ފުލަމް އަށް ކުޅެމުން އަައި ޕޯޗުގަލްގެ މިޑްފީލްޑަރު ޔާއޯ ޕަލީނިއާ، ޖަރުމަނުގެ ބަޔާން މިއުނިކަށް ސޮއި ކޮށްފި އެވެ.

އުމުރުން 29 އަހަރުގެ ކުޅުންތެރިޔާ ބަޔާނާ އެކު ސޮއި ކޮށްފައި ވަނީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. ބަޔާނާ އެކު ޕަލީނިއާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. ޕަލީނިއާ ހޯދުމަށް ބަޔާނުން ވަނީ ގާތް ގަނޑަކަށް 50 މިލިއަން ޔޫރޯ ފުލަމް އަށް ދީފަ އެވެ.

މީގެ ކުރިން ވެސް ޕަލީނިއާ ވަނީ ބަޔާނަށް ބަދަލުވުމަށް މަސައްކަތް ކޮށްފަ އެވެ. އެހެން ނަމަވެސް އެ ފަހަރު އެ މަސައްކަތް ވަނީ ނާކާމިޔާބުވެފަ އެވެ. ބަޔާނާ އެކު އެއްބަސްވުމުގައި ސޮއި ކުރުމަށްފަހު ވާހަކަ ދައްކަމުން ޕަލީނިއާ ބުނީ، ބަޔާނަށް ސޮއި ކުރުން ވެގެން ދިޔައީ އޭނާގެ ހުވަފެނެއް ހަގީގަތަކަށްވުން ކަމަށެވެ. އަދި އެކަމާ ވަރަށް ބޮޑަށް ފަޚުރުވެރިވާ ކަމަށް އޭނާ ވަނީ ބުނެފަ އެވެ.

މީގެ އިތުރުން ޕަލީނިއާ ބުނެފައި ވަނީ އޭނާ ބޭނުން ވަނީ ބަޔާންގެ ސަޕޯޓަރުން ބަލައި ގަންނަ ފަދަ ކުޅުންތެރިޔަކަށް ވާން ކަމަށާއި، ބޭނުން ވަނީ ބަޔާނާ އެކު ކާމިޔާބީތައް ހޯދަން ކަމަށް ވެސް އޭނާ ބުންޏެވެ. ޕަލީނިއާ ފާހަގަ ކޮށްފައިވާ ގޮތުގައި އެކަންކަން ޙާސިލު ކުރުމަށް އޭނާ ހުރިހާ މަސައްކަތެއް ކުރާނެ އެވެ. ބަޔާނަށް ސޮއި ކުރުން ވެގެން ދިޔައީ އޭނާގެ ޙަޔާތުގައި ވެސް ފުރިހަމަވި އެންމެ އުފާވެރި ކަންތައް ކަމުގައި އޭނާ ވަނީ ބުނެފަ އެވެ.

ފުލަމް އަށް ބަދަލުވެ ޕަލީނިއާ ވަނީ އެ ކުަލަބަށް ކުޅެދިން 79 މެޗުގައި އަށް ލަނޑު ޖަހައިފަ އެވެ. ޕަލީނިއާ އަންނަނީ 2021 ވަނަ އަހަރުން ފެށިގެން ޕޯޗުގަލް ޤައުމީ ޓީމަށް ވެސް ކުޅެމުންނެވެ.