ގަޒާގެ އެތައް ސަތޭކަ ހާސް ރައްޔިތުން އެމީހުންގެ ގެދޮރާއި ވަޒަނުން ނުކުމެގެން ދިއުމަށް ޔަހޫދީ ސިފައިން ބުދަ ދުވަހު އަމުރު ކޮށްފިއެވެ.

ހެލިކޮޕްޓަރުގައި ގާޒާގެ ތެރެއަށް ޔަހޫދީ ސިފައިން އަޅަމުން ދިޔަ ލީފްލެޓް ތަކުގައި ބުނެފައިވަނީ މިހާރުން މިހާރަށް އެންމެން އެ ސިޓީ ދޫކޮށް ދާރުލް ބަލާހް އާއި ޒަވައިދާ އާ ދިމާލަށް ދިއުމަށެވެ.

އދ ގެ ސެކިއުރިޓީ ކައުންސިލުން ވަގުތުން ހަނގުރާމަ ހުއްޓާލުމަށް އިޒްރޭލަށް އަމުރުކޮށް ފާސް ކޮށްފައިވާ ގަރާރާއި ބައިނަލް އަގްވާމީ މުޖްތަމައުން ހަނގުރާމަ ހުއްޓާލުމަށް ގޮވަމުންދާ ގޮވުމަށް އެއްވެސް ފަރުވާލެއް ބެހެއްޓުމެއް ނެތި އިޒްރޭލުން ގާޒާގެ ފަލަސްތީނު ރައްޔިތުންނާ މެދު ކަން ކުރަމުންދަނީ ހިތުހުރި ގޮތަކަށް އެމީހުން ތަބާވާންޖެހޭ އެއްވެސް ގާނޫނެއް ގަވާއިދެއް ނެތް ކަމުގައި ދެކިގެންނެވެ.

ޔަހޫދީ ދައުލަތުން ގާޒާގެ ރައްޔިތުންނަށް ދާރުލް ބަލާހް އާއި ޒަވައިދާ އަށް ދިއުމަށް އަމުރު ކުރަމުންދާއިރު އެ ސަރަހައްދު ތަކަށް ވެސް ޔަހޫދީ ސިފައިން ގެންދަނީ ހަމަލާ ދެމުންކަން ޚަބަރުތައް ބުނެއެވެ.

މި ފާއިތުވި 10 ވަރަކަށް ދުވަހުގެ ތެރޭގައި ޚާން ޔޫނިސްގެ ބަޔަކާއި، ޝުޖާޔާ ސަރަހައްދު ހުސްކުރަންވެސް ޔަހޫދީ ސިފައިން ވަނީ އަމުރެއް ނެރެފައެވެ. އެއާއެކު އެތައް ސަތޭކަ ހާސް ފަލަސްތީނު ރައްޔިތުން މަގުމަތިވެ ވަނީ ހާލުގައި ޖެހިފައެވެ.

ޔަހޫދީ ސިފައިން އެކި ސަރަހައްދުތައް ހުސްކުރަން ނެރެމުންދާ އަމުރު ތަކުގެ ސަބަބުން ގެދޮރު ގެއްލި މަގުމަތިވެފައިވާ މީހުންގެ އަދަދު 1.9 މިލިއަނަށް އަރާނެ ކަމަށް އދ އިން ވަނީ އަންދާޒާ ކޮށްފައެވެ.

ހުސްވި ހަފްތާގައި އދ އިން ބުނެފައިވަނީ އޮކްޓޯބަރު މަހު ހަނގުރާމަ ފެށި ފަހުން ގާޒާގައި ދިރިއުޅޭ އާބާދީގެ 90 އިން ސައްތަ މީހުން މަގުމަތިވެފައިވާ ކަމަށެވެ.

ގާޒާ އިން ފަލަސްތީން ރައްޔިތުން ހުސްކުރަން އިޒްރޭލުން ނެރުނު އަމުރާ ގުޅިގެން މިސްރާއި އުރުދުން އިން ވަނީ ވަރަށް ބޮޑަށް ނުރުހުން ފާޅު ކޮށްފައެވެ. އުރުދުންގެ ޚާރިޖީ ވަޒީރު އައިމަން ސަފާދީ އާއި މިސްރުގެ ޚާރިޖީ ވަޒީރު ސާމިހް ޝުކުރީ އާ ދެބޭފުޅުން ބޭއްވެވި ނޫސް ކޮންފަރެންސެއްގައި ވިދާޅުވީ ގާޒާގެ ރައްޔިތުން އެމީހުންގެ ވަޒަނުން ނެރެން އިޒްރޭލުން މަސައްކަތް ކުރުމަކީ ރަތް ރޮނގު ހުރަސް ކުރުން ކަމުގައެވެ. މި ކަމާ ދެކޮޅަށް މިސްރާއި އުރުދުން އިން ކުރެވެން ހުރި ހުރިހާ މަސައްކަތެއް ކުރާނެ ކަމަށް ވެސް އެބޭފުޅުން ވިދާޅުވިއެވެ.