އައްޑޫސިޓީގައި އަންގާރަ ދުވަހު ހިންގި ގްރޫޕް މާރާމާރީއާ ގުޅިގެން ހަތަރު މީހުން ހައްޔަރުކޮށްފައިވާ ކަމަށް ފުލުހުން ބުނެފިއެވެ.

ފުލުހުން ބުނީ ދެ ގްރޫޕެއްގެ ދެެމެދުގައި މާރާމާރި ހިންގާފައިވާ ކަމުގެ މައުލޫމާތު ލިބުނީ އަންގާރަ ދުވަހު 15:30 ހާއިރު ކަމަށެވެ. މި މާރާމާރީގައި އުމުރުން 20 އަހަރުގެ ދިވެހި ފިރިހެނެއް ޒަހަމްވެފައިވާއިރު އޭނާއަށް އައްޑޫ އިކުއެޓޯރިއަލް ހޮސްޕިޓަލުގައި ދަނީ ފަރުވާ ދެމުން ކަމަށް ފުލުހުން ބުނެއެވެ.

މި މައްސަލައާ ގުޅިގެން ކޯޓު އަމަރުގެ ދަށުން ފުލުހުން ހައްޔަރު ކުރި ތިން ދިވެހި ފިރިހެނުންނަކީ އުމުރުން 18 އަހަރާއި 20 އަހަރާއި 23 އަހަރުގެ ތިން މީހުން ކަމަށް ފުލުހުން ބުންޏެވެ. ހައްޔަރު ކުރި ހަތަރު ވަނަ މީހާގެ އުމުރު ފުލުހުން އަދި ސާފުކޮށް ނުދެއެވެ.