މިސަރުކާރުން ގައުމު ލޫޓުވަނީ، ރަސްމީ ދަތުރުތަކުގެ ފައިދާއެއް ނުފެނޭ: މެންބަރު ފަލާހު
20 މެއި 2024 | ހޯމަ 09:35ގައުމުގެ މުސްތަގުބަލު ކުރިއަށް އޮތްތަނުގައި ރަނގަޅުވާ މަންޒަރެއް ނުފެނޭ
މާފަންނު ހުޅަނގު ދާއިރާގެ މެންބަރު މުހައްމަދު ފަލާހު
މިސަރުކާރުގެ ބޭފުޅުން ބޭރުގެ ގައުމުތަކަށް ކުރައްވާ ރަސްމީ ދަތުރުފުޅުތަކުގެ ފައިދާއެއް މިގައުމަށް ނުކުރާ ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ވިދާޅުވެއްޖެއެވެ.
އޭނާ މިހެން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
މެންބަރު ފަލާހު ވިދާޅުވީ ސަރުކާރުގެ ބޭފުޅުންގެ އިތުރުން ރައީސް ޑރ.މުހައްމަދު މުއިއްޒު ވެސް ބޭރުގެ ގައުމުތަކަށް ރަސްމީ ދަތުރުފުޅުތަކެއް ކުރައްވާފައިވާ ކަމަށެވެ. ނަމަވެސް އެދަތުރުފުޅުތަކުގެ ފައިދާއެއް ރާއްޖެއިން ނުފެންނަ ކަމަށް މެންބަރު ފަލާހު ވިދާޅުވިއެވެ.
ރައީސް މުއިއްޒު ތުރުކީއަށް ކުރެއްވި ދަތުރުފުޅަށް އިޝާރާތް ކުރައްވައި މެންބަރު ފަލާހު ވިދާޅުވީ އެދަތުރުފުޅު ނިންމަވާލައްވާ ރާއްޖެ ވަޑައިގެން ނޫސްވެރިންނަށް މައުލޫމާތު ދެއްވަމުން ހަނޑޫ، ހަކުރު، ފުށް ސަރުކާރުގެ ފަރާތުން ހަދިޔާ ކުރާނެ ކަމަށް އިއުލާން ކުރެއްވި ކަމަށެވެ. އެއީ ތުރުކީއިން ހަދިޔާ ކުރި އެއްޗެއް ކަމަށް ގިނަ ބަޔަކު ގަބޫލުކުރި ނަމަވެސް، އެންމެފަހުން އެ ވެސް ހަދިޔާ ކުރީ އިންޑިއާއިން ކަމަށް މެންބަރު ފަލާހު ވިދާޅުވިއެވެ. އަދި ވިދާޅުވީ މިސަރުކާރުގެ ބޭފުޅުން ވަރަށް ބޮޑަށް އިންޑިއާއަށް ފާޑުވިދާޅުވި ނަމަވެސް އަބަދުވެސް އެންމެ ކައިރިން އެހީތެރިކަން ފޯރުކޮށްދެނީ އިންޑިއާއިން ކަމަށެވެ.
މެންބަރު ފަލާހު ވިދާޅުވީ މިސަރުކާރުގައި ގައުމުގެ މުސްތަގުބަލު ކުރިއަށް އޮތްތަނުގައި ރަނގަޅުވާ މަންޒަރު ފެނިވަޑައިނުގަންނަވާ ކަމަށެވެ. ނަމަވެސް މިސަރުކާރުގެ ބޭފުޅުންގެ މުސްތަގުބަލު ރަނގަޅުވެދާނެ ކަމަށް އޭނާ ވިދާޅުވިއެވެ. އަދި މިސަރުކާރުން މިގައުމު ލޫޓުވަމުންދާ ކަމަށް މެންބަރު ފަލާހު ތުހުމަތު ކުރެއްވިއެވެ.
