ދައުލަތަށް ލިބެންޖެހޭ މަންފާ ނުލިބޭގޮތަށް ޓްރާންސްޕޯޓް މިނިސްޓްރީން ޑޮމެއިން ވިއްކުމުގެ ކަންކަން ކުރިއަށްގެންދާތީ، ކުރީ ސަރުކާރުން ޑޮމެއިން ވިއްކުން ހުއްޓާލާފައި އޮއްވައި މި ސަރުކާރުން އަނެއްކާވެސް އެ މަސައްކަތް ފެށުމަށް ނިންމައިފިއެވެ.

ބުދަ ދުވަހު އޮތް ނޫސްވެރިންގެ ބައްދަލުވުމުގައި ޑޮމެއިންގެ މައްސަލައަށް އަލިއަޅުވާލައްވާ މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީން ވިދާޅުވީ، އެ މައްސަލައިގައި މިހާރު މިނިސްޓްރީން ގޮތްތަކެއް ނިންމާފައިވާކަމަށެވެ.

މިނިސްޓްރީއާ ޙަވާލުވެވަޑައިގެންނެވިއިރުވެސް 200 ވަރަކަށް ޑޮމެއިންގެ ޚިދުމަތަށް އެދިފައި އޮތްކަން ފާހަަގަ ކުރައްވައި އަމީން ވިދާޅުވީ، ސައްޙަ ގޮތުގައި ހުރި ޑޮމެއިން ނަގާފައިވާ މީހުންނަށް އެ ޚިދުމަތް ލިބެންޖެހޭކަމަށެވެ.

ވެރިފިކޭޝަން ޕްރޮސެސްގެ ތެރެއިން ޑޮމެއިން ދޫކުރުމުގެ ޚިދުމަތް މި ސަރުކާރު އައިސް އަލުން ފަށާފައިވާކަންވެސް އަމީން ފާހަގަ ކުރެއްވިއެވެ.

އަމީން ވިދާޅުވީ، ޑޮމެއިންގެ ޚިދުމަތަކީ އަލުން ފަަށަންޖެހޭ ޚިދުމަތެއް ކަމަށާއި، ކުރިއަށް އޮތް ދެތިން މަސް ތެރޭގައި އެ ޚިދުމަތް އަލުން ފަށާނެ ކަމަށެވެ. އެކަން ކުރާނީ ޒަމާނަށް ފެތޭ ގޮތަށްކަމަށް އަމީން ވިދާޅުވިއެވެ.

އެއްގަމު އުޅަނދުގައި ރަޖިސްޓްރީ ނަންބަރުގެ ބަދަލުގައި ވަކި ނަންބަރެއް ނުވަތަ ނަމެއް (ޑޮމެއިން) ބޭނުންކުރަން ބޭނުންވާ ފަރާތްތަކަށް ޑޮމެއިން ދޫކުރުމާއި، ވިއްކުމާއި، ބަދަލުކުރުމާއި، އަގު ކަނޑައެޅުމާއި، ބޭނުން ކުރުމުގެ ހަމަތައް ކަނޑައަޅާފައިވާ ޤަވާއިދެއް އޮވެއެވެ. އެއީ "އެއްގަމު އުޅަނދުގައި ޑޮމެއިން ބޭނުން ކުރުމުގެ ޤަވާއިދު" އެވެ.

އެ ޤަވާއިދުގެ 6 ވަނަ މާއްދާގައި ޑޮމެއިން ވިއްކުމާގުޅޭ މައްސަލަ ޙައްލުކުރުމަށް ކޮމިޓީއެއް ކަނޑައަޅާފައި އޮންނަންވާނެކަމަށް ބަޔާންކޮށްފައިވެއެވެ.

އަދި ޤަވާއިދުގެ 7 ވަނަ މާއްދާގައި ޑޮމެއިން ވިއްކަންވާނީ ވިއްކުމުގެ ކުރިން އާންމުކޮށް އިއުލާނުކޮށް، އެންމެ މަތިން އަގު ހުށަހަޅާ ފަރާތަކަށްކަމަށް ބަޔާންކޮށްފައިވެއެވެ.

އެހެންނަމަވެސް، މި ޤަވާއިދުގައި ބަޔާންކޮށްފައިވާ ކޮމިޓީތައް މިނިސްޓްރީން އެކުލަވާލާފައިނުވާތީ ޑޮމެއިން ވިއްކައިގެން ދައުލަތަށް ލިބެންޖެހޭ މަންފާ ނުލިބޭގޮތަށް ޑޮމެއިން ވިއްކުމުގެ ކަންކަން ގެންދާކަން ފާހަގަވާކަމަށް ބަޔާންކޮށް މިދިޔަ ސަރުކާރުގައި ރައީސް އޮފީހުން ވަނީ ދައުލަތަށް ލިބެންޖެހޭ މަންފާ ނުލިބޭގޮތަށް ޑޮމެއިން ވިއްކާތީ އެކަން ހުއްޓުވާފައެވެ.