ހަތްވަނަ ފޯ ސީޒަންސް މޯލްޑިވްސް ސާފިން ޗެމްޕިއަންސް ޓްރޮފީ އަންނަ މަހު 7 ވަނަ ދުވަހު ފަށާ ގޮތަށް ހަމަޖެހިއްޖެ އެވެ.

ޖުމްލަ ހަ ރާޅާއެޅުންތެރިން ވާދަކުރާ މި މުބާރާތަކީ މުޅި ދުނިޔޭގައި ވެސް ފާހަގަކޮށްލެވޭ އެންމެ އަގުބޮޑު ސާފިން މުބާރާތެވެ.

މިފަހަރުގެ މުބާރާތުގައި ބައިވެރިވަނީ ހަވާއީގެ ރޮސް ވިލިއަމްސް، ބްރެޒިލްގެ މާޔާ ގެބްރިއާ، އޮސްޓްރޭލިއާގެ ޑިފެންޑިން ޗެމްޕިއަން ތާޖް ބުރޯ އަދި އެމެރިކާގެ ދެ ރާޅާ އެޅުންތެރިންކަމަށްވާ ސީޖޭ ހޮބްގުޑް އާއި ރޮބް މަޗަޑޯ އެވެ.

މީގެއިތުރުން މި މުބާރާތުގައި ރާއްޖޭގެ އިސްމާއިލް މިގްލާލް (ކުޑަ އިއްސެ) ވެސް ބައިވެރިވާނެ އެވެ. އޭނާ ވަނީ ރާއްޖޭގެ ތިން ގައުމީ މުބާރާތް ކާމިޔާބުކުރުމުގެ އިތުރުން ބައިނަލްއަގުވާމީ މުބާރާތްތަކުގައި ވެސް ވާދަކޮށް ކާމިޔާބީތަކެއް ހޯދާފައެވެ.

މުބާރާތާ ބެހޭ ގޮތުން ވާހަކަދައްކަމުން ކުޑަ އިއްސެ ބުނީ ދުނިޔޭގެ ފެންވަރުގެ ރާޅާއެޅުންތެރިންނާ ވާދަކޮށްލަން ލިބުމަކީ އޭނާ ލިބޭ ފަހުރެއް ކަމަށާއި، އަދި ވަކިން ހާއްސަކޮށް ރާއްޖޭގައި އެ ރާޅާއެޅުންތެރިންނާ ވާދަކުރުމަކީ ވެސް ލިބޭ އުފަލެއް ކަމަށެވެ. އޭނާ ވަނީ މި ފުރުސަތު ތަނަވަސްކޮށްދިން ފަރާތަށް ޝުކުރު އަދާކޮށްފައެވެ.

މި މުބާރާތާ ބެހޭ ގޮތުން މުބާރާތުގެ ކޯޑިނޭޓާ މާކް ވިލްސަން ބުނީ މިފަހަރު ވެސް ވަރަށް ރަނގަޅު ރާޅާއެޅުންތެރިން ބައިވެރިވެފައިވާ ކަމަށާއި، މުބާރާތް ވަރަށް ވާދަވެރިވާނެ ކަމަށް ބެލެވޭ ކަމަށެވެ.

މި މުބާރާތުގައި ތިން ޑިވިޝަނެއް ހިމެނޭއިރު، އެއްވަނަ ހޯދާ ފަރާތަކަށް 25,000 ޑޮލަރުގެ އަގުހުރި ފައިސާގެ އިނާމެއް ލިބެއެވެ. މުބާރާތް އަންނަ މަހުގެ 7 ވަނަ ދުވަހު ފަށާއިރު، 13 ވަނަ ދުވަހުގެ ނިޔަލަށް ކުރިއަށް ދާނެއެވެ.