ޖޯޖިއާ ޤައުމީ ޓީމަށް މަރުޙަބާ ކިޔަން ނިކުތީ ބޮޑު ވަޒީރު

ޖަރުމަނުގައި ކުރިއަށްދާ ޔުރޯ ފުޓުބޯޅަ މުބާރާތަށްފަހު، ޖޯޖިއާގެ ޤައުމީ ޓީމު އެނބުރި ޤައުމަށް ދިޔުމުން ބޮޑު ވަޒީރު އިރާކްލީ ކޮބަކިޑްޒޭ އާއި ގިނަ ރައްޔިތުންތަކެއް ނިކުމެ ހޫނު މަރުޙަބާއެއް ކިޔައިފި އެވެ.

މިއަހަރުގެ ޔޫރޯ މުބާރާތަކީ ބައިނަލްއަޤުވާމީ ފުޓުބޯޅައިގައި ޖޯޖިއާ އިން ވާދަކުރި ފުރަތަމަ ބޮޑު މުބާރާތެވެ. މުބާރާތުގައި ޖޯޖިއާ ހިމެނުނު ގްރޫޕުގައި ކުޅުނު ތިން މެޗުގެ ތެރެއިން އެ ޓީމު ވަނީ އެއް މެޗުން މޮޅުވެފަ އެވެ. އެއީ ގްރޫޕް ސްޓޭޖުގައި ޕޯޗުގަލާ ދެކޮޅަށް ކުޅުނު މެޗުންނެވެ. ތުރުކީއާ ދެކޮޅަށް ކުޅުނު މެޗުން ބަލިވި ނަމަވެސް، ޗެކް ރިޕަބްލިކާ ދެކޮޅަށް ކުޅުނު މެޗު އެއްވަރު ކުރި އެވެ. މުބާރާތުގެ ގްރޫޕް ސްޓޭޖުގައި އެންމެ ރަނގަޅު ނަތީޖާއެއް ހޯދާ ތިން ވަނަ ޓީމުތަކުގެ ތެރޭގައި ހިމެނިގެން ޖޯޖިއާ ވަނީ މުބާރާތުގެ ގަދަ 16 ވަނަ ބުރުން ޖާގަ ހޯދައިފަ އެވެ.

މުބާރާތުގެ ގަދަ 16 ވަނަ ބުރުގައި ޖޯޖިއާ އިން ނިކުތީ ސްޕެއިންއާ ދެކޮޅަށެވެ. ޖޯޖިއާ އިން ދެކޭ ގޮތުގައި ފުރަތަމަ މުބާރާތުގެ ގަދަ 16 އިން ޖާގަ ލިބުމަކީ ވެސް އެ ޓީމަށް ފަޚުރުވެރި ނަތީޖާ އެކެވެ. ސްޕެއިންއާ ދެކޮޅަށް ކުޅުނު މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ޖޯޖިއާ އިންނެވެ. ނަމަވެސް ސްޕެއިން އިން ވަނީ ފަހަތުން އަރައި މެޗު ކާމިޔާބު ކޮށްފަ އެވެ. މުބާރާތުން ކެޓި ނަމަވެސް، ޖޯޖިއާ އިން އެ ކާމިޔާބީ ކުލަ ގަދަ ގޮތެއްގައި ފާހަގަ ކުރަން ނިންމި އެވެ.

ޖޯޖިއާ ޤައުމީ ޓީމުން އެނބުރި ޤައުމަށް ދިޔުމުން ގިނަ ބަޔަކު ވަނީ މަރުޙަބާ ކިޔަން ނިކުމެފަ އެވެ. އެކަމަށްޓަކައި ޚާއްސް ރަސްމިއްޔާތެއް ބޭއްވިއިރު، ބޮޑު ވަޒީރު ވެސް ވަނީ ބައިވެރިވެ ވަޑައިގެންފަ އެވެ. އެ ރަސްމިއްޔާތުގައި ޤައުމީ ޓީމުގެ ކުޅުންތެރިން އަދި އާންމުންނާ މުޚާތަބުކޮށް ވާހަކަ ދައްކަވަމުން ބޮޑު ވަޒީރު ކޮބަކިޑްޒޭ ވިދާޅުވީ، ޖޯޖިއާގެ ޤައުމީ ޓީމާ މެދު އޭނާ އަދި މުޅި ޤައުމު ފަޚުރުވެރިވާ ކަމަށެވެ. ޖޯޖިއާ އިން ހޯދީ ތާރީޚީ ކާމިޔާބެއް ކަމަށާއި، ދެން ކުރަން ޖެހޭ މަސައްކަތަކީ ފުޓުބޯޅައިގައި އިތުރަށް ކުރިއަށް ދިޔުން ކަމަށް ފަހަގަ ކުރައްވައި، ކޮބަކިޑްޒޭ ވިދާޅުވީ ފުޓުބޯޅަ ކުރިއެރުވުމަށް ސަރުކާރުން ފުރިހަމަ އެއްބާރުލުން އަދި އެހީތެރިކަން ދެއްވާނެ ކަމަށެވެ.

ޖޯޖިއާ އިން އެ ޤައުމުގައި ކާމިޔާބީ ފާހަގަ ކުރަމުންދާއިރު، އެ ޤައުމުގެ ކުރީގެ ބޮޑު ވަޒީރު ބިޑްޒީނާ އިވަނިޝްވާލީ ވަނީ ޤައުމީ ޓީމަށް ފައިސާގެ އިނާމެއް ވެސް ދެއްވައިފަ އެވެ. އޭނާ ވަނީ ޖޯޖިއާގެ ޓީމަށް 8.4 މިލިއަން ޕައުންޑުގެ ފައިސާ އިނާމު ހަދިޔާ ކޮށްފަ އެވެ.