ވ. ބޮޑުފިނޮޅު ވިއްކާލުމާ ދެކޮޅަށް މުޒާހަރާ ކުރާނަމަ ގާނޫނީ ފިޔަވަޅު އަޅާނެކަމުގެ އިންޒާރު ޝުޖާއު ދީފި
ބޮޑު ފިނޮޅުގައި މުޒާހަރާކުރީ އެމްޑީޕީ މީހުން
ތަރައްގީގެ މަޝްރޫއަށް ހުރަސްއަޅާނަމަ ގާނޫނީ ފިޔަވަޅުއަޅާނެކަމުގެ އިންޒާރު ޝުޖާއު ވަނީ ދެއްވާފައި
ވ. ބޮޑުފިނޮޅު ވިއްކާލުމާ ދެކޮޅަށް މުޒާހަރާ ކުރާނަމަ ގާނޫނީ ފިޔަވަޅު އަޅާނެކަމުގެ އިންޒާރު ބާރަށު ދާއިރާގެ މެންބަރު އިބްރާހިމް ޝުޖާއު ދެއްވައިފިއެވެ.
ޕީއެންސީ ހަރުގެ ޖަލްސާގައި ވާހަކަ ދައްކަވަމުން ޝުޖާއު ވިދާޅުވީ ދިވެހިރާއްޖޭގައި ކުރިއަށްދާ މަޝްރޫއުތަކެއް މީގެ ފަހުން މުޒާހަރާކޮށްގެން ނުުހުއްޓޭނެ ކަމަށެވެ. އެއީ މާޒީގައި އެ ތަޖުރިބާ ކޮށްފައިވާތީ ކަމަށާއި، ރާއްޖެއަށް މީގެ ކުރިން އައިސްފައި ހުރި މަޝްރޫއުތައް އެމްޑީޕީން މުޒާހަރާކޮށްގެން ހުއްޓުވާފައިވާ ކަމަށް ޝުޖާއު ވިދާޅުވިއެވެ.
ޝުޖާއު ވިދާޅުވީ އޭގެ ނޭދެވޭ އަސަރުތައް ކޮށްފައިވާ ކަމަށާއި، ކުޅުދުއްފުށީ އެއަރޕޯޓް ތަރައްގީކުރަން ފެށުމުން، ކުޅުދުއްފުށީގައި ތިބި ބަޔަކު ލައްވާ އެމްޑީޕީން ކުޅި ހިމާޔަތްކުރުމުގެ މުޒާހަރާ ކުރިކަމަށެވެ. އެއަށް ނުބާލަ ކުރިއަށް ގެންދިޔަ ކަމަށާއި، ބުރިޖުގެ މަސައްކަތް ފެށީމާ ރާޅުގަނޑުގައި ރާޅާ އަޅަންއުޅޭ ކުދިން ލައްވާ މުޒާހަރާކުރަން ފެށިކަމަށެވެ.
އަދި މިކަންކަމަށް ހިތްވަރުދޭ މީހުން، އެއީ ވެރިކަން ކޮށްފައި ހުރި މީހެއްތޯ ނޫންތޯ ނުބަލާ ގާނޫނީ އިމުގެ ތެރެއިން އެމީހަކަށް ދޭންޖެހޭ ހައްގު އަދަބުދޭން މި ސަރުކާރުން ފަސް ނުޖެހޭނެކަމަށްވެސް ޝުޖާއު ވިދާޅުވިއެވެ.
ޝުޖާއު މިފަދައިން އިންޒާރުދެއްވި އިރު، ވ އަތޮޅުގައި އޮންނަ ހަމައެކަނި ދޮންވެލި ފިނޮޅު މި ސަރުކާރުން ވަނީ ނުއަގެއްގައި ވިއްކާލަން ނިންމާލާފައެވެ. އަދި އެކަމާއި ގުޅިގެން އެ ފިނޮޅުގައި ވ އަތޮޅާއި ކ އަތޮޅުގެ ގެސްޓްހައުސް އަދި ސަފާރީ ހިންގާ ފަރާތްތަކުން ވަނީ އެތަން ވިއްކުމާއި ދެކޮޅަށް މުޒާހަރާކޮށްފައެވެ.
ވ. އަތޮޅު ބޮޑުފިނޮޅާއި އެ ފިނޮޅުގެ ފަޅު 729،000 ޑޮލަރަށް (11.2 މިލިއަން ރުފިޔާ) އަށް ވިއްކާލާފައިވާތީ އެކަމާއި ދެކޮޅަށް ބުރާސްފަތި ދުވަހު އެ އަތޮޅުގެ ކައުންސިލާއި ފަތުރުވެރިކަމުގެ ދާއިރާގައި މަސައްކަތް ކުރާ ވިޔަފާރިވެރިން އަދި ދާއިރާގައި ހަރަކާތްތެރިވާ އާއްމުން ވަނީ އެ ފިނޮޅުގައި މުޒާހަރާކޮށްފައެވެ.
