ޕޯޗުގަލްގެ މައްޗަށް ކްރޮއޭޝިއާ އިންް ކުރި ހޯދައިފި

ބައިނަލްއަޤުވާމީ ރަހުމަތްތެރިކަމުގައި ޕޯޗުގަލާ ދެކޮޅަށް ކުޅުނު މެޗުން ކްރޮއޭޝިއާ މޮޅުވެއްޖެ އެވެ.

ހޮނިހިރު ދުވަހުގެ ރޭ ކުޅުނު މެޗު ކްރޮއޭޝިއާ އިން ކާމިޔާބު ކުރީ 2-1 އިންނެވެ. މެޗުގައި އެ ޓީމުން ލީޑު ނަގާފައި ވަނިކޮށް، ޕޯޗުގަލް އިން ނަތީޖާ ހަމަހަމަ ވެސް ކުރި އެވެ. ނަމަވެސް ދެ ވަނަ ލަނޑެއް ޖަހައިގެން ކްރޮއޭޝިއާ އިން ވަނީ މެޗު ކާމިޔާބު ކޮށްފަ އެވެ.

މެޗު ފަށައިގެން އަށް ވަނަ މިނެޓުގައި ކްރޮއޭޝިއާ އަށް ލީޑު ނަގައިދިނީ ކެޕްޓަން ލޫކާ މޮޑްރިޗް އެވެ. އެއީ އެ ޓީމަށް ލިބުނު ޕެނަލްޓީއެއް ކާމިޔާބު ކޮށްގެންނެވެ. ޕޯޗުގަލް އިން މެޗުގެ ނަތީޖާ ހަމަހަމަ ކުރުމަށް ކުރި މަސައްކަތް ކާމިޔާބުވީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ތިން ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ޑިއޯގޯ ޖޮޓާ އެވެ. އޭނާ އެ ލަނޑު ޖެހީ ނެލްސަން ސެމޭޑޯ ތަނަވަސްކޮށްދިން ފުރުސަތެއްގަ އެވެ. ޕޯޗުގަލް އިން ނަތީޖާ ހަމަހަމަ ކުރިތާ އަށް މިނެޓުގެ ތެރޭގައި ކްރޮއޭޝިއާ އިން ވަނީ ދެ ވަނަ ލަނޑު ޖަހައިފަ އެވެ. އެ ޓީމަށް އެ ލަނޑު ޖަހައިދިނީ އަންޓޭ ބުޑިމިއޭ އެވެ.

އޭގެ ފަހުން ދެ ވަނަ ފަހަރަށް މެޗުގެ ނަތީޖާ ހަމަހަމަ ކުރުމަށް ޕޯޗުގަލް އިން ކުރި މަސައްކަތް ކާމިޔާބެއް ނުވި އެވެ. މެޗުގައި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ނުކުޅެ އެވެ. ނަމަވެސް ބެންޗުގައި ރޮނާލްޑޯ އިނެވެ. ޔޫރޯގެ ކުރިން ޕޯޗުގަލް އިން ރަޙުމަތްތެރިކަމުގެ އެއް މެޗު އަދި ކުޅޭނެ އެވެ. އަންގާރަ ދުވަހު އެ ޓީމު ނިކުންނާނީ އަޔަލެންޑާ ދެކޮޅަށެވެ.