައިގެންނެވި 77 މެމްބަރުންގެ ތެރެއިން 74 މެމްބަރަކު ވަނީ ހަބީބަށް ރުހުންދޭން ފެންނަކަމަށް ވޯޓު ދެއްވާފައެވެ. ރުހުންދޭން ނުފެންނަކަމަށް ވޯޓު ދެއްވީ 3 މެމްބަރެކެވެ.
އެ މަޤާމަށް ހަބީބު އައްޔަނު ކުރުމަށް ރުހުން ދީފައި މިވަނީ ހަބީބަށް ރުހުން އޮތްތޯ ބެއްލެވުމަށް އެދިވަޑައިގެން ރައީސުލްޖުމްހޫރިއްޔާ މަޖިލީހަށް ފޮނުއްވެވި ސިޓީ މަޖިލީހުން ބެލުމަށްފަހު، ކޮމިޓީއަށް ފޮނުވައި ކޮމިޓީން އިންޓަވިއު ކޮށްގެންނެވެ.
