ޤައުމީ ކެރިއަރު ނިންމާލީ، ކުރިން ވެސް އުންމީދު ކޮށްފައިވާ ގޮތަށް ކަމަށް އާޖެންޓީނާގެ އެޓޭކިން މިޑްފީލްޑަރު އެންހެލް ޑި މާރިއާ ބުނެފި އެވެ.
އުމުރުން 36 އަހަރުގެ ޑި މާރިއާ ނިންމާފައި އޮތީ މިއަހަރު އެމެރިކާގައި ކުރިއަށް ދިޔަ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) އަށް ފަހު އާޖެންޓީނާ ޤައުމީ ޓީމުން ރިޓަޔާ ކުރުމަށެވެ.
އެއާއެކު އާޖެންޓީނާ ޤައުމީ ޓީމާ އެކު ޑި މާރިއާ ކުޅޭނެ އެންމެ ފަހު މެޗަކަށްވެފައި އޮތީ، ދެކުނު އެމެރިކާ ސަރަހައްދުގެ ފުޓުބޯޅަ މުބާރާތުގެ ފައިނަލްގައި ކޮލަމްބިއާއާ ދެކޮޅަށް ކުޅުނު މެޗެވެ. އެ މެޗުގައި ޑި މާރިއާ ވަނީ ފުރަތަމަ 11 ގައި ހިމެނިގެން ކުޅެފަ އެވެ. ނަމަވެސް މެޗުގެ އިތުރު ވަގުތުގެ ދެވަނަ ހާފުގައި ޑި މާރިއާ ވަނީ ބަދަލުކޮށްފަ އެވެ.
ކޮލަމްބިއާއާ ދެކޮޅަށް ކުޅުނު މެޗު ކާމިޔާބުކޮށް، އާޖެންޓީނާ އިން މުބާރާތުގެ ތަށި އުފުލާލުމަށްފަހު ވާހަކަ ދައްކަމުން ޑި މާރިއާ ބުނީ މިފަދަ ގޮތަކަށް ޤައުމީ ޓީމުން ރިޓަޔާ ކުރުމަކީ އޭނާގެ ވަރަށް ބޮޑު ހުވަފެނަކަށްވި ކަމަށެވެ. އެކަން ޙާސިލު ކުރެވުމުން ވަރަށް ބޮޑަށް އުފާވެފައި ހުރި ކަމަށް ވެސް ޑި މާރިއާ ބުންޏެވެ. ޑި މާރިއާ ފާހަގަ ކުރި ގޮތުގައި އާޖެންޓީނާ އަކީ އޭނާ އެންމެ ލޯބިވާ، އޭނާގެ ފަޚުރުވެރި ޤައުމެވެ. އަދި އާޖެންޓީނާގެ ސަޕޯޓަރުންގެ ފަރާތުން އޭނާ އަށް ލިބުނު ސަޕޯޓާއި، ލޯތްބަށް ޝުކުރު އަދާ ކުރާ ކަމުގައި ވެސް ޑި މާރިއާ ބުންޏެވެ.
ޤައުމީ ޓީމުން ރިޓަޔާ ކުރަން ނިންމި ނަމަވެސް، ކުލަބު ފުޓުބޯޅަ އިން ޑި މާރިއާ ރިޓަޔާ ނުވާނެ އެވެ. މިހާރު އޭނާ ކުޅެމުން އަންނަ ބެންފީކާ އާއެކު ސޮއި ކޮށްފައިވާ އެއްބަސްވުމުގެ މުއްދަތު މި ހިނގާ ޖުލައި މަހުގެ ތެރޭގައި ހަމަ ވާނެ އެވެ. އެހެން ނަމަވެސް، އެ ކުލަބުގެ އެއްބަސްވުން އިތުރު އެއް އަހަރު ދުވަހަށް ޑި މާރިއާ އިތުރު ކުރާނެ އެވެ. އެހެންކަމުން 2025 ވަނަ އަހަރުގެ ޖުލައި މަހުގެ ނިޔަލަށް އޭނާ އެ ކުލަބުގައި ކުޅޭނެ އެވެ.
ޑި މާރިއާ އަށް އާޖެންޓީނާ ޤައުމީ ޓީމުން ޖާގަ ލިބުނީ 2008 ވަނަ އަހަރު އެވެ. އޭގެ ފަހުން އޭނާ ވަނީ ޤައުމީ ޓީމަށް 145 މެޗު ކުޅެދީ 31 ލަނޑު ޖަހައިފަ އެވެ. އާޖެންޓީނާގެ ސީނިއާ ޓީމާއެކު ޑި މާރިއާ ވަނީ ހަތަރު ތައްޓެއް ވެސް ކާމިޔާބު ކޮށްފަ އެވެ. އެއީ 2021 ވަނަ އަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތުގެ އިތުރުން، ފައިނަލިސިމާ، 2022 ވަނަ އަހަރުގެ ފީފާ ވޯލްޑް ކަޕް އަދި މިއަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތެވެ.
