މާލެ ސަލްޓަން ޕާކުގެ ފަސްފުނި ފުރާނައިގެން އެއްދުވަހުން 96 ފައިސާ ފޮތި ހޯދި ކަމަށާއި، ދެވަނަ ދުވަހު އެމަސައްކަތް ކުރަން ދިޔައިރު ފަސްފުނި އެއްކޮށް ގެއްލިފައިވާ ކަމަށް ކުރީގެ ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެ އެވެ.
ޔުމްނާ މިނިސްޓަރުކަމުގައި ހުންނަވަނިކޮށް މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑޭ) ލިޔުމުން ހުށަހެޅުއްވި ސުވާލުގެ ޖަވާބު މަޖިލީހުގެ އަމީންއާންމު މަޖިލީހުގައި އިއްވެވީ ހޯމަ ދުވަހު ކުރިއަށް ގެންދިޔަ މަޖިލީހުގެ ޖަލްސާގައެވެ.
ޔުމްނާ ވިދާޅުވީ ސަލްޓަންޕާކު ތަރައްގީކުރުމުގެ މަޝްރޫއުގެ ތެރެއިން ޕާކުގެ ލިލީ މަގަށްވާ ފަޅިން ރިހި ފައިސާ ފޮތިތަކާއި މުށި ސީނުތަށިތަކަކާއި ގުޅިއެއްގެ ބައިތައް ފެނިފައިވާ ކަމަށެވެ. އަދި މޯލްޑިވްސް ނޭޝަނަލް ޑިފެންސް ފޯސްގެ ފަރާތުން މައުލޫމާތު ހިއްސާކުރުމުން ޑިމާޓްމަންޓް އޮފް ހެރިޓޭޖުގެ ޓީމެއް ސަލްޓަންޕާކަށް ގޮސް ބަލައި، ކޮނެފައިވާ ވަޅުގަނޑުން ނަގާފައިވާ ފަސްފުނި ފުރާނައިގެން، އެދުވަހުގެ އިރުއޮއްސުމާ ހަމައަށް 96 ފައިސާ ފޮތި ހޯދިފައިވާ ކަމަށެވެ. އަދި އެފަަސްފުނި ފުރާނައިގެން އިތުރު ފައިސާ ފޮތިތަކެއް ފެނިދާނެ ކަމަށް ބަލައި، ޖެހިގެން އައި ދުވަހު އެމަސައްކަތަށް ދިޔައިރު ފަސްފުނި އެއްކޮށް ގެއްލިފައިވާ ކަމަށް އެމަސައްކަތުގައި އުޅުނު މުވައްޒަފުން މައުލޫމާތުދީފައިވާ ކަމަށް ޔުމްނާ ވިދާޅުވިއެވެ.
މީގެ އިތުރުން ޔުމްނާ ވިދާޅުވީ ސަލްޓަންޕާކުގައި ކުރި މަސައްކަތުގެ ތެރެއިން ފެނިފައިވާ 43 ފައިސާ ފޮތި, 18 އޮކްޓޫބަރު 2017 ގައި މޯލްޑިވްސް ޑިފެންސް ފޯސްގެ ފަރާތުން ހެރިޓޭޖްއާއި ހަވާލުކޮށްފައިވާކަން ރިކޯޑުތަކުން ފެންނަން އޮތް ކަމަށެވެ. އެހެންކަމުން ޖުމްލަ 139 ފައިސާ ފޮތި ގައުމީ ދާރުލްއާސާރުގައި އެބައޮތް ކަމަށް ސަގާފީ ތަރިކަ ރައްކާތެރިކުރާ ގައުމީ މަރުކަޒުން މައުލޫމާތުދޭ ކަމަށް ޔުމްނާ ވިދާޅުވިއެވެ. އަދި ވިދާޅުވީ އެކި ސައިޒުގެ 713 ސީނުތައްޓާއި، ތެޅިފައިވާ ސީނުތަށިތަކެއް ބައިތަކަކާއި، ގުޅިއެއްގެ ބައިތަކަކާއި ލޯ ތާހެއް 19 ޖުލައި 2017 ގައި ގައުމީ ދާރުލް އާސާރަށް ލިބިފައިވާ ކަމަށެވެ.
މާލެ ސަލްޓަންޕާކު ތަރައްގީ ކުރުމުގެ މަޝްރޫއު ހިންގާފައިވަނީ އަޅުގަނޑު މިމަގާމާއި ހަވާލުވުމުގެ ކުރިން 2017 ވަނަ އަހަރުގައިކަން ފާހަގަކުރަމެވެ. މާލެ ސަލްޓަން ޕާކު ތަރައްގީކުރުމުގެ މަޝްރޫއުގެ ތެރެއިން ޕާކުގެ ލިލީ މަގަށްވާ ފަޅިން ރިހި ފައިސާ ފޮތިތަކާއި މުށި ސީނުތަށިތަކަކާއި ގުޅިއެއްގެ ބައިތައް ފެނިފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސްގެ ފަރާތުން މިނިސްޓްރީ އޮފް އެޑިޔުކޭޝަން އޭރު ހިންގަމުންދިޔަ ޑިމާޓްމަންޓް އޮފް ހެރިޓޭޖަށް 15 ޖޫން 2017 ގައި އަންގަވާފައިވެއެވެ. މިމައުލޫމާތު ލިބުމާއި ގުޅިގެން އެޑިމާންޓްމަންޓްގެ ޓީމެއް ސަލްޓަންޕާކަށް ގޮސް ބަލައި، ކޮނެފައިވާ ވަޅުގަނޑުން ނަގާފައިވާ ފަސްފުނި ފުރާނައިގެން އެދުވަހުގެ އިރުއޮއްސުމާ ހަމައަށް 96 ފައިސާ ފޮތި ހޯދިފައިވޭ. އެފަަސްފުނި ފުރާނައިގެން އިތުރު ފައިސާ ފޮތިތަކެއް ފެނިދާނެ ކަމަށް ބަލައި، ޖެހިގެން އައި ދުވަހު އެމަސައްކަތަށް ދިޔައިރު ފަސްފުނި އެއްކޮށް ގެއްލިފައިވާ ކަމަށް އެމަސައްކަތުގައި އުޅުނު މުވައްޒަފުން މައުލޫމާތު ދެއްވާފައިވޭކުރީގެ ހެރިޓޭޖް މިނިސްޓަރު ޔުމްނާ މައުމޫން
ޔުމްނާ ވިދާޅުވީ މިތަކެތި ގައުމީ ދާރުލްއާސާރަށް ލިބުމާއެކު އާސާރީތަކެތީގެ ރަޖިސްޓްރީގައި ހިމަނާފައިވާ ކަމަށެވެ. މިތަކެތި މިވަގުތު ބެހެއްޓިފައިހުރީ އާސާރީތަކެތި ބެހެއްޓުމަށް ޚާއްސަކުރެވިފައިވާ ސްޓޯރޫމްގައި ކަމަށް ޔުމްނާ ވިދާޅުވިއެވެ. އަދި ވިދާޅުވީ ސަގާފީތަރިކާގެ ގާނޫނު އެގާނޫނާ ގުޅިގެން އާއްމުކޮށްފައިވާ ގަވާއިދުތަކުގައިވާ ގޮތުގެ މަތީން މިތަކެތީގެ ރައްކާތެރިކަން ކަށަވަރު ކުރެވިފައިވާ ކަމަށް ސަގާފީތަރިކަ ރައްކާތެރިކުރާ ގައުމީ މަރުކަޒުން މައުލޫމާތު ދީފައިވާ ކަމަށެވެ.
