މާލެ އާއި ރަސްމާލެ ގުޅުވާލަނީ ކަނޑުއަޑީ ޓަނަލަކުން ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިނަމަވެސް، ސަރުކާރުން ކުރިން ބުނެފައިވަނީ މާލެ އާއި ރަސްމާލެއާ ދެމެދު ބާއްވާނީ ހައިޑްރޮފޮއިލް ހައިސްޕީޑް ފެރީކަމަށެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން އެމްބެސެޑާ އެޓް ލާޖު މުހައްމަދު ހުސެއިން ޝަރީފު (މުންދު) މީގެ ކުރިން ވިދާޅުވެފައިވަނީ ފުށިދިއްގަރުފަޅު ހިއްކިގެންދާއިރު، އެތަނުގައި ފެރީ ގިމަތައެއް ހުންނަންޖެހޭކަމަށެވެ.
އަދި މަޝްވަރާ ކުރަމުންދަނީ ހައިޑްރޯފޮއިލް ހައިސްޕީޑުގައި މާލެއިން ރަސްމާލެއަށް ދެވޭނެ އިންތިޒާމެއް ހަމަޖެއްސުމަށްކަމަށް އޭނާ ވިދާޅުވިއެވެ.
އޭނާ ވިދާޅުވި ގޮތުގައި ހައިޑްރޯފޮއިލް ހައިސްޕީޑުގައި މާލެއިން ރަސްމާލެއަށް ދިއުމަށް ހޭދަވާނެކަމަށް ބެލެވެނީ ހައެއްކަ ނުވަތަ އަށެއްކަ މިނެޓެވެ.
ވުމާއެކު، ފުށިދިއްގަރުފަޅު ހިކެމުންދާ ވަރަކަށް އެ ހިދުމަތްތައް ވެސް ގާއިމުކުރެވެމުންދާނީ އަވަސް ސްޕީޑެއްގައިކަން އޭރު މުންދު ފާހަގަކުރައްވާފައިވެއެވެ.
އެހެންނަމަވެސް ކުއްލި ގޮތަކަށް ރައީސް މިވަނީ މާލެ އާއި ރަސްމާލެ ގުޅުވައިލައްވާނީ ކަނޑު އަޑިން އަޅާ ޓަނަލަކުން ކަމުގައި އިއުލާނުކުރައްވާފައެވެ. އެގޮތުން މި މަސައްކަތް ކުރުމަށްޓަކައި އެކަމުގެ ޤާބިލްކަން ހުރި ކުންފުނިތަކާ އެކު މިހާރު މަޝްވަރާކުރައްވާ ފީޒިބިލިޓީ މަސައްކަތް ފަށާފައިވާކަމަށް ރައީސް ވިދާޅުވިއެވެ.
