ފުށިދިއްގަރު ފަޅު ހިއްކުމަށް އިންޓަނޭޝަނަލް ބިޑިންގއަކަށް ހުޅުވައެއްނުލާ: އާބަންކޯ
ސަރުކާރުގެ ތެރެއިން 3 ޕްރޮޕޯސަލް ލިބިފައިވޭ
އާބަންކޯގެ މެނޭޖިންގ ޑިރެކްޓަރު، އިބްރާހީމް ފަޒުލް ރަޝީދު
ރަސްމާލެ ތަރައްގީކުރުމަށް ފުށިދިއްގަރު ފަޅު ހިއްކުމަށް އިންޓަނޭޝަނަލް ބިޑިންގއަށް ހުޅުވާނުލާކަމަށް އާބަންކޯއިން ބުނެފިއެވެ.
ބުރާސްފަތި ދުވަހުގެ ހަވީރު އާބަންކޯއިން ވަނީ މި މަޝްރޫއާ ގުޅޭގޮތުން މައުލޫމާތު ދިނުމަށް ނޫސްވެރިންގެ ބައްދަލުވުމެއް ބާއްވާފައެވެ. މި ބައްދަލުވުމުގައި ރާއްޖެއެމްވީއިން ދެންނެވި ސުވާލަކަށް ޖަވާބުދެއްވަމުން އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވީ، ސަރުކާރުގެ ތެރެއިން 3 ޕްރޮޕޯސަލެއް ލިބިފައިވާ ކަމަށެވެ. އެންމެ ރަނގަޅު ޕްރޮޕޯސަލަށް ބެލުމަށްފަހު، ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އަށް ހަވާލުކުރީ ކަމަށް ފަޒުލް ވިދާޅުވިއެވެ.
މީގެ އިތުރުން ފަޒުލް ވަނީ މިހާރުގެ ރާއްޖޭގެ ހާލަތު އޮތްގޮތުން މިވަރުގެ ބޮޑު މަޝްރޫއެއް ކުރިއަށް ގެންގޮސްދޭނެ އިތުރު އިންޓަނޭޝަނަލް ކުންފުންޏެއް އޮތްތޯ ސުވާލު އުފައްދަވާފައެވެ.
ފަޒުލް ވިދާޅުވީ މިއީ ރާއްޖެއަށް ލިބުނު ރަނުގެ ފުރުސަތެއް ކަމަށެވެ. އަދި ރާއްޖޭގައި އަބަދުވެސް ބޮޑެތި މަޝްރޫއުތައް ހިންގަމުންދަނީ ސީއެމްސީސީ، ބޮސްކާލިސް، ޗައިނާ ސްޓޭޓްފަދަ ކުންފުނިތަކުން ކަމަށް އޭނާ ވިދާޅުވިއެވެ.
