ހިސާން މަޖިލީހަށް ވާދަނުކުރައްވާނެކަން ހާމަކުރައްވައިފި
ކުރިއަށް އޮތްތަނުގައިވެސް އެމްޑީޕީއާ އެކު ހުންނަވާނެކަމުގެ ޔަގީންކަން ދެއްވި
ތުޅާދޫ ދާއިރާގެ މެންބަރު ހިސާން ހުސައިން
ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން އަންނަ ރައްޔިތުންގެ މަޖިލީހުގެ އިންތިހާބުގައި ވާދަނުކުރައްވާނެކަމަށް ވިދާޅުވެއްޖެއެވެ.
ހިސާން އެކްސްގައި ކުރެއްވި ޕޯސްޓެއްގައި ވިދާޅުވީ އުފާވެރި އައު އަހަރެއްގެ ހެޔޮ އެދުންތަށް އެންމެހައި ބޭފުޅުންނަށް އަރިސްކުރައްވާ ކަމަށާއި، ތުޅާދޫ ދާއިރާ ތަމްސީލުކުރަން ދާއިރާގެ ރައްޔިތުން އޭނާއަށް ދެއްވި ފުރުސަތަށް ދާއިރާގެ އެންމެހައި ބޭފުޅުނަށް ހިތުގެ އެންމެ ފުންމިނުން ޝުކުރުއަދާކުރައްވާ ކަމަށެވެ.
އަދި މަސައްކަތުގެ އެހީތެރިވެދެއްވި އާއިލާއާއި، ޓީމް މެންބަރުންނާއި އެންމެހައި ބޭފުޅުންނަށް އިހްލާސްތެރި ޝުކުރެއް އަދާކުރައްވާ ކަމަށެވެ. އަދި ކުރިއަށް އޮތްތަނުގައިވެސް އެމްޑީޕީއާ އެކު ހުންނަވާނެކަމުގެ ޔަގީންކަން ދެއްވާކަމަށް ވިދާޅުވެ، 2024 ވަނަ އަހަރުގެ ރައްޔިތުންގެ މަޖިލީހަށް ކުރިމަތި ނުލާން ނިންމާފައިވާކަމަށް ހިސާން ވިދާޅުވިއެވެ. ހިސާން ވިދާޅުވީ އުންމީދަކީ މާތް ﷲގެ ވާގިފުޅާއެކު އަބަދުވެސް ރައްޔިޔުންނަށް ހިދުމަތްކުރުމުގައި ދެމިހުރުން ކަމަށެވެ.
ޖުޑިޝަލް ސާވިސް ކޮމިޝަން (ޖޭއެސްސީ) ގެ ރައީސް ކަންވެސް ކުރައްވަމުން ގެންދަވާ ހިސާން ވަނީ ސަރުކާރުގެ އެކި މަގާމްތައް އަދާކުރައްވާފައެވެ. މީގެ އިތުރުން ގާނޫނީ ވަކީލުކަމުގެ ދާއިރާއިން ކިޔަވައިގެން ހުންނެވި ހިސާން ވަނީ ބޮޑެތި މައްސަލަތަކުގައި ކޯޓުގައި ވެސް ވަކާލާތުކުރައްވާފައެވެ.
