ބައިޑްން ރިޔާސީ ރޭސް ނިންމާލައްވައިފި

އެމެރިކާގެ ރައީސް ޖޯ ބައިޑްން އެމެރިކާގެ ރިޔާސީ އިންތިޚާބުން ވަކިވެ ވަޑައިގެންނެވިކަން އިއުލާން ކުރައްވައިފިއެވެ.

ބައިޑްން ވިދާޅުވީ، އެއީ އޭނާގެ ޕާޓީ އަށް ވެސް އަދި ގައުމަށްވެސް އެންމެ ފައިދާ ހުރި ގޮތް ކަމަށް ދެކެވަޑައިގަންނަވާ ކަމަށެވެ.

ސޯޝަލް މީޑިއާ ގައި ބައިޑްން މި ކަމާ ގުޅޭ ގޮތުން ޕޯސްޓް ކުރެއްވި ސިޓީގައި ރައީސް ކަމުގެ މަގާމް އަދާ ކުރެއްވުމަށް ލިބިވަޑައިގެންނެވި ފުރުސަތަކީ އޭނާ އަށް ލިބިވަޑައިގެންނެވި އެންމެ ބޮޑު ޝަރަފް ކަމަށް ވިދާޅުވެފައިވެއެވެ.

އުމުރުފުޅުގެ ސަބަބުން މަގާމަށް ފިޓް ނޫން ކަމަށާއި އިންތިޚާބު ދޫކޮށްލެއްވުމަށް ޑިމޮކްރަޓިކް ޕާޓީގެ އިސް އެތައް ފަރާތަކުން ބުނަމުން ދިޔަ ނަމަވެސް އެ ވާހަކަތަކަށް މިހާތަނަށް މާބޮޑު ސަމާލު ކަމެއް ބައިޑްން ދެއްވާފައެއް ނުވެއެވެ.

ހުސްވި ހަފްތާގައި ކޮވިޑް އަށް ފައްސިވުމާއެކު ޑެލަވެއަރ ގައި ހުންނަ ބައިޑްންގެ އަމިއްލަފުޅު ގެކޮޅުގައި އެކަހެރިކޮށް ހުންނެވި ބައިޑްން ހުކުރު ދުވަހު ވިދާޅުވެފައިވަނީ ފެށޭ ހަފްތާ ގައި ކެމްޕޭނަށް އެނބުރި ވަޑައިގަންނެވުމުގެ އުއްމީދުގައި ހުންނެވި ކަމަށެވެ.