ފްރީޓްރޭޑް އެގްރީމެންޓްއަށް އެދުނީ އިންޑިއާއިން ކަމަށް ބުނެ އިކޮނޮމިކް މިނިސްޓަރ އިތުރުފުޅު ހެއްދެވިކަން ހާމަވެއްޖެ

ރާއްޖެ އާއި އިންޑިއާ އާއި ދެމެދު ފްރީޓްރޭޑް އެގްރީމެންޓެއް ޤާއިމްކުރުމަށް އެދުނީ އިންޑިއާއިން ކަމަށް ބުނެ އިކޮނޮމިކް މިނިސްޓަރ މުހައްމަދު ސައީދު އިތުރުފުޅުހެއްދެވިކަން ހާމަވެއްޖެއެވެ.

މިދިޔަ ހަފްތާގެ ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ ސައީދު ވަނީ ރާއްޖެ އާއި އިންޑިއާއާ ދެމެދު މިނިވަން ވިޔަފާރީގެ އާ އެއްބަސްވުމެއް ނުވަތަ ފްރީ ޓްރޭޑް އެގްރީމެންޓް (އެފްޓީއޭ) އެއް ގާއިމުކުރުމުގެ މަސައްކަތް ކުރަމުންދާ ކަމަށް ވިދާޅުވެފައެވެ. އެ އެއްބަސްވުމުގައި ސޮއިކުރަން އެދިފައި ވަނީ އިންޑިއާގެ ފަރާތުން ކަމަށާއި ސަފްޓާގެ އިތުރުން ރާއްޖެ އާއި އިންޑިއާ އާއި ދެމެދު ފްރީޓްރޭޑް އެއްބަސްވުމެއް އޮތުމަކީ މުހިންމު ކަމެއް ކަމަށް އިންޑިއާއިން އެދޭ ކަަމަށް މިނިސްޓަރ ވިދާޅުވިއެވެ. މިނިސްޓަރ އެފަދައިން ވިދާޅުވި ނަމަވެސް އެ އެގްރީމެންޓްގެ ތަފްސީލެއް ހިއްސާކުރައްވާފައެއް ނުވެއެވެ. އަދި އެފަދަ އެއްބަސްވުމެއް އެކުލަވާލުމަށްޓަކާ ކުރަމުންދާ މަޝްވަރާތައް މިހާރު އޮތީ ކޮން މަރުހަލާއެއްގައިކަން ވެސް ހާމައެއް ނުކުރައްވައެވެ.

ބުރާސްފަތި ދުވަހު އިންޑިއާގައި ބޭއްވި ނޫސްވެރިންގެ ބައްދަލުވުމެއްގައި އިންޑިއާގެ އެކްސްޓާނަލް އެފެއާޒް މިނިސްޓްރީގެ ސްޕޯކްސްޕާސަން ރަންދިރް ޖައިސްވާލް އާއި އެކަމާއި ގުޅޭގޮތުން ނޫސްވެރިން ވަނީ ސުވާލުކޮށްފައެވެ. އެ ސުވާލަށް ޖަވާބުދެއްވަމުން އޭނާ ވިދާޅުވީ އެފްޓީއޭ އަށް އިންޑިއާއިން އެދިފައިވާ ކަމަށް ބުނާ ރިޕޯޓްތައް ރާއްޖޭގެ މީޑިއާތަކުން ފެނިފައިވާ ކަމަށެވެ. އެހެންނަމަވެސް އިންޑިއާއިން އެފަކަމަކަށް އެދިފައި ނުވާނެ ކަމަށް އޭނާ ވަނީ ވިދާޅުވެފައެވެ.

އޭނާގެ ވާހަކައިން ދޭހަވާ ގޮތުން މިހާތަނަށް އެފަދަ އެއްބަސްވުމެއް ހުށަހަޅާފައެއް ނެތެވެ. ރާއްޖެއިން މިހާތަނަށް ފްރީޓްރޭޑް އެއްބަސްވުމެއް އެކުލަވާލީ ޗައިނާ އާއި އެކު އެކަންޏެވެ. 20 ވަނަ މަޖިލީހުގެ މަސައްކަތްތައް ފެށުމާއި އެކު ޗައިނާ އާއި އެކުވެފައިވާ ފްރީޓްރޭޑް އެގްރިމެންޓް އެއްބަސްވުމަށް ޢަމަލުކުރަން ފާސްކުރަން ފޮނުވާނެކަން އިކޮނޮމިކް މިނިސްޓްރީން ވަނީ ހާމަކޮށްފައެވެ. އިކޮނޮމިކް މިނިސްޓަރ މުހައްމަދު ސައީދު ވަނީ ޗައިނާއާއެކު ޤާއިމްކޮށްފައިވާ މިނިވަން ވިޔަފާރީގެ އެއްބަސްވުމުގެ ދަށުން ރާއްޖެއަށް ގިނަ ފައިދާތަކެއއް ވާނެކަމަށް ފާހަގަކުރައްވާފައެވެ. އެގޮތުން 200 އަށް ވުރެ ގިނަ ސީފުޑްގެ ބާވަތްތައް ޓެރިފްއަކާއި ނުލާ ޗައިނާ އިން ރާއްޖެއަށް އެެތެރެކުރެވޭނެ ކަމަށާއި އެ ނޫން ގިނަ ފައިދާތައް ވެސް އެ އެއްބަސްވުމުގެ ސަބަބުން ލިބިގެންދާނެ ކަަމަށް އެ މަނިކުފާނު ވިދާޅުވިއެވެ އެ އެއްބަސްވުމަށް ޢަމަލުކުރުމާއި މެދު ގޮތެއް ނިންމުމަށް 20 ވަނަ މަޖިލިސް ފެށުމާއި އެކު ފޮނުވާނެ ކަމަށް މިނިސްޓަރ ވިދާޅުވިއެވެ. އެހެންކަމުން މިއަހަރުތެރޭގައި އެ އެއްބަސްވުމަށް އަމަލުކުރަން ފެށޭނެކަމަށް އެމަނިކުފާނު ވިދާޅުވިއެވެ.

އެ ނޫސްވެރިންގެ ބައްދަލުވުމުގައި މިނިސްޓަރ ވަނީ ތުރުކީ އާއި އެކު ޕްރިފަރެންޝަލް ޓްރޭޑް އެގްރިމެންޓެއްގެ މަސައްކަތް ކުރުމަށް މަޝްވަރާކޮށްފައިވާ ކަމަށް ވެސް ވިދާޅުވެފައެވެ.