ލިވަޕޫލަށް ކުޅެމުން އަންނަ މިޞްރުގެ ފޯވާޑް މުޙައްމަދު ޞަލާޙު އަށް ފުރައްސާރަކޮށް، ދިމާކޮށްލި ސަޕޯޓަރަކު ސަސްޕެންޑުކޮށްފި އެވެ.
މިދިޔަ އަހަރުގެ އޮކްޓޫބަރު މަހުގެ 21 ވަނަ ދުވަހު ލިވަޕޫލުން އެވަޓަންއާ ދެކޮޅަށް ކުޅުނު މެޗުގައި، ޖޯލް ބާވައިޒް ނަމަކަށް ކިޔާ ސަޕޯޓަރަކު ވަނީ ޞަލާޙުއާ ދިމާކޮށްލައިފަ އެވެ. ލިވަޕޫލްގެ އެންފީލްޑުގައި ކުޅުނު އެ މެޗުގައި ޞަލާޙު ދެ ލަނޑު ޖެހިއިރު، އޭނާގެ ނަން ގޮވި ވަގުތުގައި ބާވައިޒް ވަނީ ޞަލާޙުއާ ދިމާކޮށް، އަޑުގަދަ ކޮށްފަ އެވެ.
އެވަޓަންގެ ސަޕޯޓަރު ބާވައިޒް ވަނީ 1985 ވަނަ އަހަރުގެ ޔޫރަޕިއަން ކަޕް ފައިނަލުގެ ކުރިން، 39 ސަޕޯޓަރުން މަރުވި ހާދިސާއާ ބެހޭ ގޮތުން ވެސް ސަޕޯޓަރުންނާ ފުރައްސާރަ ކޮށްފައި ކަމަށް މީޑިއާ ތަކުން ވަނީ ރިޕޯޓުކޮށްފަ އެވެ. ސެފްޓަން މެޖިސްްޓްރޭޓް ކޯޓުން ވަނީ ބާވައިޒް އަށް ތިން އަހަރު ދުވަހުގެ ސަސްޕެންޝަނެއް ދީފަ އެވެ. މީގެ އިތުރުން އޭނާ ވަނީ 500 ޕައުންޑުން ޖޫރިމަނާ ވެސް ކޮށްފަ އެވެ.
ކްރައުން ޕްރޮސެކިއުޝަން ސާވިސް (ސީޕީއެސް) އިން ބުނީ އޭނާގެ ފަރާތުން ފެނުނީ މެޗުގައި ނަސްލީ ގޮތުން ފުރައްސާރަކޮށް، އެހެނިހެން އިޝާރާތްތައް ކުރި މަންޒަރު ކަމަށެވެ. މާސީސައިޑްގެ ފުލުހުން ވަނީ އޭނާ ދެނެގަތުމުން ސީސީޓީވީގެ ކެމެރާ ފުޓޭޖް ބެލުމަށްފަހު ހައްޔަރުކޮށްފަ އެވެ.
އޭނާ ސަސްޕެންޑު ކުރުމުގެ އަމުރާއެކު، އެ މުއްދަތުގެ ތެރޭގައި އިނގިރޭސިވިލާތުގެ އެއްވެސް ފުޓްބޯޅަ މެޗެއް ބެލުމަށް އޭނާ އަށް ދަނޑަށް ނުވަދެވޭނެ އެވެ. މީގެ އިތުރުން ވެސް އޭނާއާ ދެކޮޅަށް ވަނީ އެހެނިހެން ފިޔަވަޅުތައް އަޅައިފަ އެވެ.
