ޤާނޫނީ އެހީތެރިކަން ފޯރުކޮށްދިނުމުގެ ނިޒާމް ރިވިއުކޮށް، މަޖިލީހުގެ އެހީތެރިކަމާއެކު ބަދަލުތައް ގެންނަން ޖެހޭ - އުއްތަމަ ފަނޑިޔާރު
ޖިނާއީ އަދުލުގެ ނިޒާމް ރަނގަޅުކުރުމާމެދު އުއްތަމަފަނޑިޔާރު ވާހަކަފުޅު ދެއްކެވި
އުއްތަމަ ފަނޑިޔާރު، އަހުމަދު މުއުތަސިމް އަދުނާން
ޤާނޫނީ އެހީތެރިކަން ފޯރުކޮށްދިނުމުގެ ނިޒާމް ރިވިއުކޮށް، ޤާނޫނީ އެހީތެރިކަން ފޯރުކޮށްދިނުމުގައި ދިމާވާ މައްސަލަތައް ހައްލުކުރުމަށް މަޖިލީހުގެ އެހީތެރިކަމާއެކު މަސައްކަތް ކުރަން ޖެހޭ ކަމަށް އުއްތަމަ ފަނޑިޔާރު މުޢުތަސިމް އަދުނާން ވިދާޅުވެއްޖެއެއެވެ.
ގަޟާއީ އައު އަހަރު ފެށުމުގެ ގޮތުން ބޭއްވި ރަސްމިއްޔާތުގައި އުއްތަމަ ފަނޑިޔާރު ވަނީ ޖިނާއީ އަދުލުގެ ނިޒާމް ރަނގަޅުކުރުމަށް ކުރަން ޖެހޭ މަސައްކަތްތަކާމެދު ވާހަކަފުޅު ދައްކަވާފައެވެ. އެމަނިކުފާނު ވިދާޅުވީ ކޮންމެ މީހެއްގެ ވެސް މަދަނީ ހައްގުތަކާއި ވާޖިބުތައް ކަނޑައެޅުމުގައި އާއި ޖިނާއީ ދައުވާ މީހެއްގެ މައްޗަށް އުފުލުމުގައި ޤާނޫނަކުން ޤާއިމްކޮށްފައިވާ މިނިވަން އަދި މުސްތަޤިއްލު ކޯޓެއްގައި ނުވަތަ ޓްރިބިއުނަލްއެއްގައި އެކަށީގެންވާ މުއްދަތެއްގެ ތެރޭގައި ޝަރީއަތްކުރެވުމަކީ ޤާނޫނު އަސާސީން ކަށަވަރުކޮށްދީފައިވާ ހައްގެއް ކަަމަށެވެ. ހަމައެހެންމެ އެ ޝަރީއަތްކުރިއަށް ދަނީ އަދުލުވެރިކަމާއި ހާމަކަމާއެކު ކަމަށް ވުމަކީ ވެސް ކޮންމެ މީހަކަށް ލިބިދީފައިވާ ހައްގެއްކަން އެމަނިކުފާނު ވަނީ ފާހަގަކުރައްވާފައެވެ.
ހަމައެއާއެކު ހައްޔަރުކުރެވޭ ހިނދުން ފެށިގެން އެ މައްސަލަ ނިމެންދެން ޤާނޫނީ ވަކީލެއްގެ އެހީތެރިކަން ދެމެހެއްޓުމުގެ ފުރުސަތު ފަހިކޮށްދިނުމަކީ ޤާނޫނު އަސާސީއިން ކަނޑައަޅާފައިވާ އަސާސީ ހައްގެއްކަމަށް ވެސް އެމަނިކުފާނު ވިދާޅުވިއެވެ. އަދި ޖިނާއީ ބޮޑެތި މައްސަލަތަކުގައި ތުހުމަތުކުރެވޭ ފަރާތްތަކުގެ ތެރެއިން ވަކީލެއްގެ އެހީތެރިކަން ހޯދޭ ފަދަ މާލީ ތަނަވަސްކަން ނެތް ފަރާތްތަކަށް ދައުލަތުން ޤާނޫނީ ވަކީލަކު އައްޔަންކޮށްދިނުމަކީ ދައުލަތުގެ ޒިންމާ އެއް ކަމަށް އުއްތަމަ ފަނޑިޔާރު ވިދާޅުވިއެވެ. އެމަނިކުފާނު އިތުރަށް ވިދާޅުވީ އެކަށީގެންވާ ގޮތުގައި އެ ހައްގު ކަށަވަރުކުރުމުގެ ގޮތުން ޚާއްސަ ރައްކާތެރިކަމެއް ލިބެން ޖެހޭ ފަރާތްތަކަށް ޤާނޫނީ އެހީތެރިކަން ފޯރުކޮށްދިނުމަށްޓަކައި މިހާރު ޤާއިމްކޮށްފައިވާ ނިޒާމް ރިވިއުކުރަން ޖެހޭ ކަމަށެވެ. އަދި ޤާނޫނު ހަދާ މަޖިލީހުގެ އެހީތެރިކަމާއެކު އެފަދަ ފަރާތްތަކަށް ބޭނުންވާ އެހީތެރިކަން ލިބޭނެ ފަދަ ނިޒާމެއް ޤާއިމްކުރެވެން ޖެހޭ ކަމަށް ޤަބޫލުކުރައްވާ ކަމަށް އެމަނިކުފާނު ވިދާޅުވިއެވެ.
މީގެ އިތުރުން މަދަނީ މައްސަލަތަކުގައި ވެސް ވަކީލަކު އައްޔަންކުރުމުގެ ޤާބިލްކަން ލިބިފައިނުވާ މީހުންނަށް އެ ފަރާތުގެ ހައްގު ގެއްލޭކަމަށާއި އެ މީހުންނަށް ބޭނުންވާ ޤާނޫނީ އެހީތެރިކަން ލިބޭނެ ފަދަ ދެމެހެއްޓެނެވި ނިޒާމެއް އޮތުން މުހިންމުކަމަށް ދެކެވަޑައިގަންނަވާކަމަށް އުއްތަމަ ފަނޑިޔާރު ވިދާޅުވިއެވެ. އަދި އެކަންކަމަށް ހައްލު ގެނައުމަށް މަސައްކަތް ކުރަން ޖެހޭކަމަށް ވެސް އުއްތަމަ ފަނޑިޔާރު ވިދާޅުވިއެވެ.
