ފާއިތުވި 6 މަސް ދުވަހުގެ ތެރޭގައި 100 މިލިއަން ރުފިޔާގެ މަސްތުވާތަކެތި އަތުލައިގަނެފައިވޭ: ކަސްޓަމްސް
މި ތަކެތީގެ ޖުމްލަ ބަރުދަނުގައި 51 ކިލޯ
ކަސްޓަމްސްއިން އަތުލައިގަތް މަސްތުވާތަކެތި
ފާއިތުވި 6 މަސް ދުވަހުގެ ތެރޭގައި 100 މިލިއަން ރުފިޔާގެ މަސްތުވާތަކެތި ކަސްޓަމްސްއިން އަތުލައިގަނެފައިވާ ކަމަށް އެ ސަރވިސްއިން ބުނެފިއެވެ.
ކަސްޓަމްސްއިން ވަނީ 17 ނޮވެންބަރު 2023ން 17 މެއި 2024އާ ހަމައަށް އަތުލައިގެންފައިވާ މަސްތުވާތަކެތީގެ ތަފާސްހިސާބުތައް ހިއްސާކޮށްފައެވެ.
ކަސްޓަމްސްއިން ބުނީ ހޭޝް އޮއިލް 910ގްރާމް، ކެނަބިސް 101.80ގްރާމް، މެތްއެމްފަޓަމިން 4714ގްރާމް، ސިންތެޓިކް ކެތިނޯން 13،536ގްރާމް، އެމްފެޓަމިން 451ގްރާމް، ސިންތެޓިކް ކެނަބިނޮއިޑް 25ގްރާމް، ކޮކޭން 18،855ގްރާމް، ހެރޮއިން 7،400ގްރާމް، މެފެޑްރޯން 3،870ގްރާމް، އަދި އެމް ޑީ އެމް އޭ 1،152ގްރާމް އަތުލައިގެންފައިވާ ކަމަށެވެ.
ކަސްޓަމްސްއިން ބުނީ މި ތަކެތީގެ ޖުމްލަ ބަރުދަން 51 ކިލޯ މަގުމަތީ އަގު 100 މިލިއަނަށް އަރާ ކަމަށެވެ.
މަސްތުވާތަކެއްޗާ ދެކޮޅަށް ކަމާގުޅުންހުރި މުއައްސަސާތަކުން ދަނީ ގިނަ މަސައްކަތްތައް ކުރަމުންނެވެ. ރާއްޖެއަށް އެތެރެ ކުރަން އުޅުނު ގިނަ އަދަދެއްގެ މަސްތުވާތަކެތި ކަސްޓަމްސްއިން އަތުލައިގަނެފައިވާއިރު، ފުލުހުން ހިންގާ އޮޕަރޭޝަންތަކުގައި ވެސް ދަނީ ގިނަ އަދަދެއްގެ މަސްތުވާތަކެތި އަތުލައިގަންނަމުންނެވެ. މިމައްސަލައާ ގުޅިގެން މީގެ ކުރިން ހޯމް މިނިސްޓަރު އަލީ އިހުސާން ވިދާޅުވެފައިވަނީ މަސްތުވާތަކެތީގެ ވަބާގައި ޖެހި ޖީލެއް ހަލާކުވަމުންދާ ކަމަށާއި، މިމައްސަލަ ހައްލު ކުރުމަށް އެންމެން ގުޅިގެން މަސައްކަތް ކުރަންޖެހޭ ކަމަށެވެ.
