ފީފާ ވޯލްޑް ކަޕް 2026 ވަނަ އަހަރު ބޭއްވުމަށް މޮރޮކޯއިން ބިޑުކޮށްފިއެވެ.

އެފްރިކާގެ ގައުމެއް ކަމަށްވާ މޮރޮކޯގެ ފުޓުބޯޅަ އިދާރާއިން ވަނީ އެގައުމުގައި 2026 ވަނަ އަހަރުގެ ވޯލްޑް ކަޕް ބޭއްވުމަށް ބިޑުކޮށްފައިވާކަން ކަށަވަރު ކޮށްދީފައެވެ.

މިހާތަނަށް 2026 ވަނަ އަހަރުގެ ވޯލްޑް ކަޕް ބޭއްވުމަށް ބިޑު ކޮށްފައި ވަނީ އުތުރު އެމެރިކާގެ ތިން ގައުމެއް ގުޅިގެންނެވެ. މިގޮތުން ކެނެޑާ، މެކްސިކޯ އަދި އެމެރިކާއިން ވަނީ އެތިން ގައުމު ގުޅިގެން ވޯލްޑް ކަޕް ބޭއްވުމަށް މިދިޔަ އަހަރުގެ ޑިސެމްބަރު މަހު ބިޑުކޮށްފައެވެ. މިއީ ފީފާ ވޯލްޑް ކަޕްގެ ތާރީހުގައި ތިން ގައުމެއް ގުޅިގެން ވޯލްޑް ކަޕް ބޭއްވުމަށް ބިޑު ކުރި ފުރަތަމަ ފަހަރެވެ.

ފީފާގެ ރޮޓޭޝަނަލް ޕޮލިސީގެ ދަށުން ވޯލްޑް ކަޕް ބޭއްވުމުގައި ހުރިހާ ބައްރުތަކެއް ހަމަކުރަންޖެހެއެވެ. އެގޮތުން 2026 ވަނަ އަހަރުގެ ވޯލްޑް ކަޕް ބޭއްވުމަށް ފުރުސަތު ލިބެނީ އުތުރު އެމެރިކާ، ދެކުނު އެމެރިކާ، އޯޝޭނިއާ ނުވަތަ އެފްރިކާގެ ގައުމުތަކަށެވެ. އެ އަހަރުގެ ވޯލްޑް ކަޕްގައި 48 ޓީމު ވާދަކުރާނެ ކަމަށް ފީފާއިން ޖެނުއަރީ މަހު ވަނީ ބުނެފައެވެ.

އެފްރިކާގެ ގައުމެއްގައި މީގެކުރިން ވޯލްޑް ކަޕް ބާއްވާފައި ވަނީ 2010 ވަނަ އަހަރުއެވެ. އެފަހަރުގެ ވޯލްޑް ކަޕް ބާއްވާފައި ވަނީ ދެކުނު އެފްރިކާގައެވެ.