ހުޅުމާލެ ބީޗު ސައިޑުން 1200-1502 އަކަފޫޓުގެ 11 ބިމެއް ބީލަމުގައި ވިއްކާލަން އިޢުލާންކޮށްފި
އިތުރު މައުލޫމާތު އެޗްޑީސީގެ ހޮޓްލައިން 1516ން ލިބޭނެ
އެޗްޑީސީގެ ބޭރުން ނަގާފައިވާ ފޮޓޯ އެއް
ހުޅުމާލެ ބީޗު ސައިޑުން 11 ބިމެއް ބީލަމުގައި ވިއްކާލަން އިޢުލާންކޮށްފިއެވެ.
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިންކުރި އިޢުލާނެއްގައި ބުނެފައި ވަނީ އެ ފުރުސަތު ހުޅުވާލާފައި ވަނީ އާދިއްތަ ދުވަހުން ފެށިގެން ކަމަށެވެ. އެ އިޢުލާން އިން އެނގޭ ގޮތުން ވިއްކާލަން އިޢުލާންކޮށްފައިވާ ބިންތަކުގެ ތެރޭގައި ހިމެނެނީ ގާތްގަނޑަކަށް 1200 އަކަފޫޓާއި 1502 އަކަފޫޓާއި ދެމެދުގެ ބިންތަކެވެ.
މީގެ ކުރިން މިދިޔަ މޭ މަހުގެ 9ގައި ވެސް އެޗްޑީސީން ވަނީ ބީލަމުގެ އުސޫލުން ހުޅުމާލެ ބީޗު ސައިޑުން 13 ބިމެއް ކުއްޔަށް ދޫކުރުމަށް ހުޅުވާލާފައެވެ. އާދިއްތަ ދުވަހުގެ އިޢުލާނަކީ އެ އިޢުލާނަށް އިސްލާހު ގެނައުމަށް ފަހު އަލުން ބިންތައް ބީލަމަށް ހުޅުވާލުވުމުގެ ގޮތުން ކުރި އިޢުލާނެކެވެ.
އޭގެ ތެރެއިން ބިމެއް ގަތުމަށް ޝައުގުވެރިވާ ފަރާތްތަކަށް އެ ފުރުސަތު މިހާރު ވަނީ ހުޅުވާލާފައެވެ. އެޗްޑީސީން ބުނީ 18 އަހަރު ފުރިފައިވާ ދިވެހި ރައްޔިތުންނަށާއި، ރާއްޖޭގައި ރަޖިސްޓްރީކޮށްފައިވާ 100 ޕަސެންޓް ދިވެހިންގެ ހިއްސާ އޮންނަ ކުންފުނިތަކަށް ބިން ގަތުމަށް އެދި ހުށަހެޅޭނެއެވެ.
ބީލަމުގެ މަރުހަލާ ދެ ބަޔަަކަށް ބެހިގެންދާނެއެވެ. އޭގެ ތެރޭގައި ހިމެނެނީ ޕޯޓަލް މެދުވެރިކޮށް ގަންނަން އެދޭ ބިމަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމާއި ބިން ގަންނަން އެއް ފަރާތަށްވުރެ ގިނަ ފަރާތުން އީއޯއައި ހުށަހަޅާފައިވާނަމަ އެ ބިމަކަށް ބިޑް ކުރުމުގެ މަރުހަލާއެވެ.
ސައިޑްއިން ބީލަން ފެށޭ އަގަކީ އަކަފޫޓަކަށް 4،000 ރުފިޔާ ކަމަށް އެ ކުންފުނިން ވަނީ ބުނެފައެވެ. ބީލަން ހުށަހެޅުމުގެ ފުރުސަތު ހުޅުވާލާފައި ވަނީ ޕޯޓަލް މެދުވެރިކޮށެވެ. އަދި އިތުރު މައުލޫމާތު އެޗްޑީސީގެ ހޮޓްލައިން 1516ން ލިބޭނެއެވެ.
