ބްރެޒިލްގެ ރިޔާސީ ގަނޑުވަރުން ގެއްލިފައިވާކަމަށް ބުނި އެތައް ޑަޒަން ފަރުނީޗަރު އައިޓަމް ތައް ފެނިފައިވާ ކަމަށް ބްރެޒިލް ސަރުކާރުން ބުނެފިއެވެ. 261 ފަރުނީޗަރު އައިޓަމް މަދުކަމަށް ރިޕޯޓް ކޮށްފައިވަނީ މިހާރުގެ ރައީސް ލުއީސް އިނާސިއޯ ލޫލާ ޑަސިލްވާ 2023ގެ ޖަނަވަރީ މަހު އަލުން ވެރިކަމާ ހަވާލުވެ ވަޑައިގެންނެވުމަށް ފަހުއެވެ. އަދި ލޫލާ ޑަސިލްވާ ވަނީ އޭނާގެ ކުރިން ރައީސް ކަމުގައި ހުންނެވި ޖައީރު ބޮލްސޮނާރޯ އެތަކެތި ގެންދެވީކަމަށް ތުހުމަތު ކުރައްވާފައެވެ. އޭގެ ފަހުން ވަނީ ސަރުކާރު ފައިސާއިން 40 ހާސް ޑޮލަރު ހޭދަކުރައްވައިގެން ގަޑުވަރަށް އައު ލަގްޒަރީ ފަރުނީޗަރު ހޯއްދަވާފައެވެ.

ކުރީގެ ފަރުނީޗަރުތައް ފެނުނީ ގަނޑުވަރުގެ ކޮންތަނެއްގަ ހުއްޓާތޯ ސަރުކާރުން ބުނެފައެއް ނުވެއެވެ.

މިމައްސަލައިގައި ބޮލްސޮނާރޯވަނީ ދޮގުފެތުރުއްވީތީ ލޫލާ ޑަސިލްވާ ޖަވާބުދާރީ ވާންޖެހޭނެ ކަމަށް ވިދާޅުވެފައެވެ. އަދި ބޮލްސޮނާރޯގެ އަނބިކަނބަލުން މިޝޭލް ބޮލްސޮނާރޯ ވަނީ އެއީ ސަރުކާރުގެ ފައިސާއިން އަގުބޮޑު އައު ލަގްޒަރީ ފަރުނީޗަރު ހޯއްދެވުމަށް ލޫލާ ޑަސިލްވާ ޖެއްސެވި "ސްމޯކް ސްކްރީން" އެއް، ނުވަތަ ހެއްދެވި މަކަރެއް ކަމަށް ވިދާޅުވެފައެވެ.

އޮކްޓޯބަރު 2022 ގައި އޮތް ރިޔާސީ އިންތިޚާބްގައި ދެބޭފުޅުން ވާދަ ކުރައްވާފައިވަނީ ވަރަށް ގާތްގާތުންނެވެ. އަދި ލޫލާ ޑަސިލްވާ އަށް އިންތިޚާބް ކާމިޔާބް ވުމުން ބޮލްސޮނާރޯގެ ސަޕޯޓަރުން ހަމަނުޖެހުން އުފައްދާ ސަރުކާރުގެ އިދާރާތަކަށް ގެއްލުންދީ ހަދާފައި ވެއެވެ. އަދި މިއީ ބަޤާވާތެއް ގެންނަން ކުރެވުނު މަސައްކަތެއް ކަމަށް ލޫލާ ޑަސިލްވާ ވިދާޅުވެފައި ވެއެވެ.

އަނެއްކޮޅުން ބޮލްސޮނާރޯ ވަނީ މަގާމުން ވަކިވެ ވަޑައިގެންނެވިފަހުން އޭނާއަށް ވަރަށް ބޮޑަށް ސިޔާސީ ފިއްތުންތައް ކުރިމަތި ކުރަމުން ދާކަމަށް ވިދާޅުވެފައެވެ. އަދި 8 އަހަރުވަންދެން އޭނާއަށް އިންތިޚާބަށް ކުރިމަތި ނުލެއްވޭނެ ގޮތްވެސް ވަނީ ހަދާފައެވެ.