"ރަސްއައިން" މޮބައިލް އެޕްލިކޭޝަން ލޯންޗުކޮށްފި
ކަނޑުދަތުރުކުރާ ފަރާތްތަކަށް ބޭނުންވާ މުހިންމު ގިނަ މައުލޫމާތުތަކެއް ހިމަނާފައިވޭ
ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ، ޑރ. މުހައްމަދު މުއިއްޒު "ރަސްއައިން" މޮބައިލް އެޕްލިކޭޝަން ލޯންޗްކޮށްދެއްވަނީ
ދިވެހިރާއްޖޭގެ ކަނޑުގެ ސަރަހައްދުގައި ކަނޑުދަތުރުކުރާ ފަރާތްތަކަށް އެހީއެއްގެ ގޮތުގައާއި، ދިވެހި ކަނޑުތައް ރައްކާތެރިކަމާއެކު ހިމާޔަތްކުރުމަށް ކުރެވޭ މަސައްކަތަށް ފަސޭހަކުރުމުގެ ގޮތުން "ރަސް އައިން" ނަމުގައި މޯބައިލް އެޕްލިކޭޝަނެއް ލޯންޗުކޮށްފިއެވެ.
"ރަސް އައިން" މޯބައިލް އެޕްލިކޭޝަން ލޯންޗުކޮށްދެއްވާފައިވަނީ، މާފަރު އިންޓަރނޭޝަނަލް އެއަރޕޯޓްގައި ހުކުރު ދުވަހުގެ ރޭ ބޭއްވި އެމްއެންޑީއެފް އެއަރ ކޯރ އިފުތިތާހުކޮށް، އަންމޭންޑް އޭރިޔަލް ވެހިކަލް (ޔޫއޭވީ) ސިފައިންގެ ޚިދުމަތަށް ތައާރަފުކުރުގެ ރަސްމިއްޔާތުގައި، ދިވެހިރާއްޖޭގެ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުހައްމަދު މުއިއްޒެވެ.
"ރަސްއައިން" މޯބައިލް އެޕްލިކޭޝަނަކީ، ރާއްޖޭގެ މަސްވެރިންނާއި، ރާއްޖެ ސަރަހައްދުން ދަތުރުކުރާ ކަނޑު އުޅަނދުފަހަރާއި، އަދި މި ކަނޑުން ނަފާ ހޯދުމުގައި ހަރަކާތްތެރިވާ އެކިއެކި ސިނާއީ މަސައްކަތްތަކުގައި ހަރަކާތްތެރިވާ ފަރާތްތަކާއި، ދިވެހިރާއްޖޭގެ ކަނޑުތަކުގެ ސަލާމަތާއި ރައްކާތެރިކަން ބެލެހެއްޓުމުގައި ކޯސްޓްގާޑުން ކުރާ މަސައްކަތަށް އެހީއެއްގެ ގޮތުގައި، ޓެކްނޮލޮޖީގެ މަންސަތަކުގައި ބޭނުން ހިފުމަށް އުފައްދާފައިވާ އެޕްލިކޭޝަނެކެވެ. އެންޑްރޮއިޑް އަދި އައިއޯއެސްއަށް ފަރުމާކޮށްގެން ލޯންޗުކުރި މި އެޕްލިކޭޝަނުގައި ކަނޑުދަތުރުކުރާ ފަރާތްތަކަށް ބޭނުންވާ މުހިންމު ގިނަ މައުލޫމާތުތަކެއް ހިމަނާފައިވާ ކަމަށް އެމްއެންޑީއެފުން ބުނެއެވެ.
އެގޮތުން، މި އެޕްލިކޭޝަނުގައި ރާއްޖޭގެ މެޕާއެކު މޯލްޑިވްސް މީޓިއޮރޮލޮޖިކަލް ސަރވިސްއިން ނެރޭ މޫސުމީ އިންޒާރުފަދަ މުހިންމު މައުލޫމާތުތައް ހިމަނާފައިވެއެވެ. އަދި ކަނޑުދަތުރުފަތުރު ކުރާ އުޅަނދުފަހަރުން ފޮނުވާ މެސެޖުތަކާއި، ކުއްލި ހާލަތްތަކުގައި ފޮނުވާ ޑިސްޓްރެސް، ކޯސްޓްގާޑުގެ ޕުޝް މެސެޖުތައް ވެސް މި އެޕްލިކޭޝަނުން ބެލޭނެކަމަށް އެމްއެންޑީއެފުން ބުނެއެވެ.
އެމްއެންޑީއެފުން ބުނީ ކުރިއަށްއޮތް ތަނުގައި، ކަނޑު ދަތުރުފަތުރުކުރާ ފަރާތްތަކުން ފޯރުކޮށްދޭ މައުލޫމާތުގެ އަލީގައި، އެޕް ތަރައްގީކުރުމަށްޓަކައި، ކަމާގުޅުންހުރި އަދި ފައިދާހުރި ބަދަލުތަކާއި އިތުރު އަޕްޑޭޓްތައް ގެނައުމަށް ހަމަޖެހިފައިވާކަމަށެވެ.
