އިޒްރޭލް ޕާސްޕޯޓް މަނާކުރުމަށް ޑަބަލްކޮށް ޤާނޫނަށް އިސްލާހުކުރަން ހުށަހެޅުމުގެ ނިޔަތަކީ ކޮބައިތޯ ސުވާލު އުފެދޭ ކަމަށް ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވިދާޅުވެއްޖެއެވެ.
އޭނާ އެފަދައިން ވިދާޅުވީ ހޯމަ ދުވަހު އެމްޑީޕީގެ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
އިޒްރޭލް ޕާސްޕޯޓުގައި ރާއްޖެއަށް އެތެރެވުން ހުއްޓުވުމަށް ގާނޫނު އިސްލާހު ކުރަން ސަރުކާރުން ނިންމިކަން އާދިއްތަ ދުވަހު ސަރުކާރުން ވަނީ އިޢުލާންކޮށްފައެވެ. ސަރުކާރުގެ މި ނިންމެވުން އިއުލާންކުރެއްވީ އާދިއްތަ ދުވަހު ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އަލީ އިހްސާނެވެ. ސަރުކާރުން ޤާނޫނަށް އިސްލާހު ގެންނަން ހުށަހަޅާނެ ކަމަށް ބުނެފައިވާއިރު މީކާއިލް ވަނީ މީގެ ކުރިން އިމިގްރޭޝަން ޤާނޫނަށް އިޒްރޭލް ޕާސްޕޯޓުގައި ރާއްޖެ އެތެރެވުން މަނާކުރުމަށް އިސްލާހު ހުށަހަޅުއްވާފައެވެ. އެކަމާއި ގުޅޭ ގޮތުން ވާހަކަދައްކަވަމުން މީކާއިލް ވިދާޅުވީ އެ ޤާނޫނަށް އޭނާ ހުށަހަޅާފައިވާ އިސްލާހަށް ބަދަލު ގެނައުމުގެ ބަދަލުގައި އަލުން ޤާނޫނަށް އިސްލާހު ހުށަހަޅަން ސަރުކާރުން ނިންމި ސަބަބާއި މެދު ސުވާލު އުފެދޭ ކަަމަށެވެ. އަދި ސަރުކާރުން ހޯމަ ދުވަހުގެ މަޖިލީހަށް އެ ބިލުގެ އިސްލާހު ހުށަހަޅާފައި ނުވަނީ ކީއްވެތޯ ވެސް މީކާއިލް ސުވާލު އުފެއްދެވިއެވެ. މީގެ އިތުރުން ޤާނޫނަށް އިސްލާހު ގެންނަން އުޅޭ ކަމަށް ބުނެ ސަރުކާރުން މަސައްކަތް ކުރަނީ އިޒްރޭލް ޕާސްޕޯޓުގައި ރާއްޖެ އެތެރެވުން މަނާނުކޮށް ދިގުދަންމާލަން ކަމަށް ތުހުމުތަކު ކުރުމުގެ ފުރުސަތު އޮތް ކަމަށް ވެސް މީކާއިލް ވަނީ ވިދާޅުވެފައެވެ. މީކާއިލް ވިދާޅުވީ ފަލަސްތީނަށް އިޒްރޭލުން ދެމުންދާ ހަމަލާތަކާއި ދެކޮޅަށް އަޑު އުފުލުމަށް 19 ވަނަ މަޖިލީހުގައި ވެސް އެމްޑީޕީން މަސައްކަތްކޮށްފައިވާ ކަމަށެވެ. އެގޮތުން އިޒްރޭލް ޕާސްޕޯޓް މަނާކުރުމަށް މަޖިލީހުން ގަރާރެއް ފާސްކޮށްފައިވާކަން މީކާއިލް ފާހަގަކުރެއްވިއެވެ. މި މައްސަލަ އާއި މެދު އެއްވެސް ވަރަކަށް އެމްޑީޕީ އާއި މަޝްވަރާކޮށްފައި ނުވާކަން މީކާއިލް ވަނީ ފާހަގަކުރައްވާފައެވެ.
އަދި އެއް ނެތް އެއްވެސް މަޝްވަރާ އެއް ކޮށްފައި. އަޅުގަނޑުމެމްނާއި މަޝްވަރާކޮށްފަ އެއް ނޫން އެކަން ނިންމެވީ. ކޮމިޓީ މަރުހަލާގައި ބިލަށް ގެންނަން ބޭނުން ކޮންމެ ބަދަލެއް ގެނެވޭނެ. އެ ނަމްބަރސް އެބަ އޮތް އެ ބޭފުޅުންގެ އަތުގައި. އަޅުގަނޑުމެން އެދެނީ މި ބިލާއި އެކު ކުރިއަށް ގެންދިއުން. އަޅުގަނޑުމެން ގޮތެއް ނިންމާނީ އެމްޑީޕީގެ ޕީޖީ ގްރޫޕްގައި މަޝްވަރާކޮށްފައި އިތުރު ބިލަކާއި މެދު. އެ ބޭފުޅުންނަށް މި ބިލަށް ގެންނަން ބޭނުންވާ ހުރިހާ ބަދަލެއް ގެނެވޭނެ. 19 ވަނަ މަޖިލީހުގައި ވެސް އެ މަސައްކަތް އަޅުގަނޑުމެން ކުރިން. ގަރާރެއް ފާސްކުރި. އަދި ނޮޅިވަރަމް ދާއިރާގެ މެމްބަރު ޤާނޫނަށް އިސްލާހެއް ހުށަހަޅާފަ އަނބުރާ ގެންދެވީ. ގެންދެވި ސަބަބު ތިބޭފުޅުންނަށް ސާފުކޮށްލެވޭނެގަލޮޅު ނެކުނު ދާއިރާގެ މެމްބަރު މީކާއިލް ނަސީމް
އެމްޑީޕީ ޕީޖީ ގްރޫޕްގެ އެހެން މެމްބަރުން ވެސް ވަނީ އިޒްރޭލް ޕާސްޕޯޓް މަނާކުރުމުގެ މައްސަލައިގައި ސަރުކާރުގެ ނިޔަތް ރަނގަޅުކަމާއި މެދު ސުވާލު އުފައްދަވާފައެވެ. ޕާސްޕޯޓް މަނާކުރަން ގާނޫނު އިސްލާހުކުރަން ސަރުކާރުން ނިންމާފައިވާއިރު، އިޒްރޭލް ޕާސްޕޯޓް މަނާކުރުމަށް ގޮވާލާ ރައީސް އޮފީސް ކައިރީގައި އެއްވުމެއް ވަނީ ބާއްވާފައެވެ. ޕާސްޕޯޓު މަނާނުރާތީ ގިނަ ބައެއްގެ ފާޑުކިޔުން ވެސް ސަރުކާރަށް ވަނީ އަމާޒުވެފައެވެ.
އިޒްރޭލް ޕާސްޕޯޓުގައި ރާއްޖެ އެތެރެވުން މަނާކުރުމަށް އިމިގްރޭޝަން ގާނޫނަށް އިސްލާހު ގެންނަ ބިލެއް މަޖިލީހަށް ހުށަހަޅާފައި ވަނީ ނިމިދިޔަ މޭއި މަހުގެ ތެރޭގައެވެ. އެ ބިލު މަޖިލީހަށް ހުށަހަޅާފައިވަނީ އިޒްރޭލުން ފަލަސްތީނުގެ ދަރިފަސްކޮޅު ނައްތާލުމަށް ހިންގަމުންދާ ގަތުލުއާންމާއި ދެކޮޅަށް ރާއްޖެއިން ފިޔަވަޅުތަކެެއް އެޅުމަށް މަގުފަހިކުރުމުގެ ގޮތުން ކަމަށް މީކާއިލް ވިދާޅުވިއެވެ. ރާއްޖެއަށް އިޒްރޭލްގެ ރައްޔިތުން އެތެރެވުން މަނާކުރުމަކީ ވެސް އެ ބިލުގެ މަޤްސަދެއް ކަމަށް މީކާއިލް ވިދާޅުވިއެވެ. މީގެ އިތުރުން ސަރުކާރުން މިހާތަނަށް މިކަމުގައި އަމަލުކުރާނެ ގޮތެއް ސާފުކޮށްދިފައިނުވާތީ އެކަން ސާފުކުރުމަކީ ވެސް ބިލުގެ މަޤްސަދުތަކުގެ ތެރޭގައި ހިމެނޭކަމެކެވެ. ހަމައެހެންމެ އިޒްރޭލް ޕާސްޕޯޓު މަނާކުރެވޭނެ ވަކި މުއްދަތެއްވެސް އެނގެން ނެތުމުން، ގާނޫނީ ފިޔަވަޅު އެޅުމަށް އަވަސްކުރުމަށްވެސް އެ އިސްލާހުގައި ގޮވާލާފައިވެއެވެެ.
އެ އިސްލާޙުގައި ބުނެފައި ވަނީ އިޒްރޭލްގެ ޕާސްޕޯޓު ހިމެނޭހެން އެހެން ގައުމެއްގެ ޕާސްޕޯޓު ގެންގުޅޭ މީހުން ވެސް ރާއްޖެ އެތެރެވުން މަނާ ކަމަށެވެ.
