ޕެނަލްޓީގައި ވިސެލް ކޯބް އަތުން މިއާމީ ބަލިވެއްޖެ

އައު ސީޒަނަށް ތައްޔާރުވުމުގެ ގޮތުން އެމެރިކާގެ އިންޓަ މިއާމީން، ޖަޕާންގެ ވިސެލް ކޯބާ ދެކޮޅަށް ކުޅުނު މެޗުން ބަލިވެއްޖެ އެވެ.

ޖަޕާންގެ ޤައުމީ ސްޓޭޑިއަމްގައި ބުދަ ދުވަހުގެ މެންދުރު ކުޅުނު މެޗުގެ ފުރިހަމަ ވަގުތު ހަމަވީއިރު، އެއްވެސް ޓީމަކަށް ލަނޑެއް ނުޖެހެ އެވެ. އެހެންވެ، ނަތީޖާ ނެރުމަށް ވަނީ ސީދާ ޕެނަލްޓީ ޖަހައިފަ އެވެ. ޕެނަލްޓީގައި ވިސެލް ކޯބް އަތުން މިއާމީ ބަލިވެފައި ވަނީ 4-3 ގެ ނަތީޖާ އަކުންނެވެ.

އިންޓަ މިއާމީން ވަނީ މެޗުގެ ފުރަތަމަ 11 ގައި އުރުގުއޭގެ ފޯވާޑް ލުއިސް ސުއަރޭޒް ހިމަނައިފަ އެވެ. އޭނާގެ އިތުރުން ޖޯޑީ އަލްބާ އަދި ސާޖިއޯ ބުސްކެޓްސް އަށް ވެސް ވަނީ ފުރަތަމަ 11 އިން ޖާގަ ދީފަ އެވެ. މިއާމީން އެންމެ ފަހުން ހޮންގް ކޮންގް ގައި ކުޅުނު މެޗުގައި އެ ޓީމުގެ ކެޕްޓަން ލިއޮނަލް މެސީ ނުކުޅުނު ނަމަވެސް، ވިސެލް ކޯބާ ދެކޮޅަށް އޭނާ ކުޅުނެވެ. މެސީ ކުޅެން ނިކުމެފައި ވަނީ މެޗުގެ 60 ވަނަ މިނެޓުގައި، ޑޭވިޑް އޮޗޯގެ ބަދަލުގަ އެވެ.

ނަތީޖާ ނެރުމަށް ޖުމުލަ ހަ ޕެނަލްޓީ ޖެހިއިރު، މިއާމީ އަށް ކާމިޔާބު ކުރެވުނީ ތިން ޕެނަލްޓީ އެވެ. އެއީ ލިއޮނާޑޯ ކަމްޕަނާ، ހޫލިއަން ގްރެސެލް އަދި ޖޯޑީ އަލްބާގެ ޕެނަލްޓީ އެވެ، ނާކާމިޔާބު ވެފައި ވަނީ ރޮބާޓް ޓޭލާ، ނޯހް އަލެން އަދި ގްރެގޯގެ ޕެނަލްޓީ އެވެ. ހަ ޕެނަލްޓީގެ ތެރެއިން ވިސެލް ކޯބް އިން ވަނީ ހަތަރު ޕެނަލްޓީ ކާމިޔާބު ކޮށްފަ އެވެ. އެއީ ޔުޔާ އޮސާކާ، ތައިސޭ މިޔަޝިރޯ، ކޯޔާ ޔުރްކީ އަދި ނަންސެއި ލިނޯގެ ޕެނަލްޓީ އެވެ. އެ ޓީމުން ނާކާމިޔާބުވީ ހޮތަރޫ ޔަމަގޫޗީ އަދި ރިޔޯ ހަތްސޫސްގެ ޕެނަލްޓީ އެވެ.

އައު ސީޒަނަށް ތައްޔާރުވުމުގެ ގޮތުން މިހާތަނަށް މިއާމީން ވަނީ ހަތް މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ އެންމެ މެޗަކުންްނެވެ. ފަސް މެޗުން ބަލިވެފައިވާއިރު، އެއް މެޗު ނިމުނީ އެއްވަރުވެގެންނެވެ.