ސިހުރު ހެދިކަމުގެ ތުހުމަތުގައި ހައްޔަރު ކޮށްފައިވާ ކުރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް އާއި އޭނާގެ އެއްބަނޑު އެއްބަފާ ކޮއްކޮ ހައްވާ ސަނާ އަލީ ސަލީމް ބަންދުން ދޫކޮށްލައިފިއެވެ.

އެމީހުން ބަންދުން ދޫކޮށްލާފައިވަނީ ހޮނިހިރު ދުވަހުއެވެ.

ފުލުހުން ތަހުގީގު ކުރަމުންދާ މައްސަލައަކާއި ގުޅިގެން ޝަމްނާޒުއާއި އޭނާގެ ކޮށްކޮގެ އިތުރުން އިތުރު މީހަކު ހައްޔަރުކުރީ ޖޫން 23 ވަނަ ދުވަހުއެވެ. މީގެ ކުރިން އެކި ފަހަރު މަތިން ޝަމްނާޒުގެ ބަންދުގެ މުއްދަތު ޖަހާފައިވެއެވެ.

ފުލުހުން ބުނީ، މި މައްސަލައިގައި ހައްޔަރުކުރި މީހުންގެ ތެރެއިން ޝަމްނާޒުއާއި އޭނާގެ ކޮއްކޮ ފުލުހުންގެ ބަންދުން މިހާރު ދޫކޮށްލާފައިވާ ކަމަށެވެ. އެމީހުން ދޫކޮށްލާފައިވަނީ ބަންދުގައި ބޭތިއްބުމަށް ނުފެންނާތީ ކަމަށްވެސް ފުލުހުން މައުލޫމާތު ދެއެވެ.

މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.

ޝަމްނާޒުއާއި އޭނާގެ ކޮއްކޮ ހައްޔަރު ކޮށްފައިވަނީ ސިހުރާ ގުޅޭ މައްސަލައެއްގައެވެ. މި މައްސަލައިގެ ތަހުގީގަށް އެމީހުން ދިރިއުޅޭ ގެއިން ގެއިން ގެންދިޔަ ތަކެތީގެ ތެރޭގައި ސިހުރާ ގުޅޭ އެއްވެސް އެއްޗެއް ނުވަތަ ކަމެއް ހުރިތޯ އިސްލާމިކް މިނިސްޓްރީން ބަލައި ދިރާސާ ކޮށްފައިވާއިރު، އެފަދަ އެއްޗެއް ނެތްކަމަށް މިނިސްޓްރީން ވަނީ ބުނެފައެވެ.

އޭގެ އިތުރުން، ޝަމްނާޒު ބަންދުގައި ހުއްޓައި އޭނާގެ ކުރީގެ ފިރިމީހާ އާދަމް ރަމީޒް ޖިނާއީ ކުށެއްގެ ތުހުމަތުގައި ބައްދާލުމަށް އޭނާއަށް "އޮފަރ" އަންނަމުންދާ ކަމަށާއި، ރަމީޒާ ދެކޮޅަށް ބަޔާން ދީފިނަމަ އޭނާ ސަލާމަތްވާނެކަމަށް ފުލުހުން ބުނެފައިވާކަމަށް އޭނާގެ ވަކީލުވެސް ރާއްޖެއެމްވީއާ ވާހަކަ ދައްކަމުން ވިދާޅުވެފައިވެއެވެ.