މާފުށީ ބިން ހިއްކުން މިއަހަރުގެ ތެރޭގައި ފެށުން ފަހަރެއްގައި "އަންލައިކްލީ" ވެދާނެ: ޑރ މުއިއްޒު
މާފުށީގައި ޑޮލަރު އޭޓީއެމްއެއް ބެހެއްޓުމަކީ ސަރުކާރުގެ ވައުދެއް
ރައީސް ޑރ މުޙައްމަދު މުއިއްޒު
މާފުށީ ބިން ހިއްކުމުގެ މަޝްރޫއު މި އަހަރުގެ ތެރޭގައި ފެށުމަކީ ވުމަށްވުރެ، ނުވުން ގާތް ކަމެއްކަމަށް ރައީސް ޑރ މުޙައްމަދު މުއިއްޒު ވިދާޅުވެއްޖެއެވެ.
ރައީސް އެހެން ވިދާޅުވީ، މާފުށްޓަށް ރައީސް ވެވަޑައިގެންނެވި ބައެއް ވަޢުދާ ބެހޭގޮތުންނާއި ޑޮލަރު ލިބުމުގެ ދަތިކަން ޙައްލުކުރުމާ ގުޅޭގޮތުން ދެންނެވި ސުވާލަށް ދެއްވި ޖަވާބުގައެވެ.
ރައީސް ވިދާޅުވީ، މާފުށީގައި ޑޮލަރު އޭޓީއެމްއެއް ބެހެއްޓުމަކީ ސަރުކާރުގެ ވައުދެއް ކަމަށާއި އެއީ ކޮންމެހެން ކުރަންޖެހޭ ކަމެއްކަމަށެވެ.
އަމާޒަކީ ބޭންކް އޮފް މޯލްޑިވްސްއާ ވާހަކަ ދައްކައިގެން މި އަހަރުގެ ތެރޭގައި ވިހާ ވެސް އަވަަހަށް އޭޓީއެމް ބެހެއްޓުންކަމަށް ރައީސް ވިދާޅުވިއެވެ.
އެހެންނަމަވެސް މާފުށީ ބިން ހިއްކުމުގެ މަޝްރޫއު މި އަހަރުގެ ތެރޭގައި ފެށުމަކީ ނުވުން ގާތް ކަމެއްކަމަށް ރައީސް ވިދާޅުވިއެވެ. އަދި ވެރިކަމުގެ އެންމެ ފަހު އަހަރާ ޖެހެންދެން މަޑު ނުކުރައްވާނެކަމަށް ވެސް ރައީސް ވިދާޅުވިއެވެ.
ރައްޔިތުންނަށް ކުރިމަތިވެފައިވާ ބިމުގެ ދަތިކަމަށް ހައްލެއް ހޯދުމަށް މިދިޔަ ސަރުކާރުން އެމްޓީސީސީއާ ޙަވާލުކޮށްގެން ކުރިއަށް ގެންދިޔަ މަޝްރޫއުތަކުގެ ތެރެއިން ވެސް މާފުށީގެ ބިން ހިއްކާފައިވެއެވެ.
މާފުށީގައި އަލަށް ހިއްކާފައިވަނީ 25 ހެކްޓަރުގެ ބިމެވެ. އެއީ މާފުއްޓާ ކައިރިން އެ ރަށު ފަޅުގައި ހިއްކި ބިމެކެވެ. ނިމިދިޔަ ސަރުކާރުން ބުނެފައިވަނީ އަލަށް ހިއްކި ބިން ބޭނުން ކުރާނީ ހަމައެކަނި ގޯތި ދޫކުރުމަށް އެކަންޏެއް ނޫންކަމަށެވެ.
މާފުށީ ކައުންސިލްގެ ލޭންޑް ޔޫސް ޕްލޭންގައިވާގޮތުން ފަތުރުވެރިކަމަށް ތިން ޒޯނެއް ވެސް ވަނީ ހާއްސަކޮށްފައެވެ.
