ރަސްމާލެ ތަރައްގީކުރުމަށްޓަކައި ފުށިދިއްގަރު ފަޅު ހިއްކަނީ ހުޅުމާލެއިން 10 ހެކްޓަރު، އަދި ރަސްމާލެއިން 60 ހެކްޓަރުގެ ބިން ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އަށް ދޭގޮތަށް ކަމަށް އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.
ބުރާސްފަތި ދުވަހު އާބަންކޯގައި ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ، މި މަޝްރޫއަކީ ކުންފުންޏަށް ފައިސާ ދައްކާގޮތަށް ހިންގާ މަޝްރޫއެއް ނޫންކަމަށެވެ. ފަޒުލް ވިދާޅުވީ މި މަޝްރޫއަށް ސަރުކާރުންނާއި އާބަންކޯއިން އެއްވެސް ޚަރަދެއް ނުކުރާނެ ކަމަށާއި، ބިން ހިއްކުމަށް ހުރިހާ ޚަރަދެއް ކުރާނީ ސީއެމްސީސީ ކުންފުނިން ކަމަށެވެ. އަދި މި މަޝްރޫއު ހިންގަނީ ސީއެމްސީސީއަށް ޖުމްލަ 70 ހެކްޓަރުގެ ބިން ދީގެން ކަމަށް ފަޒުލް ވިދާޅުވިއެވެ.
ފަޒުލް ވިދާޅުވީ މި މަޝްރޫއާއެކު ކުންފުނީގެ ކޭޝް ފްލޯއަށް އެއްވެސް އަސަރެއް ނުކުރާނެކަމަށާއި، ކުރިއަށް އޮތް ތަނުގައި މި ޕްރޮޖެކްޓްގެ ސަބަބުން ކޭޝް ފްލޯއަށް އިތުރު ތިޔާގިކަން ލިބޭނެ ކަމަށެވެ. އަދި ވިދާޅުވީ ހުޅުމާލެއާއި ރަސްމާލެއިން ދޫކުރި 70 ހެކްޓަރުގެ ބަދަލުގައި އާބަންކޯއަށް ރަސްމާލޭގެ 1093 ހެކްޓަރު ބިން ލިބޭނެކަމަށާއި، އެއީ ކުންފުންޏަށް އިތުރުވެގެންދާ ބޮޑު އެސެޓެއް ކަމަށެވެ.
މި ބިން ވިއްކައިގެން އެ ބޭފުޅުންނަށް ލިބޭ ފައިސާއިން މި މުޅި އޮޕަރޭޝަން އެ ބޭފުޅުން ހިންގަންވީ. މިއަކަށް އަޅުގަނޑުމެންގެ ލޯ ލާރިއެއްވެސް ނެތް. އަޅުގަނޑުމެން އަތުގަ އޮތް އެސެޓެއް އަޅުގަނޑުމެން މި ދެނީ 1093 ހެކްޓަރު އަޅުގަނޑުމެންގެ އަތަށް ލިބޭ ގޮތަށް. ރައްޔިތުންގެ ބޯހިޔާވަހިކަމަށްޓަކާ 10 ހެކްޓަރުގެ ބަދަލުގަ އެބަ ލިބޭ 1093 ހެކްޓަރުގެ ބިން.އާބަންކޯގެ މެނޭޖިންގ ޑިރެކްޓަރު، އިބްރާހީމް ފަޒުލް ރަޝީދު
ބިންތައް ދޫކުރާ މުއްދަތަށް އިޝާރާތް ކުރައްވައި ފަޒުލް ވިދާޅުވީ ބިން ދޫކުރަނީ "ޑިވެލޮޕްމަންޓް ޕީރިއަޑް"އަށް ކަމަށެވެ. އެއީ 49 އަހަރާއި 50 އަހަރު ކަމަށް ފަޒުލް ވިދާޅުވިއެވެ. އެހެންކަމުން މި ބިންތައް އެ ކުންފުނިތަކަށް 99 އަހަރަށް ލިބޭނެއެވެ.
ބިން ދޫކުރުމަށް ނިންމައި، މަޝްރޫއު ފަށާފައިވާއިރު، ހުޅުމާލެއިން ދޫކުރި 10 ހެކްޓަރުގެ ބިމުގެ އަަގާއި ރަސްމާލެއިން ދޭ 60 ހެކްޓަރުގެ ބިމުގެ އަގަކީ ކޮބައިކަން، ނޫސްވެރިން ތަކުރާރުކޮށް ސުވާލު ދެންނެވިނަމަވެސް ފަޒުލް ވިދާޅުވެފައެއް ނުވެއެވެ.
މީގެ އިތުރުން ފަޒުލް ވިދާޅުވީ، ސީއެމްސީސީއަށް ދޫކުރި ބިންތައް އެ ކުންފުނިން ބޭނުންވާ އަގެއްގައި ވިއްކޭނެކަމަށާއި އެކަމުގެ ތެރެއަށް އާބަންކޯ ނުވަންނާނެ ކަމަށެވެ. ނަމަވެސް ބިން ވިއްކައިގެން ލިބޭ ފައިސާ ޖަމާކުރާނީ އާބަންކޯގެ އެކްސްކްރޯ އެކައުންޓަކަށް ކަމަށާއި، ސީއެމްސީސީއަށް ފައިސާ ދޫކުރާނީ އެ ކުންފުނީގެ ޕްރޮގްރެސިވް ޑިވެލޮޕްމެންޓަށް ބަލާފައި ކަމަށް ފަޒުލް ވިދާޅުވިއެވެ. ނަމަވެސް، ބިން ވިއްކަން ޖެހޭނީ ހުޅުމާލޭގެ މާސްޓަޕްލޭނާ އެއްގޮތްވާ ގޮތުގެ މަތިން ކަމަށް ފަޒުލް ވިދާޅުވިއެވެ.
ބަޖެޓުން ފުށިދިއްގަރު ފަޅު ހިއްކުމުގެ މަސައްކަތް އުނިކޮށްފައި ވަނިކޮށް، 18 ޑިސެންބަރު 2023ގައި މިމަޝްރޫއުގެ އަމަލީ މަސައްކަތް ވަނީ ފަށާފައެވެ. ފުށިދިއްގަރު ފަޅު ހިއްކުމުން އެތަން ވެގެންދާނީ ޒީރޯ ކާރބަން ސިޓީއަކަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެފައިވެއެވެ.
ފުށިދިއްގަރު ފަޅަކީ ގާތްގަނޑަކަށް 1،280 ހެކްޓަރުގެ ބޮޑު ސަރަހައްދެކެވެ. އެ ފަޅުން 1153 ހެކްޓަރު ހިއްކާނެކަމަށް މައުލޫމާތު ލިބެއެވެ.
