މަހުގެ އަގު ދަށް ކުރީ ޤާސިމް އެދިގެން، އަދި 6 ރުފިޔާ އަށް މަހުގެ އަގު ވައްޓާލާނެ - ދޮންބިލެތް
މަހުގެ އަގަށް ނުފޫޒު ފޯރުވަން ކުރީ ސަރުކާރު ތަކުގައި ވެސް ޤާސިމް އުޅުއްވި ކަމަށް އޭނާ ވިދާޅުވި
ބިލެތްދޫ ދާއިރާގެ ކުރީގެ މެމްބަރު އަޙްމަދު ޙަލީމް (ދޮންބިލެތް)
މަހުގެ އަގު ދަށް ކުރީ މާމިގިލީ ދާއިރާގެ މެމްބަރު އަދި ޖޭޕީގެ ލީޑަރ ޤާސިމް އިބްރާހިމް އެދިގެން ކަމަށާއި އަދި މި ސަރުކާރުން 6 ރުފިޔާ އަށް މަހުގެ އަގު ވައްޓާލާނެ ކަމަށް ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަހުމަދު ހަލީމް (ދޮންބިލެތް) ވިދާޅުވެއްޖެއެވެ.
ރާއްޖޭގައި މަހުގެ އަގު ކުޑަކުރީ އަލަށް ނޫން ކަމަށް އޭނާ ވަނީ ފާހަގަކުރައްވާފައެވެ. ކުރީގެ ރައީސް މުހައްމަދު ނަޝީދުގެ ވެރިކަން ބަދަލުކުރީ ބަޣާވާތަކުން ކަމަށް ސިފަކުރައްވާ އޭނާ ވިދާޅުވީ އޭރުވެސް ވެރިކަން ބަދަލުކުރުމަށް ފަހު ފުރަތަމަ ކުރި ކަމަކީ މަހުގެ އަގު ކުޑަކުރުން ކަމަށެވެ. އޭރުގެ ރައީސް ނަޝީދުގެ ވެރިކަން ބަދަލުވި އިރު ޤާސިމް ހުންނެވީ އެ ސަރުކާރު ބަދަލުކުރަން ސިޔާސީ ގޮތުން ނުކުމެއެވެ. އޭރު ވެރިކަން ބަދަލުވުމާއި އެކު މަހުގެ އަގު 6 ރުފިޔާއަށް ކުޑަ ކުރި ކަމަށް އޭނާ ވިދާޅުވިއެވެ. ކޮންމެ ސަރުކާރެއްގެ ކުރީކޮޅު އެންމެ ބޮޑު ފައިދާ އެއް ސަރުކާރުގެ ކިބައިން ލިބެނީ ޤާސިމް އަށް ކަމަށް އޭނާ ވިދާޅުވިއެވެ. އަދި މި ސަރުކާރުން ވެސް މަހުގެ އަގު ދަށް ކުރީ ޤާސިމްގެ އެދުމުގެ މަތިން ކަމަށް އޭނާ ވަނީ ތުހުމަތު ކުރައްވާފައެވެ. މަހުގެ އަގަށް ނުފޫޒު ފޯރުވަން ކުރީ ސަރުކާރުތަކުގައި ވެސް ޤާސިމް އުޅުއްވި ކަމަށް އޭނާ ވިދާޅުވިއެވެ.
ވެރިކަމަށް ރައީސް ޑރ.މުހައްމަދު މުއިއްޒު ވަޑައިގަންނަވަންދެން ޤާސިމް ހުންނެވީ މުއިއްޒު އަށް ބަދުބަސް ވިދާޅުވާން ކަމަށާއި ވެރިކަން ލިބުމުން މުޅިން ރާގު ބަދަލުވެފައިވާ ކަމަށް އޭނާ ސިފަކުރެއްވިއެވެ. މީގެ އިތުރުން މިހާރު ޤާސިމް ހުންނެވީ ގަދަކޮށް ސަރުކާރު ބޮޑު މީހެއްގެ ގޮތުގައި ކަމަށާއި މަހުގެ އަގު ވައްޓާލުމަކީ ސީދާ ޤާސިމް ބޭނުންފުޅުވާ ގޮތަށް ކުރި ކަމެއް ކަމަށް އޭނާ ތަކުރާރުކޮށް ވިދާޅުވިއެވެ.
އޭނާ ވަނީ ސަރުކާރުތަކަށް ދިމާވާ އެންމެ ބޮޑު ގޮންޖެހުމަކީ ޤާސިމާއި އެކީގައި އުޅެން ޖެހުންކަމަށް ސިފަކުރައްވާފައެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް އެ ސަރުކާރާއި އެއްކޮށް ހުންނެވި އިރު ބަޖެޓަށް ވޯޓުދޭން އެދުމުން ވަކި ދެ ރަށެއް ދިނީމަ ނޫނީ ބަޖެޓަށް ވޯޓު ނުދެއްވާނެ ކަމަށް ޤާސިމް ވިދާޅުވާ ކަމަށް އޭނާ ފާހަގަކުރެއްވިއެވެ. އަދި ކޮންމެ ސަރުކާރެއްގައި ވެސް ބޭނުންވާ ކަންކަން ވުމުން ދެން ޤާސިމް މަސައްކަތް ކުރައްވަނީ ސަރުކާރާއި ދެކޮޅަށް ކަމަށް އޭނާ ވަނީ ވިދާޅުވެފައެވެ. އޭނާ ވަނީ ޤާސިމް އަށް ސިޔާސީ ގޮތުން ވެސް ފާޑު ވިދާޅުވެފައެވެ.
އޭނާ ވަނީ ޤާސިމް އިބްރާހިމް ޢަމަލުކުރައްވާ ގޮތުން ސަރުކާރުތަކަށް ގެއްލުންވާކަމަށް ވިދާޅުވެފައެވެ.
