ޓްރާންސްޕޯޓް މިނިސްޓްރީގެ ތަފްސީލީ އޮޑިޓެއް ހަދަނީ

ޓްރާންސްޕޯޓް މިނިސްޓްރީގެ ތަފްސީލީ އޮޑިޓެއް ހެދުމަށް ނިންމައިފިއެވެ.

ބުދަ ދުވަހު އޮތް ނޫސްވެރިންގެ ބައްދަލުވުމުގައި މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީން ވިދާޅުވީ، މިނިސްޓްރީއާމެދު ހުރި ތަފާތު އެކިއެކި ތުހުމަތުތަކާ ގުޅިގެން، މިނިސްޓްރީގެ އެތެރޭގެ އިންތިޒާމުތައް ހަރުދަނާ ކުރުމަށް މަސައްކަތްތަކެއް ކުރެވިފައިވާކަމަށެވެ.

އަދި މިނިސްޓްރީގައި ބޭނުންކުރެވޭ "މެޓްރިކްސް ސިސްޓަމް" ގެ ޒަރިއްޔާއިން ގޯސްތައް ހެދުމަށް މަގުފަހިވާކަން ފާހަގަ ކުރެވިފައިވާކަން ބަޔާން ކުރައްވައި އަމީން ވިދާޅުވީ، އެ ނިޒާމު ރަނގަޅު ކުރުމުގެ މަސައްކަތްތައް ފަށާފައިވާކަމަށެވެ.

އެ ކަންކަމާއި ގުޅިގެން މިހާރު މިނިސްޓްރީގެ އޮޑިޓެއް ފަށާފައިވާކަމަށާއި، ވެހިކަލް ރަޖިސްޓްރީ މައްސަލަތަކާއި، ޑޮމެއިންގެ މައްސަލަތައް ފަދަ ކަންކަމާއި ގުޅިގެން ތަފްސީލީ އޮޑިޓެއް ހަދަން ނިންމާފައިވާކަމަށްވެސް އަމީން ވިދާޅުވިއެވެ.

އޭގެ އިތުރުން، މާލޭ ސަރަޙައްދަށް ރަޖިސްޓްރީ ވަމުންދާ ވެހިކަލްތަކުގެ އަދަދުތަކަށް ބަދަލު އަންނަންޖެހޭކަމަށްވެސް އަމީން ވިދާޅުވިއެވެ. އެގޮތުން ރަޖިސްޓްރީތައް ހަދަމުންދަނީ "ސިއްސައިގެންދާ މިންވަރަށް" ކަމަށް އަމީން ވިދާޅުވިއެވެ.

މުޅި ރާއްޖެއަށް 69،000ށް ވުރެ ގިނަ އުޅަނދު ފާއިތުވި 5 އަހަރުގެ ތެރޭގައި ރަޖިސްޓްރީ ކޮށްފައިވާއިރު، އޭގެ ތެރެއިން 42،000ށް ވުރެ ގިނަ އުޅަނދަކީ މާލެ ސަރަޙައްދަށް ރަޖިސްޓްރީވެފައިވާ އަދަދުތައްކަމަށް އަމީން ވިދާޅުވިއެވެ. އެއީ ގިނަ އަދަދެއްކަންވެސް އަމީން ފާހަގަ ކުރެއްވިއެވެ.

އަމީން އިތުރަށް ވިދާޅުވީ، ބައިނަލްއަޤުވާމީ ފަންޑިންގއާއެކު މާލެ ސަރަޙައްދުގެ ތޮއްޖެހުން ޙައްލު ކުރުމަށް ފަންނީ ލަފާ ހޯދުމަށް ބުރާސްފަތި ދުވަހު އެއްބަސްވުމެއްގައި ސޮއި ކުރުމަށް ނިންމާފައިވާކަމަށެވެ. ކުރިއަށް އޮތް ތަނުގައިވެސް ބޭރުގެ ތަޖުރިބާކާރުން ގެނެސްގެން މި މައްސަލައިގައި ލަފާ ހޯދުމަށް ވިސްނަވާކަން އަމީން ފާހަގަ ކުރެއްވިއެވެ.