މަނިކުފާނެވެ! ލާމަރުކަޒީ ނިޒާމުގެ ތެރޭގައި އުޅުއްވިޔަސް، ނިޒާމަށް މަނިކުފާނު ބީރައްޓިއްސެވެ!

ޕީޕީއެމް، ޕީއެންސީ، މި ވެރިން ލާމަރުކަޒީ ނިޒާމާއި ބީރައްޓެހި ވާހަަކައަކީ އިއްޔެއަކު މިއަދަކު ދައްކާ ވާހަކައެއް ނޫނެވެ. އެއީ އަބަދުވެސް ދައްކާ ވާހަކައެކެވެ. ސަބަބެއް ވެސް ނެތި އެއް ނޫނެވެ. މިވެރިން ވެރިކަމަށް އަންނަ ކޮންމެ ފަހަރަކު ކައުންސިލްތަކުން ދައްކަނީ މިވެރިން މި ނިޒާމަށް ނުފަރިތަ ވާހަކައެވެ. އަޑު ނާހާ ވާހަކައެވެ. ބޯހަރު ވާހަކައެވެ. ކަންކަން ނިންމުމުގައި ކައުންސިލްގެ ބަސް ނުހޯދާ ވާހަކައެވެ.

މި ވެރިކަމުގައި އެކަން ތަފާތުވާނެ ކަމަށް ބުނެ ދެއްކި ހުއްޖަތަކަށް ދެއްކި ވާހަކަ އަކީ އެ މަނިކުފާނުގެ ތަޖުރިބާއެވެ. ތެދެކެވެ. ސިޓީ ކައުންސިލްގެ މޭޔަރެއްގެ ގޮތުގައި އެ މަނިކުފާނު ވެރިކަމަށް ވަޑައިގަންނަވަންދެން މަޤާމު ފުރިހަމަކުރެއްވިއެވެ. އެހެންވެގެން އެ ނިޒާމަށް ލީބި ޖެހެންޏާ އެކަން އޮންނަންވާނީ އެހެންނެވެ. އެކަމަކު ކަން އޮތީ އެހެންތޯ މިއީ ކޮށްލުން މުހިންމު ސުވާލެކެވެ. މި ނިޒާމުގެ ތެރޭގައި ރައީސް މަނިކުފާނު އުޅުއްވުމުގެ ރާހަތެއް ވާނީ އެ ކައުންސިލަރުންގެ އިހުސާސްތައް ދަންނަ ނަމަތާއެވެ. މާލެ ސިޓީގެ މޭޔަރކަމަށް މަނިކުފާނުގެ ބަދަލުގައި ހޮވިވަޑައިގަތް ބޭފުޅާ މަނިކުފާނާއި ބައްދަލުކުރައްވަން އެދިގެން 3 މަސް ދުވަސްވީއެވެ. އިޖާބައެއް ނުދެއްވައެވެ. މިއީ އިހަށް ދުވަހާއި ޖެހެންދެން ހުރި ކައުންސިލްގެ އާ މޭޔަރާއި މެދު މަނިކުފާނުގެ ޢަމަލުތައް ހުރި ގޮތެވެ. މިއީ ސީދާ ގޮތުން މަނިކުފާނާއި ގުޅިފައި އޮތް ކަމެކެވެ.

ދެން އޮތީ ނިންމާ ނިންމުންތަކުގެ ވާހަކައެވެ. އަތޮޅުތަކުގެ ބިމާއި، ކަނޑާއި ފަޅު ބޭނުންކުރުމުގައި ކައުންސިލާއި ރައްޔިތުން ނުރުހޭ ގޮތަށް ކަންކަން ކުރާތީ މުޒާހަރާކުރަނީ ކިތައް ރަށުގައި ތޯއެވެ؟ އަބަދުވެސް ބަލަނީ ރުހޭ ބަޔަކު ލައްވާ ކަންކަން ފަރުޖައްސާލެވޭތޯއެވެ. ގިނަ ބަޔަކު އެދޭ ގޮތަށް އިޚުތިރާމްކުރުމެއް ނެތެވެ. ބާރުތައް ދޫކޮށްލައްވަން ޖެހިލުން ވަނީއެވެ. ތިމަން މަނިކުފާނު ބޭނުންފުޅުވާ ގޮތް ނޫން ގޮތަކަށް ކަންކަން ދާ ނަމަ އެކަން ހަޖަމްކުރަން ވެސް އުނދަނގުލީއެވެ.

ދެން މިހާރު ދައްކަވާ ވާހަކައަކީ ކައުންސިލްތައް ކުޑަ ކުރާ ވާހަކައެވެ. އެއް ފަހަރު ދައްކަވާފައި ނިންމަވާލައްވަނީކީ ނޫނެވެ. މިހާރު ކޮންމެ ޕްލެޓްފޯމެއްގައި ތަކުރާރުކުރައްވަނީ އެއް ވާހަކައެކެވެ. ރައްޔިތުން ތަމްސީލްކުރަން ގިނަ މީހުން ކައުންސިލްގައި ތިބެން ނުޖެހޭ ވާހަކައެވެ. ކައުންސިލްގެ ސައިޒްކުޑަކުރަން ޤާނޫނަށް އިސްލާހު ހުށަހަޅުއްވާނެކަމުގެ ވާހަކައެވެ. ގިނަ އަދަދެއްގެ ކައުންސިލަރުން ތިއްބެވުމުން ދައުލަތުގެ ބަޖެޓުން އެ ފަރާތްތަކަށް މުސާރަ ދިނުމަށް ވަރަށް ބޮޑު ހޭދައެއް ކުރަން ޖެހޭ ކަަމަށް ވިދާޅުވެ ތަކުރާރުކޮށް އެ ޝަކުވާވެސް ކުރައްވަނީއެވެ. އެއީ އެންމެ އެކަށީގެންވާ ގޮތް ކަމަށް ޤަބޫލު ނުކުރައްވާ ކަމަށް ރައީސް މުއިއްޒު ވިދާޅުވިއެވެ.

އެއީ މަނިކުފާނުގެ ޚިޔާލެވެ. އެކަމަކު އެ ވާހަކަތައް އާއްމުންނަށް ތިލަކުރުމުގެ ކުރިން ކައުންސިލްތަކުގެ ރަސްމީ ބަހެއް ހޯއްދެވީމުތޯއެވެ. އެ ބޭފުޅުންގެ ޚިޔާލާއި މަޝްވަރާ ހޯއްދެވީމުތޯއެވެ. ޖަވާބު އަޅުގަނޑަށް ވެސް މަނިކުފާނަށް ވެސް ސާފެވެ. މި ދަންނަވަނީކީ މަނިކުފާނު ރުހޭ ދެތިން ގާތް ކައުންސިލަރުންގެ ވާހަކައެއް ނޫނެވެ. ކައުންސިލްތައް ނުކަތާ މިންވަރަށް ބޮޑުވެފައިވާ ކަމަށާއި އެއީ ޚަރަދު ބޮޑު ނިޒާމެއް ކަމަށް ވިދާޅުވާ އިރު އެއްކޮޅުން ސިޔާސީފަތްކޮޅު ދެއްވާ މީހުން ގިނަ ކުރައްވާފައި ކައުންސިލަރުން ގިނަ ވާހަކަ ދެއްކީމައި މިއީ ދެން ބޮޑު ޖޯކެއް ނޫންތޯއެވެ. މީގެ އިތުރުން ރަށެއްގެ 300 މީހުން 500 މީހުންގެ ރަށެއްގައި 3 މީހުން 5 މީހުން ހޮވުމަކީ އެންމެ ރަނގަޅު ގޮތް ނޫން ކަމަށް ވިދާޅުވާ އިރު ސިވިލް ސަރވިސް މުވައްޒަފުންނާއި އެއްވަރަށް ސިޔާސީ ބޭފުޅުން ތިބި އިދާރާތައް ހުރުން މަނިކުފާނަށް ހަމައޯކޭއެވެ.

އެހެންވީމަ މިއީ އަދި ނިޒާމުގެ އެކަނި މައްސަލައަކަށް ވެގެން މަނިކުފާނު ދައްކަވާ ވާހަކައެއް ހެނެއް ހިއެއް ނުވެއެވެ. ނޫން ނަމަ ކައުންސިލްތަކުގެ ވާހަކަދައްކަވާނީ އެ ކައުންސިލްތަކުގެ ސީދާ ބަސް ބުނެވޭ ގޮތަށެވެ. އެކަން އެ ވެރިންނަށް ސަރޕްރައިޒްއަކަށް ނުވީހެވެ. ދެތިން އަހަރު މޭޔަރުކަން ކުރެއްވިއަަސް ލާމަރުކަޒީ ނިޒާމަށް ވުރެ ބޮޑަށް މަނިކުފާނުގެ އަދިވެސް ހުރީ މަރުކަޒީ ވިސްނުން ކަމަށް ވެދާނެއެވެ. ވެރިމީހާ ބުނާ ބަހަކީ ފަހު ބަސް ކަމަށް ދެކޭ ދެކުން އަދިވެސް ދޫކޮށްލަން އުނދަގުލީތޯއްޗެކެވެ. ބާރުތައް ދޫކޮށްލުމަކީ ވެސް ލާމަރުކަޒީ ނިޒާމުގެ އުކުޅެކެވެ. އެއީ ބާރުވެރިކަން ޖަމާކުރަން ބޭނުންވާ މީހުން ނިކަން ބިރު ގަންނާނެކަމެކެވެ.