ތުލުސްދޫއިން މާފުއްޓަށް ދަތުރުކުރި މުދާ އުފުލާ ދޯންޏެއް ފަރަށް އަރައިފި
16 ޑިސެމްބަރު 2023 | ހޮނިހިރު 07:28ފަރަށް އަރާފައިވަނީ "ޑޮނަޓެއްލާ" ނަމަކަށް ކިޔާ މުދާ އުފުލާ ދޯންޏެއް
ދޯނި ފަރަށް އަރާފައި
ކ. ތުލުސްދޫއިން ކ. މާފުއްޓަށް ދަތުރުކުރި މުދާ އުފުލާ ދޯންޏެއް ފަރަށް އަރައިފިއެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މައުލޫމާތު ދޭ ގޮތުގައި ފަރަށް އަރާފައިވަނީ "ޑޮނަޓެއްލާ" ނަމަކަށް ކިޔާ މުދާ އުފުލާ ދޯންޏެކެވެ. އެ ދޯނި ކ. ގުޅި ކައިރީގައި އޮންނަ ފަރަކަށް އަރައިގެން އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަންއިން އެހީތެރިކަން ފޯރުކޮށްދެމުންދާ ކަމަށް އެ އިދާރާއިން ބުންޏެވެ.
އެމްއެންޑީއެފުން ބުނީ އެ ދޯނި ފަރަށް އެރިއިރު ދިވެއްސަކާއި ތިން ބިދޭސީ ފަޅުވެރިން ތިބި ކަމަށާއި ފަރަށްއެރިކަމުގެ މަޢުލޫމާތު އެމްއެންޑީއެފް ކޯސްޓްގާޑް، މެރިޓައިމް ރެސްކިޔު ކޯޑިނޭޝަން ސެންޓަރު (އެމްއާރުސީސީ) އަށް ލިބުނީ މިއަދު ހެނދުނު 07:36 ހާއިރު ކަމަށެވެ.
މަލޫމާތު ލިބުމުން، އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަންގެ ޑައިވަރުންގެ ޓީމެއް ދޯނި އޮތް ސަރަހައްދަށް ގޮސްފައިވާއިރު އެ ދޯނީގައި ތިބި ހަތަރު ފަޅުވެރިން ހާބަރކްރާފްޓް ލޯންޗުގައި މިހާރު ވަނީ މާލެ ގެނެސްފައެވެ.
ފަރަށް އެރުމުގެ ސަބަބުން ދޯންޏަށް ބޮޑެތި ގެއްލުންތަކެއް ލިބިފައިވާ ކަމަށް ވެސް އެމްއެންޑީއެފުން ބުންޏެވެ. އެ ދޯނި ފުންކުރުމުގެ މަސައްކަތުގައި ދޯނީގެ ވެރިފަރާތާ ގުޅިގެން ސިފައިން ދަނީ އެހީތެރިކަން ފޯރުކޮށްދެމުންނެވެ.
