މަޖިލީހަށް ހޮވާ މެންބަރުންނަކީ ފައިސާއަށް ނުވިކޭ ބަޔަކަށްވާންޖެހޭ: ސަނީފް

ކުރިޔަށް އޮތް 20 ވަނަ ރައްޔިތުންގެ މަޖިލީހަށް މެންބަރުން އިންތިޚާބުކުރާއިރު އެ މީހަކީ ފައިސާއަށްޓަކައި ޕާޓީން ވަކިވެގެންދާނެ މީހަކުތޯ ރައްޔިތުން ރަނގަޅަށް ބަލަންޖެހޭކަމަށް ތިނަދޫ ދެކުނު ދާއިރާގެ މެންބަރު އަބްދުﷲ ސަނީފް ވިދާޅުވެއްޖެއެވެ.

ބުދަ ދުވަހުގެ ރޭ އެމްޑީޕީގެ ހަރުގެ ޖަލްސާގައި ވާހަކަދައްކަވަމުން ސަނީފް ވިދާޅުވީ ރައްޔިތުންގެ މަޖިލީހަކީ މިހާރަށްވުރެ ބޮޑަށް ތަސައްރަފުފުދިފައިވާ ތަނަކަށްވާންޖެހޭކަމަށެވެ. އެތަނަށް ހޮވޭ މީހުންނަކީ ފައިސާއަށް ގަނެވިިކޭ ބަޔަކަށް ވެގެންނުވާނެކަމަށް ސަނީފް ވިދާޅުވިއެވެ.

ސަނީފް ވިދާޅުވީ ކުރިޔަށް އޮތް އެމްޑީޕީގެ ޕްރައިމަރީގައި މަޖިލީހުގެ ޓިކެޓް ދޭނެ މީހެއް ރައްޔިތުން ހޮވާއިރުވެސް އެމީހަކީ ޕާޓީއަށް ކިހާ އިހުލާސްތެރި މީހެއްތޯ އާއި ޕާޓީއަށް ކިހާ މަސައްކަތްތަކެއްކޮށްފައިވާ ޕާޓީ ދޫކޮށް ނުދާނެ މީހެއްކަން ރައްޔިތުން ޔަގީންކުރަން ޖެހޭކަމަށް ސަނީފް ވިދާޅުވިއެވެ. ވަކިން ޚާއްސަކޮށް މިހާރުގެ ސަރުކާރުން ރައްޔިތުންގެ މަޖިލީހުގެ މެންބަރުން ގަތުމުގެ މަސައްކަތް ކުރާއިރު މިއީ ވިސްނަންޖެހޭކަމެއްކަމަށް ސަނީފް ވިދާޅުވިއެވެ.

ސަނީފް ވިދާޅުވީ ކުރިޔަށް އޮތީ އަނިޔާވެރި ދުވަސްތަކެއްކަމަށާއި އެހެންކަމުން އެ އަނިޔާވެރިކަމުން ގައުމު ސަލާމަތްކުރުމަށް 20 ވަނަ ރައްޔިތުންގެ މަޖިލީސް ވަރަށް މުހިންމު ކަމަށެވެ.

އެމްޑީޕީގެ ޕާލަމަންޓްރީ ގްރޫޕުން މި ސަރުކާރުގެ ބައެއް ވަޒީރުންނަށް ރުހުން ނުދޭން ނިންމުމާއެކު ސަރުކާރުގެ އިސްވެރިންތަކެއް މަޖިލީސް ކައިރީގައި މުޒާހަރާކުރިއިރު މަޖިލީހުގެ މެމްބަރުންނަށް އެދުވަހު ބިރު ދައްކާ އަނިޔާކޮށްފައިވާކަމަށް ސަނީފް ވިދާޅުވިއެވެ.

ސަނީފް ވިދާޅުވީ މި ސަރުކާރުން ވެރިކަމަށް އައުމަށް ރައްޔިތުން ކައިރީ ހައްދުފަހަނައަޅާވަރަށް ދޮގު ހެދިކަމަށާއި ނަމަވެސް މިހާރު މަޑުމަޑުން އެކަންކަން ރައްޔިތުންނަށް ސާފުވާން ފަށައިފިކަމަށެވެ.