އައްޑޫ ސިޓީ ފޭދޫގައި އެކްސިޑެންޓެއް ހިނގައިފި، އަނިޔާވި މީހުންގެ ހާލު ސްޓޭބަލް
15 ޖެނުއަރީ 2024 | ހޯމަ 03:26އުޅަނދު ދުއްވަން ތިބި މީހުންވެސް ތިބީ ލައިސަންސް ނަގައިގެން
އައްޑޫ ސިޓީ
އައްޑޫ ސިޓީ ފޭދޫގައި އެކްސިޑެންޓެއް ހިނގައިފިއެވެ.
އައްޑޫ ސިޓީ ފުލުހުން ނެރުނު ބަޔާނެއްގައި ބުނީ، ސައިކަލަކާއި ކާރެއް ޖެހި މި އެކްސިޑެންޓު ހިނގާފައިވަނީ އާދީއްތަ ދުވަހުގެ ރޭގެ ވަގުތެއްގައި ކަމަށެވެ.
އެކްސިޑެންޓުވި ކާރަކީ ރަޖިސްޓްރީ ނުކޮށް ދުއްވި ކާރެއްކަމަށް ބުނެ ބައެއް ވަސީލަތްތަކުގައި ދައުުރުވަމުންދަނީ ސައްޙަ މައުލޫމާތެއް ނޫންކަމަށްވެސް ފުލުހުން މައުލޫމާތު ދެއެވެ.
ފުލުހުން ބުނީ އެކްސިޑެންޓުވި ދެ އުޅަނދަކީ ރަޖިސްޓްރީ ކޮށްފައިވާ އުޅަނދުތަކެއް ކަމަށާއި، އުޅަނދު ދުއްވަން ތިބި މީހުންވެސް ތިބީ ލައިސަންސް ނަގައިގެންކަމަށެވެ.
މި އެކްސިޑެންޓުގައި ސައިކަލުގައި ތިބި ދެމީހުންގެ ތެރެއިން އެކެއްގެ ބޯ ފަޅައިގެން ގޮސް ދެވަނަ މީހާއަށް އެކިވަރުގެ އަނިޔާތައް ލިބިފައިވާކަމަށް ފުލުހުން ބުނެއެވެ. ނަމަވެސް ދެމީހުންގެ ހާލު މިހާރު ސްޓޭބަލްއެވެ.
މި އެކްސިޑެންޓުގައި އަނިޔާވެފައިވަނީ 37 އަހަރުގެ އަންހެނަކާއި، 19 އަހަރުގެ އަންހެނަކަށެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
