ޓީމު ބަލިވުން ކްރޮއޭޝިޔާ ކޯޗު އެދުނީ މައާފަށް

ޔޫރޯ ފުޓްބޯޅަ މުބާރާތުގައި ރޭ 3-0 ން ސްޕޭން އަތުން ބަލިވުމުން ކްރޮއޭޝިޔާގެ ކޯޗު ލަޓްކޯ ޑަލިކް މައާފަށް އެދިއްޖެ އެވެ.

މެޗަށް ފަހު ވާހަކަ ދައްކަމުން އޭނާ ބުނީ ފުރަތަމަ ހާފުގައި ސްޕޭން ޖެހި ތިން ގޯލުން މެޗު ގެއްލުނީ ގިނަ ގޯސްތަކެއް ހެދިގެން ކަމަށެވެ. ހާއްސަކޮށް ފުރަތަމަ ހާފުގައި ގޯސްތައް ގިނަ ކަމަށާއި ނަމަވެސް ފަހު ހާފުގައި އެކަންކަން ރަނގަޅު ކުރެވުނު ކަމަށެވެ.

2018 ވަނަ އަހަރުގެ ވޯލްޑްކަޕުގެ ފައިނަލް ކުޅެ، އެންމެ ފަހުގެ ވޯލްޑްކަޕުގެ ތިން ވަނަ ހޯދައިދިން ކޯޗު ބުނީ މެޗުގައި ހެދުނު އެންމެ ބޮޑު ގޯހަކީ ސްޕޭން ކުޅުންތެރިންނަށް މާގިނަ ހުސް ޖާގަ ދެވުން ކަމަށެވެ. އޭގެ ސަބަބުން އެމީހުގެ ފޯވަޑުންނަށް ބޭނުން ގޮތަކަށް ކުޅެން ފުރުސަތު ލިބުނީ ކަމަށެވެ.

މި މެޗަކީ ސްޕެއިނުން ޓިކިޓަކާ ކުޅެން ފެށިފަހުން ބޯލް ޕޮޒިޝަން ލީޑް ނުކުރެވި މޮޅުވި ފުރަތަމަ މެޗެވެ. މެޗުގެ 53 ޕަސެންޓް ބޯޅަ ހިފެހެއްޓީ ކްރޮއޭޝިޔާ އެވެ. ސްޕޭނަށް ބޯޅަ ހިފެހެއްޓުނީ 47 ޕަސެންޓަށެވެ.