ހަ ދާއިރާގެ ބައި-އިލެކްޝަންގައި ވޯޓުލާފައިވަނީ 26.91 އިންސައްތަ މީހުން، ތަރުހީބު ކުޑަ: އީސީ

ހަ ދާއިރާގެ ބައި-އިލެކްޝަންގައި ވޯޓުލާފައިވަނީ ވޯޓު ލުމުގެ ހައްގު ލިބިފައިވާ 26.91 އިންސައްތަ މީހުން ކަމަށް އިލެކްޝަން ކޮމިޝަން (އީސީ)އިން ބުނެފިއެވެ.

ހޮނިހިރު ދުވަހުގެ ހެނދުނު 8:00ން ފެށިގެން ހަވީރު 4:00ށް ވޯޓުލުން ވަނީ ކުރިއަށް ގެންގޮސްފައެވެ.

އިންތިޚާބު ބޭއްވި ދާއިރާތަކަކީ ހެންވޭރު ހުޅަނގު ދާއިރާ، މައްޗަންގޮޅި މެދު ދާއިރާ، ހުޅުމާލެ ދާއިރާ، ކުޅުދުއްފުށި އުތުރު ދާއިރާ، ރަސްމާދޫ އަންހެނުންނަށް ހާއްސަ ކޮށްފައިވާ ގޮނޑި އަދި ބިލެތްދޫ ކައުންސިލްގެ ރައީސް އެވެ.

އީސީން ބުނީ ވޯޓުގެ ހުރިހާ ކަމެއް ވެސް ކުރިއަށްދިޔައީ ވަރަށް ފުރިހަމައަށް ކަމަށެވެ. ރައްޔިތުންގެ ފަރާތުން ފުރިހަމަ އެއްބާރުލުމެއް ލިބިގެންދިޔަ ކަމަށެވެ.

ވޯޓާސްގެ ޓާންއައުޓް ދަށްވުމާއި ގުޅިގެން އެކަމުގެ ކަންބޮޑުވުން ކޮމިޝަނުން ފާޅުކޮށްފައިވެއެވެ.

އީސީން ބުނީ ހޮނިހިރު ދުވަހުގެ 4:00އާ ހަމައަށް ވޯޓުލާފައިވަނީ 3528 މީހުންނެވެ. އެއީ އަންހެން 1647 މީހުން، ފިރިހެން 1881 މީހުންނެވެ. މުޅި ޖުމްލަ ވޯޓުނުލާ މީހުންގެ އަދަދަކީ 9584 އެކެވެ. އެއީ 73.09 އިންސައްތައެވެ.

ވޯޓުލުމުގެ ހައްގު 13112 މީހުންނަށް ލިބިގެންވެއެވެ.

ހަ ދާއިރާއެއްގެ ބައި އިލެކްޝަން އީސީން ކުރިއަށް ގެންދިޔައިރު، ވޯޓުލާން އަންނަ މީހުންނަށް ފަސޭހައިން ވޯޓުލެވޭ އިންތިޒާމްތައް ވަނީ ހަމަޖައްސާފައެވެ.

އެސަރަހައްދުގައި އީސީގެ ގިނަ އޮފިޝަލުން ހަރަކާތްތެރިވެފައިވެއެވެ. އަދި ވޯޓުލުން ކުރިއަށް ދިޔަ ވަގުތު އެސަރަހައްދުތަކުގެ މަސްލަހަތު ބަލެހެއްޓުމަށް ފުލުހުން ވެސް ވަނީ ހަރަކާތްތެރިވެފައެވެ.