ފަރަންސޭސި އިންތިޚާބުގެ އަދަޔާ ޚިލާފް ނަތީޖާ އާ އެކު ބޮޑު ވަޒީރު އިސްތިއުފާ ދެއްވަނީ
ހޯމަ ދުވަހުގެ އާދަޔާ ޚިލާފް ނަތީޖާ އާ އެކު، އައު ބޮޑު ވަޒީރު ކަމަށް ބޭފުޅަކު ކަނޑައަޅާނީ އިންތިޚާބުގައި އެންމެ ބޮޑު ކާމިޔާބެއް ހޯދި ނިއު ޕޮޕިއުލަރ ފްރަންޓް ކޯލިޝަން ގައި ހިމެނޭ ޕާޓީތަކުންނެވެ.
ފަރަންސޭސި ވިލާތުގެ އާންމު އިންތިޚާބު 2024
ފަރަންސޭސި ވިލާތުގައި އާދިއްތަ ދުވަހު ބޭއްވުނު އާންމު އިންތިޚާބުގައި އެއްވެސް ޕާޓީ އަކަށް ގާނޫނު ހަދާ މަޖިލީހުގެ އަޣްލަބިއްޔަތު ނުލިބުމާއެކު އައު ސަރުކާރު އެކުލަވާލުމުގައި މަރުތަޅު އެޅިއްޖެއެވެ.
އިންތިޚާބުގައި ބޮޑު ކާމިޔާބެއް ލިބޭނެ ކަމަށް ބުނަމުން ދިޔަ، ވަތަނީ ފިކުރުގެ ނޭޝަނަލް ރެލީ ޕާޓީ ދިޔައީ ތިން ވަނަ އަށެވެ.
557 ގޮނޑީގެ މައްޗަށް އެކުލެވޭ ގާނޫނު ހަދާ މަޖިލީހުގެ އިންތިޚާބުގައި ފަރަންސޭސި ރައީސް އެމެނުއެލް މެކްރޮންގެ ޕާޓީ ހިމެނިގެން އެންމެ ފަހު ވަގުތު އެކުލަވާލެވުނު އިއްތިހާދު ދިޔައީ ދެވަނަ އަށެވެ.
މި ނަތީޖާ އާ އެކު ރައީސް މެކޮރޮންގެ އިއްތިހާދުގައި ހިމެނިވަޑައިގަންނަވާ މިހާރުގެ ބޮޑު ވަޒީރު ގެބްރިއެލް އަޓާލް ހޯމަ ދުވަހުގެ ވަގުތެއްގައި މަގާމުން އިސްތިއުފާ ދެއްވާނެ ކަމަށް ވަނީ އިއުލާން ކުރައްވާފައެވެ.
ފްރާންސްގެ ރައީސް، ގާނޫނު ހަދާ މަޖިލީހާ ގުޅިގެން މަސައްކަތް ކުރައްވަން ޖެހުނު ކަމުގައި ވިޔަސް އާންމު އިންތިޚާބުގެ ނަތީޖާ ނުކުންން ގޮތަކުން ރައީސް ކަމުގެ މަގާމަށް ސީދާ ގޮތުން ކުރާނެ އަސަރެއް ނެތުމާއެކު މެކްރޮން އަށް މަގާމު ދޫކޮށްލައްވަން ޖެހިވަޑައެއް ނުގަންނަވާނެއެވެ. މެކްރޮންގެ ރިޔާސީ ދައުރު ގައި އަދި ބާކީ 3 އަހަރު އެބައޮތެވެ.
ހޯމަ ދުވަހުގެ ނަތީޖާ އާ އެކު، އައު ބޮޑު ވަޒީރު ކަމަށް ބޭފުޅަކު ކަނޑައަޅާނީ އިންތިޚާބުގައި އެންމެ ބޮޑު ކާމިޔާބެއް ހޯދި ނިއު ޕޮޕިއުލަރ ފްރަންޓް ކޯލިޝަން ގައި ހިމެނޭ ޕާޓީތަކުންނެވެ.
