މެޑިކަލް ޗެކަޕް ރާއްޖެއިން ބޭރު ހޮސްޕިޓަލަށް ބަދަލުވާއިރު ދާ ޚަރަދާއި، އައިވީއެފް ފަރުވާއަށް އާސަންދަ ދެނީ
5 ޑިސެމްބަރު 2023 | އަންގާރަ 17:34ފަރޓިލިޓީ ކެއަރއަށް ޚާއްސަކޮށް މިހާރު އައިޖީއެމްއެޗުގައި ހުރި މަރުކަޒުގެ ޚިދުމަތް އިތުރަށް ފުޅާކޮށް، މިފަދަ އިތުރު މަރުކަޒެއް ގާއިމުކުރާނެ
އާސަންދަ އޮފީސް
ސަރުކާރުގެ ހޮސްޕިޓަލްތަކުންނާއި ސިއްހީ މަރުކަޒުތައް މެދުވެރިކޮށް، އަދި އާސަންދަ ސްކީމުގައި ރަޖިސްޓަރީ ވެފައިވާ އަމިއްލަ ހޮސްޕިޓަލްތަކާއި ކްލިނިކްތަކުން މެޑިކަލް ޗެކަޕް ހެދުމަށާއި، ބޭރުގެ ހޮސްޕިޓަލްތަކުން ފަރުވާ ހޯދާއިރު ހޮސްޕިޓަލް ބަދަލުކުރުމަށް އަތުން ކުރަންޖެހޭ ޚަރަދަށާއި، އިން ވިޓްރޯ ފަރޓިލައިޒޭޝަން (އައިވީއެފް)ގެ ފަރުވާއަށް އާސަންދަ ދިނުމަށް، ވަޒީރުންގެ މަޖިލީހުގެ މަޝްވަރާގެ މަތިން ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ނިންމަވައިފިއެވެ.
އާސަންދައާ ގުޅޭގޮތުން 3 ކަމަކަށް މިސަރުކާރުން ވައުދުވެފައިވެއެވެ. އެކަންކަމާ ގުޅޭގޮތުން ވަޒީރުންގެ މަޖިލީހުން ނިންމެވި ނިންމެވުމުން ހާމަކުރައްވައި، އަންގާރަ ދުވަހު ބޭއްވި ނޫސްވެރިންގެ ބައްދަލުކުރެއްވުމުގައި ރައީސް ވިދާޅުވީ، ބަލިޖެހުމުގެ ކުރިން އެ ބަލިން ރައްކާތެރިކުރުމަކީ މި ސަރުކާރުން ވަރަށް ބޮޑު އިސްކަމެއްދޭނެ މައިގަނޑު އެއް ސިޔާސަތުކަމަށެވެ. އެހެންކަމުން އާސަންދައިގެ ތެރޭގައި ހިމެނޭ ޚިދުމަތެއްގޮތުގައި މެޑިކަލް ޗެކަޕް ފޯރުކޮށްދީ، އެކަމަށް މީހުން އަހުލުވެރިކުރުވުމުގެ ހަރަކާތްތައް ކުރިއަށް ގެންދާނެކަމުގައި އެމަނިކުފާނު ވިދާޅުވިއެވެ.
ރައީސް ވިދާޅުވީ، އާސަންދައިގެ ތެރެއިން ރާއްޖެއިން ބޭރު ގައުމެއްގައި ފަރުވާ ހޯދުމުގައި، ފެންވަރު ރަނގަޅު އެހެން ހޮސްޕިޓަލަކަށް ބަދަލުވާއިރު އަމިއްލައަށް އިތުރަށް ކުރަންޖެހޭ ޚަރަދުތައް އާސަންދައިގެ ތެރޭގައި ހިމެނުމަށް، ކެމްޕެއިން ތެރޭގައި ވައުދުވެވަޑައިގެންނެވި ކަމަށެވެ. އެ ވައުދުފުޅު ފުއްދެވުމުގެ ގޮތުން މިކަން ކުރައްވާނެ ގޮތަކީ، އާސަންދައިގެ ޚިދުމަތް ދޭ ހޮސްޕިޓަލެއްގެ ގޮތުގައި ހިމަނާފައިވާ ބޭރުގެ ހޮސްޕިޓަލްތަކުގެ ފެންވަރު ވަޒަންކުރާނެ ގްރޭޑިންގ ނިޒާމެއް ކަނޑައެޅުއްވުން ކަމަށް ވިދާޅުވިއެވެ.
ތިންވަނަ ވައުދަކީ އައިވީއެފް ޚިދުމަތް އާސަންދައިގެ ދަށުން ހަމަޖެއްސުމެވެ. ރައީސް ވިދާޅުވީ އައިވީއެފް ޓްރީޓްމެންޓް ހިމެނޭހެން، ދަރިމައިވުމުގެ ފަރުވާގެ ޚިދުމަތް އާސަންދައިން ހަމަޖައްސައިދޭނެ ކަމަށާއި، އަދި ދަރިމައިވުމުގެ ފަރުވާ ހިމެނޭ ގޮތަށް އާސަންދަ ސްކީމުގެ ގަވާއިދު އިސްލާހުކޮށް، ގެޒެޓްކުރާނެ ކަމުގައި އެމަނިކުފާނު ވިދާޅުވިއެވެ. ހަމަ އެއާއެކު، އެކަމަށް އުސޫލެއް އެކުލަވާލައި، އެކަންވެސް އިއުލާން ކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
މީގެ އިތުރުން، ދަރިމައިވުމުގެ ސިއްހަތަށް ޚާއްސަ ފަރޓިލިޓީ ކެއަރއަށް ޚާއްސަކޮށްގެން މިހާރު އައިޖީއެމް ހޮސްޕިޓަލުގައި ހުރި މަރުކަޒުގެ ޚިދުމަތްތައް އިތުރަށް ފުޅާކޮށް، މިފަދަ އިތުރު މަރުކަޒެއް ގާއިމުކުރެވޭނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
